"Kan ram siamṭhat hna thawk a, theihtawp kan chhuah a ngai."
- Tuirial bial MLA K Laldawngliana
Aizawl | June 10, 2022: Mizo Zirlai Pawl (MZP) Sub Headquarters, Thingdawl chuan vawiin chhun khan Community Hall, Thingdawl-ah an khaw chhunga zirlai tiṭha chawimawina an hlan a, Tuirial bialtu MLA K Laldawngliana chuan khuallian niin a hmanpui.
He hun hi MZP Sub - Headquarters Thingdawl president Lalremsiama'n a kaihruai.
Khuallian Tuirial bialtu MLA K Laldawngliana chuan thu sawiin, "Kan ram siamṭhat hna thawk a, theihtawp kan chhuah a ngai." a ti a. Zirlai kalkhawmte chu ram leh hnam hmangaihna nena theihtawp chhuaha lehkha zir a, ram leh hnam tana mi ṭangkai ni turin a chah.
Tuirial Bialtu MLA K Laldawngliana chuan, "Tuirial bial chhung ami Pawl 10, pawl 12, graduate leh PG ah Top 10 a lang pha leh Central services a inziak tling chu Scooty kan pe ang," a ti.
K Laldawngliana chuan, "Hlawhtling tur chuan taimak a ngai a, mi tih baka beih a ngai," tiin, zirlai kalkhawmte chu Krista hre chunga fimkhur taka nun hmang turin a fuih bawk.
Thusawitu dang MZP General Headquarters Assistant General Secretary Chinkhanmanga Thomte chuan, "In hlawhtlinna hi a mai mai lo." a ti a. "He chawimawina hian phutlet a nei," a ti a, "Hlawhtlinna lian zawk chang a, in hlawhtlinna chu kan ram leh khawtlang tana in hman hi he chawimawina hian a phut let a ni." a ti bawk.
Chinkhanmanga Thomte chuan, "MZP chuan All India services / central services kan mamawh zia hriain UPSC coaching a sponsor mek a ni," a ti bawk.
Zirlaite chu lehkhabu chhiar tam a, chhiar zau turin a chah bawk.
He hunah hian pawl 10 leh pawl 12 pass zirlai 45 an chawimawi a ni.
He hunah hian Thingdawl khawtlang hruaitu leh NGO hruaitute an kal bawk.
Post a Comment
He post chungchanga i ngaihdan lo sawi ve rawh: