State Working Committee on Ruihhlo Do thukhawm

Aizawl | 20th June,2022: Vawiin khan State Working Committee on Ruihhlo Do chu an Chairman Dr K Beichhua, Excise Minister hovin a vawikhatna atan SAD Conference Hall, MINECO ah an thukhawm.

Dr K.Beichhua chuan Mizoram chhungah nasa taka ruihhlo a hluar avangin tangrual a, tihtakzeta do let a ngai tih meeting ah hian a sawi a. Vawi leh khatah tihrem vek thei nilo mah se, a hluar lutuk tihziaawm hi hna pawimawh hmasa a ni, a ti a. Sawrkarin a do let tur Working Committee a din chuan theihtawp chhuahin hmalak an tum tih a sawi a ni.

National Survey on Extent and Pattern of Substance Use in India (2019), Magnitude of Substance Use in India report-a a lan danin Mizoram chhungah kum 10 atanga kum 75 inkar mi za zela 7.8 te chuan zu an in a, an zinga 1.1% chuan a ngawl an vei. 3.24% in ganja an zu a, an zinga 0.29% chuan a ngawl an vei. Opiods ti thin hi za zelah 25.67% an awm a, an zinga 3.26% hi ngawl vei an ni. Mizoram chhungah drugs a inchiu thin (injecting drug users) mi 28288 an awm niin survey hian a tarlang bawk.

Vawiin meeting hian State level bakah District tinah Working Committee din ni se, tiin an rel a. District Working Committee on Ruihhlo Do-ah hian DC tin te Chairman ni se, member atan a kaihhnawih department aiawh te bakah tlawmngai pawl hrang hrang te ruat ni se an ti a. Khua leh veng tinah Village Level Task Force din ni se an ti bawk a. Member atan Local Council, kohhran, tlawmngai pawl te leh veng/khaw tinin telh tul an tih ang ruat ni se, heng member kalkhawmte hian an Chairman tur leh hruaitu dang te thlang se tiin meeting-ah hian rel a ni bawk.

Task Force te kaihruaitu tur, an thuneihna leh kalphung tur duang turin vawiin meeting hian action plan & guidelines siam tur committee a ruat a. He committee ah hian Excise Department, police, health, Social Welfare leh Central YMA aiawh te an tel dawn a ni. State Working Committee atanga Village Level Task Force thlenga sum leh pai mamawh tur duanchhin chu vawiin meeting-ah hian thlir a ni bawk a. Budget atan cheng vaibelchhe 7 chu pawm niin hei hi sawrkarah thlen leh tur a ni.

- DIPR