Kolasib | June 13, 2022: Mizo Zirlai Pawl (MZP) Headquarters Kolasib chuan vawiin chawhma khan Parish Hall-ah zirlai tiṭha chawimawina hun an hmang.
He hun hi Supply Minister K Lalrinliana chuan khuallian niin a hmanpui a, MZP Headquarters Kolasib vice president R Lalmalsawmzuala chuan a kaihruai.
Khuallian K Lalrinliana chuan, zirlai kalkhawmte chu hlawhtling tura theihtawp chhuaha bei turin a chah.
Kolasib bialtu MLA ni bawk Pu K Lalrinliana chuan board exam result chhuaka zirlai pass zawng zawngte a lawmpui thu a sawi a, an kal zelna turah duhsakna a hlan tih a sawi. Hemi rual hian sorkar hna in mitin a daih loh avangin zirlaite chu sorkar hna tinzawn vek lo turin a chah a, sorkar hna ah hausakna a awm lo tih a sawi. Zirlaite chu puitlin lam pan zel tura chahin vote thlak thei chin, kum 18 tling tawhte chu puitlinga chhiar an nih tawh avangin an kawng zawh tur pawh rilru fim tak pu chunga thlang thei an nih thu a sawi a, tum mumal tak nei tur leh chumi ti hlawhtling tur chuan rilru nghet tak neih a tul thu a sawi bawk.
Supply minister chuan Mizoram chu India ram state-ah intodelh lo ber zinga mi a nih thu a sawi a, kan buhfai mamawh zawng zawng 90% aia tam chu state pawn atanga kan lakluh a ni a, kan mamawh dang dang pawh pawn lam atanga kan lakluh deuh vek a ni tiin zirlaite chu intodelhna kawnga ngaihtuahna tak tak seng turin a chah a ni.
Thusawitu MZP General Headquarters Assistant General Secretary Chinkhanmanga Thomte chuan, "He chawimawina buatsaih hian Phutlet a nei," a ti a, "hlawhtlinna sang zawk chang turin kan phut che u a, ram leh hnam tana in thiam leh finna te hmang let leh turin kan beisei che u a ni." a ti.
Hun hmanpui tura rawn kal Pu Chinkhanmanga Thomte, Asst Gen Secretary, MZP General Hqrs chuan zirlaite chu ram nghahfak an nih avangin tun atanga inbuatsaih sauh sauh turin a fuih a, zirna ti bahlah thei zuk leh hmuam bakah ruihtheih thil laka in sum turin a chah a ni.
MZP Headquarters Kolasib president C Lalruatdika chuan, "MZP chu zirlaite leh ram leh hnam tana ding a ni a. A ṭul angin hma a la ṭhin a, Lar leh hmingṭhat khelin thil a ti ngai lova, kan pawl thil tum milin a kal mai ṭhin." a ti.
Zirlai tiṭha chawimawina hunah hian zirlai 134 hnenah chawimawina hlanin, heng zinga 14 hi pawl 10 pass niin, pawl 12 pass thar hi 120 an ni.
Zirlai titha chawimawina hunah hian school sawm bik thenkhata zirlaite an tel a, pawl 10 distinction-a pass chin mi 14 bakah pawl 12 naupang, first division leh a chunglama pass mi 116 te hnenah lawmpuina — memento, pawisa fai leh Pu Lalhruaitluanga lehkhabu ziah 'Zirna Kailawn' te chu pek vek an ni.
Post a Comment
He post chungchanga i ngaihdan lo sawi ve rawh: