FEATURE | MZU Varsity Miss 2022 Papuii

Mizoram University (MZU) Varsity Miss 2022 Papuii i lo belchiang ang.


Papuii tia hriat hlawh Hmingthansangi hi Zoramthangi leh C Lalhmingthanga te fanu niin June 7, 1999 khan a piang a. Unapa pali zinga upa ber dawttu a ni a. An unau hi mipa 2 leh hmeichhia 2 an ni.


Papuii hi te hi Durtlang Leitan a cheng leh khawsa an ni a, Presbyterian Church of India kohhran a lawi an ni.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Papuii hi ft 5'4 a sang niin, insawizawi, lehkhabu chhiar leh hla ngaihthlak chu a nuam tih zawng a ni.

Papuii'n EXPLORE MIZORAM zawhna a chhanna te i lo thlir ang.

📌 Zirna lam:
- Pawl 10 leh 12 hi Mount Carmel School, Chaltlang aṭangin ka zo a, B.A hi 2020 khan Pachhunga University College aṭangin ka zo leh a, tunah hian Mizoram University ah MA Economics ka zir leh mek a ni.


📌 I duhzawng leh ngainat zawng hrang hrangte?
• Lehkhabu: Duh chu ka ngah lutuk. mahse The Alchemist by Paulo Coelho hi ka tan a hlu zual khawp mai.
• Actor/Actress: Meryl Streep, Jim Parsons, Rachel McAdams
• Zaithiam: Zayn Malik, Joji, Paul Klein
• Chawhmeh: Arsa leh thlai lam hrim hrim.
• Hla: Pathian Hmangaihna - Maruati
• Hmun: Kan in (a bikin ka room)
• Rawng: A dum leh a var.
• Ziaktu: Dan Brown


📌 Mize ngainat zawng: Nihna ang ang a lang ngam, mi thatna lai zawng tlat tu, mi hriatthiamna ngah, mi hlim thei.

📌 Mize ngainat loh zawng: Mi chapo leh thukna nei lo.

📌 Kawppui tura duhzawng?
- Mahni inringtawk leh ka mize milpui, ka kawmngeih deuh tur.

📌 Relationship status: Single

📌Aim in life: Ram leh hnam mamawhna tak tak phuhruk thei tur khawpa mi ṭangkai.


📌 Varsity Miss 2022 thlanna a tel chhan?
- Department lamin min ring tawk a, mawhphurhna ka ko a an nghah te hlenchhuah ka duh avangin 

📌 Varsity Miss 2022 nih hi i inring reng em?
- Ring lo lutuk

📌 Varsity Miss 2022 in I nuna nghawng a neih?
- Mahni invawng a, nungchang mawi leh entawn tlak tak neih a, he title hi hun lo kal zel tur a midangten an lo hlut deuh deuh theih nan, awmze awm tak leh zahawm tak a vawn duhna thinlung min pe. Ka nun hrim hrimah hmasawnna nasa tak min pe.

📌 Varsity Miss tih loh hi miss ah thlan i ni tawh reng em?
- Aw, Pathian hruaina zarah kum 2019 khan Pachhunga University Collge Miss-ah min lo thlang tawh

📌Varsity Miss thlan dan tlangpui leh zirlaite'n an ngaihpawimawh dan:
- Kar khat chhung tawp inbuatsaih nan hun kan hmang a, rim takin kan thawk bawk. Zirlaite pawhin an hlut thiam em em a, an phurin a tih ni ah pawh mi thahnem takin an rawn chhim a ni.

📌 Modelling lam hi i tui reng em?
- Tui hran lo.



Zawhna dang:::
1. A tel lova i awm theih loh:
- Ka chhungkua leh thiante

2. I nun kaihruaitu:
- Pathian thu

3. Hringnuna i hlauh ber:
- Ka hmangaihte an nat ka hlau ber

4. I tih ngai miah loh tur:
- Mahni indahsan leh midang hmuhsit

5. Mizo Tualzal nuna ṭha i tih:
- Tlawmngaihna leh inlungrualna

6.  Quote i duh ber: 'Be you, always.'

7. Mizoram leh Mizo tualzal nuna Mizo hmeichhiate dinhmun:
- Hmanlai ngaihtuah chuan tun a kan Mizo hmeichhiate dinhmun hian hma a sawn tawh viauin ka hria. Chutih rualin hmeichhia an nih avang mai a inngihnepna te hi hmuh tur a la awm fo avangin hmasawnna tur tam tak a la awm a ni.

8. Hnam hmingṭhat leh hmingchhiat kawngah Hmeichhiate'n mawhphurhna:
- Hnam hmingthat leh hmingchhiat kawngah hian kan zavai hian mawhphurhna sang tak kan nei a.
Hmeichhe mawhphruhna lam kan sawi dawn chuan hmeichhia te hi ho te a hmingchhe mai thin kan nih avangin kan awmna hmun a zir zelin mahni nun uluk a, invawng a, zahawm tak a kan awm a tulin ka hria. Tin, kan thiltih apiangah mahni inringtawk a, thawkrim a, hma kan sawn deuh deuh hian kan hnam kan chawimawi thin in ka hria.

9. Hnam ziarang chawinun kawnga Hmeichhiate mawhphurna:
- Hmeichhiate hi chhungkaw khaikhawmtu leh fa hring a, fate enkawltu an nihna laiah hnam chawrchhuahna leh hnam kalphung, hnam zia leh hnam humhalh kawnga fate zirtir hi hnam ziarang chawinun kawnga Hmeichhiate mawhphurna chu niin ka hria.


