MZP-in Book of the year dawngtute chawimawina hlan dawn; MZP Federal Council May 20-ah

• Inter School Chess Championship leh Inter HSS Volleyball Tournament buatsaih dawn!




Aizawl | May 7, 2022: MZP General Headquarters chuan Executive Meeting vawi 607-na chu nimin khan MZP Conference Hall-ah an nei a. Inter School Chess Championship neih chungchangte, Inter Higher Secondary School Volleyball tournament buatsaih chungchangte, Book of the Year dawng tawhte chawimawina neih chungchang leh pawl chhung thil pawimawh hrang hrang an rel a. MZP rorelna sang ber dawttu Federal Council Sitting neih tura Agenda an thlifim bawk. Meeting hi Pu Lalnunmawia Pautu, Presidentin a kaihruai. 

MZP chuan Inter-School Chess Championship chu Mizoram Chess Association nen tangkawpin buatsaih an rel a. Kum 2019 pawh khan MZP leh Mizoram Chess Association tangkawp chuan zirlaite chess hmanga inelna hlawhtling takin a lo kalpui tawh a ni. Hemi bakah hian MZP hian hun remchang hmasa berah Inter Higher Secondary School Volleyball tournament buatsaih an tum bawk a ni.
Mizo zirlaite'n lehkhabu ziak leh chhiar lama hma kan lo sawn a, ziakmite ngaihhlut nachang kan hriat zel theih nan, MAL Book of the Year dawng tawhte chawimawina leh an puala hun buatsaih a rel a. Mizoram sawrkarin zirlaite'n Mizo tawng zirna kawnga hma an sawn leh zual theih nana Mizo Supplementary Reader- ZO NUN, pawl VI, VII, VIII-te zir atan a siam hi MZP chuan lawmawm a ti hle a. Hei hian Mizo nun dan, Mizoram chanchin leh a chhunga chengte hriatchian lehzualna a thlen dawn avangin Mizoram sawrkar chungah MZP chuan lawmthu a sawi.

MZP rorelna sang Federal Council Sitting ni 20th May, 2022 (Zirtawpni) a neih tura Agenda lutte thlifimin, agenda 9;
1. Mizoram zirnain hma a sawn theih nan, sawrkar school leh college zirtirtute leh zirlaite awm dan zirchian a hmalak ni rawh se.
2. National Institute of Open School (NIOS) hnuaia zirlaite harsatna, Fees leh Result chungchanga sutkian anih theih nan hmalak ni rawh se.
3. Mizoram sawrkarin school zirtirtu, Transfer & Posting Rules a neih mek hi, ataka hman anih theih nan MZP in hma la rawh se.
4. Sawrkarin zirtirtu hna a lakah hian, tling leh tlak (Qualified) ngei lak anih theih nan MZP in hma la rawh se.
5. Mizo mipuite'n eirawngbawlna Gas Subsidy chungchangah harsatna an tawk fova, chinfel a nih theih nan hmalak ni rawh se.
6. Sawrkar hna thar lak reng rengah dik taka lak anih theih nan MZP in hma la rawh se.
7. MZP Danbu (Constitution) ennawna siam that ni rawh se.
8. MZP Headquarters, Sub - Headquarters leh Branch te hian chanchinbu an tihchhuah theuh theih nan hmalak ni rawh se.
9. MZP Headquarters, Sub-Headquarters leh Branch te ramri (Demarcation/Area) hi MZP General Headquarters-in ennawn in siam rawh se.  

te chu MZP Federal Council Rorel a ngaihtuah turin an pawm a ni.

Post a Comment

He post chungchanga i ngaihdan lo sawi ve rawh:

Previous Post Next Post