Nausen thi (Infant Mortality Rate) tlemna ber Mizoram

Aizawl | May 27, 2022: Sample Registration System (SRS), Government of India in SRS Bulletin, May 2022-a tih chhuahah Mizoram chu kum 2020 chhunga Nausen kum khat hnuai lam thih tlem berna state a ni.

Nausen kum khat hnuai lam thi zat tehna hi Infant Mortality Rate (IMR) tih a ni a, chumi awmzia chu Nau piang 1000 zela nausen thi zat atanga teh a ni. Nikum SRS bulletin 2021 chhuakah khan Mizoram leh Nagaland chu nausen kum 1 hnuai lam thih tlem berna state ve ve niin, IMR chu 3 a ni a. Tun kumah erawh chuan Mizoram chauh hi IMR 3 awmchhun a ni ta a, a zawnin India rama nausen thi tlem ber nihna kan hauh a ni. Mizoram dawtah hian Nagaland – 4, Sikkim leh Goa – 5 ten an dawt a ni. Hetih lai hian India ram pum IMR chu 28 a ni.

Sample registration system (SRS) report atanga a lan danin kum tina Mizoram IMR chu hetiang hi a ni. Kum 2016 ah 27, 2017 ah 15, 2018 ah 5 leh 2019 ah 3 leh kum 2020 ah 3 a ni.

Infant Mortality Rate (IMR) hi ram pum leh state chhung mipui nawlpui hriselna dinhmun tehfung (indicator) pawimawh tak a ni a. Health & Family Welfare department chuan India ram pum huapa a ti tha ber nihna kum zawna hauh tur leh IMR hniam theihna tur hian National Health Mission, Health and Family Welfare Department hnuaia a programme enkawltu Reproductive and Child Health (RCH) programme bakah Health Department hnuaia thawktu hrang hranga te inpekna leh Department danga an thawhpui WCD, SWD, Education, PHE, leh RD etc te nena thawhhona that vangte, mipui te nena thawhhona that vanga te a he hlawhtlinna duhawm tak hi nei thei an nih avangin lawmthu an sawi a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post