FOREST MINISTER-IN KEILUNGLIAH LUI KHUAH HMALAKNA TLAWHIN A ENFIAH

Champhai, the 3rd June, 2022: Environment Forest & Climate Change (EF&CC) Minister Pu T.J. Lalnuntluanga chuan vawiin chawhma khan NLCPR kaltlanga Champhai khawpui kianga lui luang Keilungliah tuikhuah hnathawh mek tlawhin hmalaknate a enfiah.


Pu T.J. Lalnuntluanga chuan Champhai khawpui leh a chhehvelte tan mai nilo Mizoram tana chhenfakawm tak ni tur hmasawnna ruhrel lian tham tak Keilungliah lui khuah hna kalpui a ni chu lawmawm tiin, a puitlin theih nana Sawrkar hmasa atang tawha hmalaknate leh thahnemngai taka kalpui chhunzawm zel a ni theite chu fakawm a ti a. Theihtawp chhuaha hmalatu Department Officer, an thawhpuite leh hnathawkte chhuanawm a tih thu sawiin, sawrkar chuan Policy a siam a, a taka tihlawhtling tura beitu department official-te inpekna, khawtlang hruaitute hmalakna leh thahnemngaihnaah lawmthu a sawi bawk.

Kan ramin hmabak eng tak a neih thu leh hmasawnna rahbi zawh kawngah hun khaihlak leh inlumlet lai tawng mek thu sawiin, kan zavaia theihtawp chhuaha kan thawhho zela kan mawhphurhnate rinawm taka kan hlen zel chuan hmabak eng tak kan nei dawn a ni, a ti a. Mipuite chu rilru sukthlek dik leh ngaihtuahna dik nei tura chahin, Keilungliah lui khuah hmasawnna ruhrel lian tak ni tur chuan a eng zawnga thil thlirna leh neitu nihna nena enkawl duhna thinlung mipuiah tuh ngei se a duh thu a sawi a. Hnathawktu leh viltute chu ram leh hnam tana rotling, tlo leh chhawrnahawm tak siam a nih theih nana thahnemngai taka hna thawk chhunzawm zel turin a chah nghal bawk a ni.

Non Lapsable Central Pool of Resources, NLCPR (DoNER) kaltlanga cheng nuai 1,988 (cheng vaibelchhe 19.88) senna tur Champhai khawpui sira luang Keilungliah Lui khuah (Construction of Dam Reservoir and Development of Recreation Centra at Keilungliah, Champhai) hna hi tunah hian hna za zela 94 (94%) vel zo tawh anga chhut a ni a. Lui khuah san zawng hi metre 20 niin, tunah hian a chung khuah hungna leh vawnbante siam mek a ni. A bulthut khuah chhah zawng hi metre 14 niin, zuih chho zelin a chhipah metre 4 a chhaha khuah a ni a. A bulthut khuahna thui zawng hi metre 54.61 niin a chung lamah chuan metre 102.60 a ni a. A panna kawng leh fankual velna tur kawng pawh ruahman tel a ni. Kum 2018 atanga bultan Keilungliah khuah hna March, 2020 a zawh tur ni mah se rokhawlhna a awm avangin hun tiam chhunga zawh hman a ni lova, kum hnih atan pawhsei leh a ni. Hun bituk chhung hian tuikhuah siamfel mai bakah hian project kentel dangte pawh siam tel tum a ni.

Keilungliah Dam khuah mek hi sq.m 1,34,826.42 a zau ram tuam tur leh tui litre nuai 32,000 tlinna tura ruahman niin, Champhai khawpui tui mamawh phuhruk nan leh leilet phaizawl buh leh bal chawm nante, khualzin hipna tur, Sangha khawina leh Champhai khawpui timawia boruak lum tiziaawm thei tura ruahman a ni.

Minister Pu T.J. Lalnuntluanga hi Pu James Lalrinchhana, District Bawrhsap; Pu Lalrinpuia Varte, SP; Er. C.Lalhmachhuana, SE PHED; Pu Lalduhthlana, DFO; Pi R. Lalnunkimi DUDO, Er. ZD Dengthuama, EE, PHED; Sawrkar Official dangte, Sub-Hqrs YMA hruaitu leh khawtlang hruaituten an tawiawm a ni.

Environment Forest & Climate Change Minister Pu T.J. Lalnuntluanga, Champhai South bialtu MLA ni bawk chuan vawiin vek khan a bial chhunga zirna in pahnih; Govt. Vengthar Middle School leh Govt. Vengthar Primary School-te a tlawh a. A bial chhung zirna ina Zirtirtu indaihlohna leh mawmawhnate hriain sawrkarin class room daih Zirtirtu a dah a, indaih zawk neih a nih theih nante, mamawh leh tul dangte pawh a tahtawlin ngaihtuah zel a ni ang, a ti a. Khawtlang nun siam that leh mihring nun insiam chhoh nana hmun pawimawh tak Sikul tihchangtlun nan theihtawp chhuah a nih thu sawiin, hnam ziarang leh zonun zemawi chawinun kawngah thangtharte zirtirna tam zawk pek kawngah theihtawp chhuah zel turin Zirtirtute a fuih a ni.
 
- DIPR

Post a Comment

0 Comments