PAWISA CHU A HMANNA TUR TICHIANG RAWH

 Sum enkawl dan

— Rick Warren 

— 20 July, 2022



“Mi taima ngaihtuahna chuan neihnunna lam chauh a pan a. Mi thatchhia erawh chuan tlakchhamna lam chauh a pan a ni.” Thufingte 21:5 

Tu te pawh hian sum leh paiah chuan rinawm kan duh ṭheuh mai. Isua zuitu i nih chuan, sum leh paiah pawh Pathian malsawmna i dawn duh ka ring. Pen khata chutiang nih theihna dan chu sum hmana tura ruahmanna siam hi a ni a — thlarau lam a budget siam hi chinṭhana neih tur a ni.

Budget han tih hian sum hmanchhuahna siam hi a ni mai. I sum chu ho mai maia khawhral lovin a hmanna tur mumal taka siam hi a ni. Sum leh paia hlawhtlinna chan dan chu, pakhatnaah chuan, i pawisa hmanna tur ti fel la, chu chu a hlawhtlin theih nan ruahmanna fel takin siam ang che.

Zalen taka sum hman hi sum peipunna a ni lo. Pawisa renchem taka hmanna aṭangin a lo thleng zawk a ni. Pawisa zalen taka i hman chuan engzat nge i dehchhuah tih aṭangin an teh lo che a; i dehchhuah chu engtin nge i hman tih aṭangin an teh zawk che a ni. Chutianga i hman thiam chuan i lak luh chu tam lo mah se awmze nei takin i hmang thei dawn a ni.

Tuna i lak luh pawh i hman daihzai thiam loh chuan,  sum tam zawk pawh i hmang thiam chuang lo vang. Sum i dek chhuak tam emaw tlem emaw pawh nise, i hmanral dan tur chu i zir a ngai a ni.

Thufingte 21:5 chuan, “Mi taima ngaihtuahna chuan neihnunna lam chauh a pan a. Mi thatchhia erawh chuan tlakchhamna lam chauh a pan a ni.” Tunlaiah chuan tu te pawh hian, “thil an ti zung zunga” an duhzawng thil pawh an lei thuaia— rang takin, tum lawk lovin pawisa an hmang. Chutiang chawpchilh rilru chu: Thil i hmu a, i awta, i lei ringawt ṭhin ang hi.

Chutiang chawpchilh deuha thil lei mai duhna chu engtin nge i tihtawp ang? Budget-ah dah la. Ruahmanna siam la, i pawisa hmanna tur chu tifel ṭhin ang che. Chutiang chuan thil pawh i lei tlem deuh ang.

Zirchianna aṭang chuan i bazar tlem chuan, pawisa pawh i hmang tlem tih hi. Entirnan, ba i nei a nih chuan, a tawp a tawpa hahdam tura i kal duhna chu bazarna lamah a nih ṭhin vang a ni ang. Khuaiin a zuk che i duh loh chuan khuai awmna aṭang chuan inthiarfihlim rawh!

Heng thute hi thil thar a ni lo, a ril em em thung a ni. Amaherawhchu zawm hi a harsa em a. Pawisa hmanna thlak danglam tur chuan mahni inthunun a ngai hle a, budget ziak chhuak tura beih leh chumi zulzuia hmalak chu a ngai bawk a ni.

Amaherawhchu a harsa i tih hunah chuan, Pathian chu i hnenah a awm reng a, i tana thil ṭha ber a duh tih hria ang che. Sum enkawlnaa i rinawmna hmuh a duh a. Sum vawngtu ṭha tak ni tura a ruatna che i tihhlawhtlin theih nan a ṭul zawng zawng a ti ang.

Ngaihtuah zui atan

* Eng vangin nge sum hmanna tur budget siam chu a ṭul? (Budget siam dan hi i man thiam chiah lo a nih chuan i ṭhiante a thiam rawn ang.)

* Sum i hman tlem zawk theih nan thil pakhat eng nge bansan theih i neih le?

* Zalen taka pawisa hmanchhuah hi i nunah engtin nge a thawh dan?

[Lettu: Sangpuia]

No comments

He post chungchanga i ngaihdan lo sawi ve rawh:

Powered by Blogger.