Minister lalruatkima'n Kawrtethawveng BDO office Complex tur tlawh

Aizawl | May 27, 2022: Pu Lalruatkima, Hon'ble Minister, Rural Development, Land Revenue & Settlement leh Information & Public Relations chuan vawiin khan Kawrtethawveng BDO Office Complex hmunhma tur enfiahin a tlawh.

RD Block siamthar lawmna puala inkhawm BNRGSK Hall-a neihah Minister chuan thu sawiin Kum 30 dawn kan hruaitu hmasa, khawtlang hruaitu leh tlawmngai pawl hrang hrangte'n nasa taka an lo sual tawh RB Block kan nei ta chu a lawmawm hle a, chutihrualin he hun nghakhlel taka lo thlirtute mualliam tate erawh kan rilruin a hrereng a ti. Kawrtethawveng RD Block chu Kawrtethawveng ta tur chauh nilo-in a chhehvel khaw 21 te nena intawm tur a ni a, khaw neitu rilru erawh thiam taka pu tur leh mikhual a chhia a tha thiam taka dawngsawng tur erawh chuan kan inbuatsaih a tul thu a sawi. RD Block hmun tur mimal ram neitute'n an ram phal taka an pe chu a lawmawm hle a, ram enfel a nih chuan hna tan tura Sawrkar a inpeih fel tawh thu a sawi bawk.

Minister chuan Zofate'n Development khairual taka kan dawn theihna turin mihring pung zawnga kan kal a ngai a, tunah chuan kan Birth rate aiin Death rate a sang zawkin a langa, hei hi a pawi hle a, fa neih tam lama tan la thara nupui/pasal kum upat lutuk hmaa kan neih chu mihring kan pun chak lehzual nana a tangkai dawn thu a sawi bawk. Kawrtethawveng Village Organisation ( SHG) te tana puanthui khawl semchhuah chu a petu Sawrkar rilru hrechunga midangte chawikan leh dawmkan nana hmang turin a chah bawk. Kawrtethawveng RD Block chu hmathlir thui tak neia kan tu leh fate tana Sorkarin tul a tih avanga din anih thu sawiin Zawlnuam RD Block huam chhungah khaw 56 lai mai a awm thin avangin scheme hrang hrang enkawlna kawngah harsatna a awm thin avangin Kawrtethawveng Block neih a tul thu a sawi bawk.

BDO hmunhma tur atan hian mimal huan ram pe phal mi 3, Pu Biakliantluanga, Pu Rothanmawia, Pi Lalrintluangite awmin heta tang hian thlanchhuah leh a ni dawn a. Kawrtethawveng RD Block din thar turah hian Mizoram Sorkar Notification angin khaw 21 a huam ang.

RD Block Complex atana mimal ram pek Kawrtethawveng Chhimlam ramte hi Minister hian a hmunah tlawh nghalin, hmunhma atana tha ber tur helama mithiam zawkte ne'n enfiah zui nghal a ni bawk.

Minister hian MzSRLM hnuaia Kawrtethawng Village Organisation (VO) chhunga SHG te tlawh nghalin VO Apparel Unit tan Puanthuikhawl 5 a sem nghal a. SHG hi June Ni 30, 2017 a din tan niin Kum 2022-ah SHG Group 24 awmin Members 205 an awm mek a ni.

Kawrtethawveng SHG hi dinhmun harsa zawk leh rethei zawkte'n nasa taka chhawrin hlawhtlinpui mi thahnem tak an awm tawh a. Community Investment Fund cheng Nuai 29 leh Sing 6 dawng tawhin Bank Loan hi Nuai 20 chuang lak a ni tawh bawk a ni.

Vawiin Programme hi Pu Ngulzathuama, BDO Zawlnuam chuan kaihruaiin Pi Irene Zohlimpuii Chawngthu, Jt. Secy, Rural Development Department leh Pi H. Lalchhandami, CEO, Mizoram State Livelihood Mission te'n thu sawina an neia, Pu Ramthianghlima, VCP Kawrtethawveng chuan lawmthusawina a nei bawk.

Rural Development Minister hi Pi Irene Zohlimpuii Chawngthu, Jt. Secy, Rural Development Department, Pi H. Lalchhandami, CEO, Mizoram State Livelihood Mission, Pu K. Lalhmuakliana, Jt. Director, Rural Development Department, Pu Zoremthara Ralte, Deputy Secretary, Rural Development Department bakah Officials dangte'n an tawiawm a ni.

- DIPR