10. Mizote tan 'Fa neih tlem' inzirtir hi a ṭulin i hria em?
- Mizote hi tam tia sawi tur kan la nih loh avangin 'Fa neih tlem' hi inzirtir tulin ka la hre lo.

11. Mizo hnam ṭhanmawh bawk nia i hriat?
- Thawhrim leh hrehawm hmasak kan hlauhna leh peih lohna avanga a tak ram thlen hma a beidawnsan mai te, nawmsak vat vat duh avanga dik lo tak a sum lak luh mai hreh lohna te, diklo tak a midangte chanpual tur chhuhsak kan hrehlohna te hi kan hnam thanmawh bawk chu niin ka hria.

12. Mizo hnam damna atana  kawng awm nia i hriatte?
- Rim taka thawk a, rinawm tak a mahni hmachhawp leh tihtur te ti chung zel a, midangte tan malsawmna nih tum fan chungin, kan rilru hlimna tur um thiam zel chung leh ram hmangaihna tak tak nei chunga ke kan pen chuan kan hnam hian a dampui ang.  

13. Hnam chhan nana Hmeichhiate ṭangkaina leh mawhphurna?
- Hmeichhia te hi in fuih tawn ila, in support tha ila, in chawimawi thiam in inlungrual bawk ila.
Tin, chhungkaw enkawlna kawngah mi tha tak chher chhuak thei turin bei ila. Hei hian nasa takin hnam chhana kawngah min pui ngei ang.


14. Zirna, Khawtlang leh Kohhran hi?
- Zirlai tan chuan kan zirlai tha taka kan zir hian khawtlang leh kohhran a kan mawhphurhna kan hlenchhuahna a niin ka hria. Chutih rualin Khawtlang leh Kohhran te hi ram leh hnam min suihkhawmtu, chhiatni thatni ah pawh kan belh berte an ni a, an hlut zia hriat a, theih ang ang a hun pek thiam pawh a pawimawh viau bawk in ka hria.

15. Khawtlang, Kohhran leh nangmah:
- Pawl 12 thleng kha chuan ka zirlaiah in concentrate ka duh avangin Kohhran leh Khawtlangah ka inhmang mang lova. A hnu lamah hi chuan zirna piahlamah hun remchang ka neih apiangin ka theih ang ang in ka inhmang ve.

16. Social Media leh Nangmah:
- Social media hi a khawih tlem pawl tak ka ni ti ila ka sawi sual lovang. Hun awl neih changa han khawih ve te leh ka zirna a min pui thei thil te a nih loh chuan a hranpa in ka khawih lo. 

17. Mizoram ṭhalai tam tak tlakchham:
- Kan thiamna leh theihna te lanchhuahtirna tur platform te, kan thiamna milpui hna leh opportunities te hi kan tlachham in ka hria. Chutih rualin thalaite pawh kan thiamah chiang ila, mahni kalna kawng ro ro ah chuan mi laktlak tak nih tum lehzual ila ka ti bawk.

18. Mizo ṭhalaite hian ngaihsan tur dik an ngaisangin i hria em?
- Hmasawnna tur tamtak chu awm mahse, kan thalaite hi an fingin thil tha leh tha lo an thliar thiam em em tawh a, an ngaihsan zawngah an chiangin awmze thuk tak neiin mi an ngaisang tawhin ka hria. Hetah tak hian tunge an ngaihsan tih lam aiin an ngaihsan chhan hi kan tehna tur niin ka hria.

19. Ngaihsan tur dik nia i hriat:
- Mi tupawh, a chhungkua, a thenawm emaw a thiante, amah hrechiangtu tawh phawt ten a an ngaihsan mi chu mi ngaihsanawm dik tak a niin ka hria.

20. Hlawhtlinna tura pawimawh:
- Thlen chin atang zela hmasawn leh malsawmna chhiar thiam.

21. hloh i hlauh ber: Ka inrintawkna

22. Zo hnam inpumkhatna hi a thlen theih i ring em? Thleng thei turin engnge pawimawh nia i hriat?
- Ring tehreng mai. Tin, a ṭul hunah chuan kan inpumkhat viau thin bawkin ka hria. Tun aia kan inpumkhat lehzual nan chuan hnam pum huap intihhlimna leh inelna te, intlawhpawh tawnna leh insumdawn tawnna tih hmasawn zel te hi a pawimawh in ka hria.

23. Hnam dang nupui pasal neih hi:
- An inhmangaih phawt chuan a pawina ka hre lo. Chutih rualin dan leh dun ramin alo duan sa te zawm that hi ngaih pawimawh a, fate hnena hnam ziarang hrilh hriat te hi a pawimawh ka ti.

24. Nupui pasal neih hmaa mipat hmeichhiatna hman hi:
- Hemi issue hi chu tumah kan in sawi sak thei lo a. Keimah bikah chuan nupui/pasal tur te tan chauh a invawn thianghlim hi ka duhthusam a ni.


EXPLOREMIZORAM.COM i hmuh dan:
- Mi tin te tan thuziak ṭha tak tak te leh min hualveltu thil thleng te awlsam taka, mahni ṭawng ngei a chhiar tur a lo awm ṭhin hi a ṭha ka ti. Keep it up!





[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)



Post a Comment

0 Comments