- K. Remruatfela
Author of "Indian union chhunga Zofate rin luh kan nih dan."
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
Tunlai lehkhabu lar tak "Zari Jail Diary" tih chu ka han bihchiang ve a. Ka chhiar laia ka rilrua thu lo lût a tam em em a. Chung zinga langsar zuala ka hriatte lo tarlang ila.
1. He lehkhabu a lâr chhan ber ni-a lang chu IGP leh a hote 2 kahhlum an nihna kawnga Mizo hnam tâna beitu ni-a inchhal, MNF sipaite thurualpuia, chumi avanga Mizo hmeichhiaiin kum 6 lai jail bang a zût phah a ni ti-a a tlângthan vang a ni ber a. Amaherawhchu, a bu chhung han chhiar hian a changtunu hian dawta puh a nih thu leh IGP thihnaah engmah inhnamhnawihna a neih loh thu a sawi nawn ngun hle a. Chuti a nih dawn chuan, a jail tân chhan hi court trial kal sual nghawng zela wrongful conviction vang chauh a ni dâwn tihna a ni a. Ram leh hnam tâna a beihna vanga tawrhna lam reng reng a lang ta lo tihna a ni dâwn a. Chuvangin, prosecution ten an puhna hi dawt muhlum vek nge thudik (ugly truth) tih hi ka zawhna a ni.
2. A tawrhna hi hmeichhe awm nêm zâwk tawrh atân chuan a nasa tak zet a. Human rights bawhchhiatna pawh a tam hle niin a lang! Chutihlaia ka rilrua lo lang daih chu duhthu lêng sâm sual vanga Zoram mipui tawrhna nasa lutuk kha a van rapthlâk em tih hi a ni. Eiruk thubuai vanga suspend tâwk mêk, Pu Laldenga khân huatna rilru dah tha in a hunlaia Mizo Union Party kaihhruai District Council hotute leh khatihlaia patling lung fing tawh zâwkte thurâwn kha lo pawm thiamin a tul lova tharum thawhna kha lo awm lo chu ni se hetiang tawrhna zozâi hi a thleng dâwn hauh lova. Special Force din pawh a ngaih loh phah ang a. Mizo leh Mizo inbeih a rapthlâk tak te kha a awm lo ang a, hmangaihna nen kan lêng zâ del del zâwk tur kha a ni a. A tuar lo tur turin an tawrh phah hi a pawi em em a ni.
3. Ka chhiar laia ka rilrua lo lang lian leh em em chu ram leh hnam chhanna kawnga Zirlai Pâwlte lo thawhhlawk thin zia kha a ni. A bik takin Shillong vanglai tih hian ka lung hi a lo tileng ve tawp thin a. Khang hunlaia zirlai hruaite kha vawiin thlenga mi chhuanawm tak vek vekte an ni hlawm a. Khatianga khawpa Mizo hnam feeling an lo pu leh an hnam pui tanpui duhna thinlung an lo nei kha a ropui ka ti tak zet! Bangalore lama Mizo Zirlai Pawl hruaitu kan lo nih ve laite min ngaihtuah chhuah tir rum rum mai.
4. A tawp bera ka rilrua lo lang lian ber chu kan mihringpuite rawngbawlna kawnga Advocacy (Advocate/Lawyer/Ukil) hna lo pawimawh zia hi a ni. Thil lang chiang em em chu Zari case trial a nih chhoh dan hrim hrimah khân procedural lapse a tam em em a. Khatih hunlai khân Mizo Lawyer tha lo awm tawh ni se la chuan court judgment kha a danglam daih ang! Mihringte dikna leh chanvo humhalh a nih theih nana kulhbing sâng chu Advocate/Lawyer/Ukil te hi an ni a. He lehkhabu atang hian kan mawhphurhna lo sân zia min hriatchhuah tir nasa hle! Hemi case kaihhnawiha full text judgment & order chhiar tur in lo kawl hlawm mial lo maw?
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: