TBCC ELECTRIC BILL BA PEKNA TUR CHENG NUAI 5 PU R LALZIRLIAN'AN A HLAN

July 28, 2022: Bill an pek theih loh avanga power supply tih tawp sak, Tawngtai Bethel Camping Centre, Sakawrtuichhun chu July ni 26, Thawhlehni khan P & E Minister Pu R Lalzirliana'n a tlawh a, bill ba rulhna tur cheng nuai 5 a hlan.

 

P & E Minister Pu Zira chuan bill an pek theih loh avanga connection tihtawp sak annih avanga harsatna an tawh sutkian dan ngaihtuahin Central YMA hotute nen an thutkhawm tih a sawi a, TBCC in harsatna an neih te chu, a sutkian pui thei tu tur dik tak, department enkawltute hnenah thlen hmasa thin se a duh thu te, harsatna an tawhte, politics-a inchirhthehna atana hmang mai lova, tu pawh sawrkar se, sawrkar hotute nena thawhho dan zir thar pawimawh a tih thu a sawi. Hei bakah hian electric bill pek theih loh, a awm tawh lohna turin, TBCC connection leh load hrang hrang awmdante chu P&E department-a thawktu ten en chiangin ruahmanna siam a nih tur thu leh Department hnathawktute chu, lo thawhpui thiam turin TBCC enkawltute a chah bawk a ni.
P&E minister hian Minister of State Dr. K. Beichhua nena an thawh dun, electric bill ba rulhna tur, cheng nuai 5 hlanin electric, lo dis-connect tawh pawh, re-connect leh nghal turin a ti bawk a. TBCC hi electric re-connection tih sak nghal niin eng pawh pek zui nghal anni.

 

 

- MSR