HMANGAIH TURIN, I NGAIHTHLAK PEIH A NGAI

 Inlaichinna Ṭha

— Rick Warren 

— 3 Aug, 2022

“Mahni vengte tihsawt nan an ṭhatna turin tihlawm i tum ṭheuh ang u.” Rom 15:2

Ngaihthlak hi ṭhian siam nan leh inlaichinna siam nana pawimawh berte zing a mi a ni maithei a ni. Mi dang thu leh hla i ngaihthlak loh chuan i hmangaih thei lo vang.

Mahse a chang chuan benga hriatna satliah leh ngaihthlak chungchang hi thil thuhmun emaw an tih avangin inlaichinna chungchangah harsatna a awm ṭhin. A nihna takah chuan mi dang thusawi hriatna leh ngaihthlakna chu thil inthlau tak a ni.

Mi thusawi chu i hriaa mahse i ngaithla lo thei a. Ka chhungte ṭawngkam ngaihthla miah lovin an ṭawng ka hriat avang chauhin vawi tam kan inhnialpui tawh a ni. A chang chuan thu hi chu engmah lo a ni ṭhin. Mi tuemaw chuan i hnenah , “ka ṭha e,” a ti ang. Mahse an sawi dan aṭang khan an ṭhatlohzia chu i hre thei si ang. Ngaihthlak awmzia chu an sawi loh pawh i hre tel tihna a nih chu.

Chutianga i ngaithla a nih chuan, lainatna i lantir tihna a ni. Lainatna awmzia chu midang pheikhawk bun chhina, an thlirna aṭang thlir ve hi a ni. Hetiang hian inzawt la, “Chutiang dinhmunah chuan ding ve ta ila engtin nge ka awm ang tih hi?” 

Lainatna nena ngaihthlak tih awmzia chu thil dang tibuaitu awm miah lova ngaihthlak leh an sawi tel loh, an ṭawngkam phena an natna leh an hlauhna te pawh ngaihthlak hi a ni. Chu an harsatna chu chinfelsak kher a ngai lo; a chang chuan damna hi ngaihthlakna aṭangin a lo thleng thei a ni.

Rom 15:2 ah chuan, “Mahni vengte tihsawt nan an ṭhatna turin tihlawm i tum ṭheuh ang u” a ti a ni.

Mi dang buaina ngaihtuah emaw an phurritte phurhpui chu eng nge awmzia ni ang le? A awmzia chu miin harsatna nasa tak an phurh hian an rin ber pawh an hrethiam lo va - ṭhian rinawm leh inpe an mamawh ṭhin. Anmahni lainatna nena kawma ngaithla peih ṭhian an mamawh a ni. Chutiang ṭhian chu vawiinah hian i ni thei ang em?   

Ngaihtuah zui atan

* Mi dang i ngaithla tak tak a ni tih i taksa awm danin engtin nge i lantir theih ang?

* Hetianga thu zawh hi eng nge hlawkna ni ang, “Chutiang dinhmunah chuan ding ve ta ila engtin nge ka awm ang tih hi”?

* Mi dang i ngaihthlak kawnga harsatna awm thei leh tibuaitu che engtin nge i tih tlem theih ang?

*[Lettu: Sangpuia]*