Ticker

10/recent/ticker-posts

7th Tuivawl Constituency MLA Cup 2022, Darlawn Zone FA ah Pehlawn khua an thiam ber

Aizawl | June 1, 2022: 7th Tuivawl Constituency MLA Cup 2022, Darlawn Zone Football Association in a buatsaih, vawiin chhun dar 12:00 khelhah Pehlawn VC team chuan Darlawn Vengpui VC hnehin an champion.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

June 6 hian Sakawrdai  Zone Football Association chhunga champion Sakawrdai VC Team nen Grand Finale an khel leh ang.


VC Team pahnih inkhelah team tha zawka ngaih Darlawn Vengpui VC ten inrintawkna an nei nasa hle a. He tih mek lai hian Darlawn Zone Football Association hnuaia inelna reng renga Champion la ni ngai lo Pehlawn VC team ten chak ngei tumin an ni aia khawlian Darlawn an pan a. Pehlawn khua hian Champion an tuma, an khawchhunga motor nei zawng zawngin motor thawhkhawmin, inkhel enturin an in phur phei a. Chak ngei tumin an khaw tlangval inkhel an en a, an auva, a tawpah 7th Tuivawl Constituency MLA Cup 2022, Darlawn Zone Football Association chak ber nihna an hawn ta a ni.


Inkhel tan a nih phat atangin mipui thawm a that ang bawkin field chhungah chak zawk nih duhna pawh a lang nghal reng a. Team pahnihte danglamna chu Pehlawn VC team te an tuan a tha zawk a, player fitness ah an sang zawk tih alang thei. 

He ti a nih mek lai hian Darlawn Vengpui VC team te hian first half ah goal khung theihna hun an nei a, minute 20 na a kal mek laiin Vengpui VC team forward jersy 11, Lalduhsaka chuan Pehlawn VC team defender a tlan pel vek tawh a. Goalkeeper chauh a hmachhawn  tawh hnuin goal ding lamah petin hei hi keeper in a lo dang hman a, Vengpui VC team tan vanduaina hmahruai a ni.

Darlawn Vengpui VC teamin an hun tha an hlah hnu lawk minute 30 na a kal mek laiin Pehlawn VC Team in freekick an hmu a. Goal post atanga Yard 35 vela hlaah ball awmin, Vengpui VC team in freekick dan nan mi pathum an din tlar tir a. Chutiang anga hlaah chuan Ball rawn kal chak tak pawh a muang hman viau tawh tur a ngaih a ni. Pehlawn VC team atangin Jersey no.6, Lalfakzuala a rawn ding chhuaka, ball a chhuih nghal. Vengpui VC team goal keeper in a wall siam a chhawr tangkai laiin a mah zawkin tihsual a nei. Darlawn Playground  phullem phah a ni lo a, vaivut nawi chu ball ah kaiin khawchhe kara inkhelah ball chu man ngheh theih a ni lo tih a hre lo a ni. Yard 35 atanga ball lo kal chu a lo dang ngei a, mahse, ball chu a per a, a man nawn tumna lamah an mahni lamah a hui lut ta. Pehlawn VC Team in 1-0 in hma an hruai phah ta a ni.

Darlawn Vengpui VC team hian an si phurh rulh let tumin an nawr na hle. Nidanga khel tha thin defending line in tihsual an nei zauh zauh a, Pehlawn lamah chance an nei zauh zauh bawk. Hetih mek lai hian Vengpui VC team goal bawhtu ber Lalduhsaka nidang a pha lo a, Pehlawn VC Team defender hmaah a talna tawk thei lo hle.


Second Half khelh tan a ni a. Pehlawn VC Team coach Zodinsanga chuan game a rawn tidang lama, hun hmasa lama goal khung tura nawr vak vak kha tul a ti tawh lo. Ball kal fal bawh turin mi pathum chiah tlar hma lamah a din hma tir a. Midfiled te chuan defending line an pui ta bawk.

Darlawn Vengpui VC Team hian siphurh sut let tumin an nawr na hle. Minute 65 na  a kal mek laiin Pehlawn VC Team in penalty an chawi a. Darlawn Vengpui VC Team atangin first half a chance lo nei tawh Lalduhsaka bawk a rawn ding chhuaka. Pehawn Goalkeeper Niropuia a in ring tawk hle. Whistle a rik tuarh rualin Pehlawn keepe dinglamah Lalduhsaka hian pet a vanduaina belhchhah turin cross bar a pet per. Pehlawn VC Team lamin 1-0 in hma an hruai chhunzawm zel a ni.

Pehlawn lamin an goal khat neih hum him tumin a bei nasa hle. English Primier League chu nise, Bus an park, an ti ngei ang. Game fing tak an khelhah Darlawn Vengpui VC teamin goal an thun thei lo a, huntiam a zawha, minute 5 hun pek belh a nih thlengin thildanglam a thleng lo, thildanglam thleng awmchhun chu hun tawp khar nan Whistle a rik fan raih a rik ruala, Pehlawn khaw tlangval chak vanga au leh, Pehlawn khaw mi zawng zawng chak lawm vanga ring thei ang ber au chu a ni. 

A vawi khat nan  Pehlawn khuaah Football atanga an hlawhchhuah 7th Tuivawl Constituency huam chhunga Zone pahnih chhunga khelh, MLA Cup 2022 Cup, Darlawn Zone Football Association in a buatsaih ngaihhlut ber champion nihna an hawn ta a ni. Ni 6, June 2022 ah Sakawrdai  Zone Football Association chhunga champion Sakawrdai VC Team leh Pehlawn VC Team te hian Sakawrdai Sport Complex ah  Grand Finale an khel leh ang.

Pehlawn VC Team 1 - 0 Darlawn Vengpui VC Team
Goad Score :  Own Goal
1.Best Player  - Lalfakzuala Jersey No.6, Pehlawn
2. Best keeper - Niropuia Pehlawn
3. Top Scorer - Lalruatsanga Jersy no 7 Pehlawn
4. Fair play team - Sunhluchhip Vc team









Post i hmuh dan

Post a Comment

0 Comments