INNEIHNA NGHET CHU TUTE TAN PAWH A ṬHA

  Inlaichinna Ṭha

— Rick Warren 

— 27 July, 2022

“Hmangaihna chu vervekna tel lovin ni rawh se. Sual lam chu hua ula, ṭha lam chu pawm tlat rawh u. Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula” Rom 12:9-10.

Inneihna nghet chu tute tan pawh a ṭha a ni. A inneia te tan hlawkna a ni a, khawtlang tan thleng pawhin ṭangkaina a awm a ni.

Hmasang aṭang tawhin inneihna hi khawtlang tan leh  chi tin tan ban pawimawh tak pakhat a ni. Inneihna hi a ngheh tlat chuan ram pawh a lo nghet a. Inneihna leh chhungkua a ngheh loh chuan ramin a tuar ṭhin.

Inneihna nghetah chuan mimal inlaichinna pawh a nghet tulh tulh a. Pathianin inneihna hi i nungchang tifamkim turin a hmang a ni. Inlaichinnaah chuan mahni hmasial lohna leh hmangaihna i zir a ni. Kawppui i neih tawh chuan chu aia inlaichinna pawimawh dang i nunah a awm lo vang.

Kawppui ila nei lo a nih chuan, Pathianin i nungchang siam turin midang a hmang thei a, a la hmang dawn a ni. Ka tiam a che — kawppui nei lo te hi tum ṭhelh an ni chuang lo! Pathian duh dan angin, kawppui nei lo te pawhin khawtlang tan ṭangkaina tam tak an nei a ni. A chang chuan, kawppui leh fate nei hoin an tih theih loh thlengin an ti thei a ni. Hei hi a ni thudik chu, khawtlang pawhin kawppui nei lo, midang nena inlaichinna neih hreh chuang si lo pawh a mamawh a ni.

Kawppui i nei emaw nei lo emaw nun awmzia tak chu nangmah chauh khan i awm lo tih hriatchhuah hi a ni. Hlimna tak tak chu, midang te tana nun hlan te, mahni hmasial loh te, midang rawngbawlsak leh hmangaih te aṭangin a awm a ni. Hei tak hi puitlinna chu a ni.

Nun chu hmangaih zirna hmun a ni a. Hei hi tuna thil pawimawh tak a ni. Pathian chu hmangaihna a nih avangin amah anga awm turin a duh che a. Isua anga siam che a duh a. I nungchang siam a duh a ni.

Kawppui nei i nih chuan, a hmasa berah chuan i kawppui  kha Isua nun neihtir hi Pathian thil tum a ni. Ni tin hian nang aiin mi dang ngaihtuahna hun ṭha i nei a ni.

Bible chuan, “Hmangaihna chu vervekna tel lovin ni rawh se. Sual lam chu hua ula, tha lam chu pawm tlat rawh u. Unaute hmangaih kawngah chuan hmangaih takin inlainat tawn theuh rawh u; chawimawi kawngah chuan induhsak tawn theuh ula” min ti. (Rom 12:9-10).

Chu chu inneihnaah i lantir em? Kan innneih hma daih khan, hmeichhe hmangaih dan hriain ka inhria a. Mahse hmangaihna chungchang hi engmah ka hre lo a ni tih ka hrechhuak! Kum 40 lai mai kan inneih tawh hnu hian, hmangaihna chuan thleng min siltira, hmangaihna chuan bawlhhlawh min phiah faitir a. Hmangaihna chuan mi dang a dah pawimawh hmasa a ni tih ka hria a ni.

Inzahtawnna lantir hi Krista anna kawnga ṭhanna zel a ni a. I tan leh khawtlang tan inlaichinna nghet zawk a siam dawn a ni.

Ngaihtuah zui atan

* Eng tiangin nge inneihna nghet chuan in khawtlangah a ni emaw a rampum ang zawng pawhin khawtlang ṭha zawk a siam tih i hmuh?

* Kawppui i nei emaw nei lo emaw, eng inlaichinna nge Pathianin i nungchang siam nan a hman? Mi dang hmangaih leh zah turin eng nge i zir chhuah?

* Vawiinah hian i kawppui i hmangaihna leh i zahna lantir ta che. Chu chuan rah ṭha a chhuah ang. Hmangaih leh zah taka lantirna chuan eng rah nge a chhuah? (Kawppui i neilo a nih pawhin, hei hi in chhungkuaah emaw, i room luahpui emaw i thawhpui lakah i lantir thei)

*[Lettu: Sangpuia]*