Nagaland-a ‘Workshop on Clean Election movement’-ah Inthlanna thianghlim nei tura Mizote hmalak dan hrilhfiah

Aizawl | July 29, 2022: Central YMA hruaituten Nagaland-ah Inthlanna thianghlim (clean election) chungchanga Mizote hmalak dan an hrilhfiah.

 

Ni 28.7.2022 (Ningani) khan Nagaland - Mon District Headquarter, Mon-a Konyak Baptist Church hnuaia Clean Election Movement Committee buatsaihin ‘Workshop on Clean Election movement’ neih a ni a. Hetah hian sawm an nih angin , MPF Gen. Hqrs. Secretary leh Central YMA Asst. Secretary Prof. Malsawmliana leh CYMA CEC RS Lalrinsanga te an tel.

Prof. Malsawmliana hian Mizorama inthlanna thianghlim a awm theihna tura Mizoram People Forum (MPF) hmalakna a sawi a, Pu RS Lalrinsanga hian NGO hrang hrangte hmalakna a sawi thung.

Nagaland hian nakum (2023) kumtirah General Election an hmachhawn dawn a, hemi atana inbuatsaihnan an Kohhran hruaituten Mizorama MPF leh tlawmngai pawl hrang hrangte hmalak dan an hriat duh avanga he hun hi buatsaih an ni.

He hun hi Mon District DC in a hmanpui a, Konyak Baptist Church hruaitu te leh Konyak hnam pawl hrang hrang aiawh mi 200 vel telin hlawk pui an in ti hlawm hle a ni.

 

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]