Aizawl | July 16, 2022: LBS Suzuki All Mizoram Inter Village Football Tournament 2022 Semifinal-ah Sialhawk chuan Ramhlun North hnehin final an lut, an pui keih keih ngei mai.
(Chhanna_TheAnswer Match Report)
Goal hnih ve ve khungin an inhnehtawk a, penalty shootout-ah Sialhawk 4-2 in an chak. R. Laldanmawia chuan goal hmasa ber leh a hnuhnung ber a khung.
Lammual chu rawng dur (pawl) leh var in a khat tlat a, beng ngawng tan pawh Sialhawk leh Ramhlun North tantute an ni tih a thliar hran theih a, an thawm pawh mitdelte hriat thama ring a ni bawk - pui mep mep tak a ni.
Sialhawk an hlauhawm hmasa, mual sira awm R. Laldanmawia'n a hun tha hmasa goal zawnah a pet lo a, freekick atanga ball kal erawh tawih zetin a tauh lut; player danglam bik a nihna a lantir.
Crespo Vanlalhriatpuia'n Danmawia tan through ball tha bik a pe a, Sialhawk Express hian fal takin a lalut, mahni hmasial lo takin a thianpa tan a siamsak zui a, mahse a lo offside hlauh; si hnih faia hma hruai theihna remchang an neih chu an bawhpelh.
Ramhlun North an awm mai mai bik lo, captain V. Lalchhuanawma ke atangin ball hlauhawm a chhuak zeuh zeuh, target zawnah erawh a kal hleithei lo. Chawlhlawk hmain K. Lalrosanga'n si phurh a sut.
Rosanga hi a tlan chak a, amah vengtu defender lak atanga a talput theih bakah a finishing a tha tawk hle bawk - kawr pawl ha ho ang maiin a var ha hoin thawm bengchheng an chhuah ve thei ta.
Second half pawh a hmuhnawm, team pahnihin hlauhawm siam zauh zauh mah se goal khung an harsat. Ramhlun North tan Lalpekhlua a inlar zauh, a ball pek hmasa lo dansak mah se a per leh hi shot zui chu an lo danper avangin Sialhawk keeper tan dan hman a ni tawh lo.
Sialhawk an beidawng duh bik lo, hla deuh tak atanga freekick ball kal chu keeper Laltanpuia'n a nem chhuak tha tawk lo, ball per hi Rotluangliana bin chu Lalmuankima'n lo tauh lutin siphurh a sut, minute 87-naah 2-2 in an inhnehtawk.
Danmawia cross ball hlauhawm viau thin mah se goal an sualchhuak hleithei lo. Crespo-a long shot Ramhlun North keeper in a lo dansak chu turu tak a ni, tualchhung football hmuhnawm an chhawp chhuak.
#Chhanna_TheAnswer #Khemual
Chhanna_TheAnswer hi kan thawhpui a ni a, a hmingah hian hmetin in lo follow ve dawn nia.
Post a Comment
He post chungchanga i ngaihdan lo sawi ve rawh: