Ticker

10/recent/ticker-posts

MADC-ah sorkarna siam turin Congress in eng party mah thawhpui tum lo!

Aizawl | May 14, 2022: Congress Party chuan vawiin khan Aizawl Press Club ah Thutharthehdarhtute kawmin MADC inthlan neih zawh takah sorkar siam turin eng party mah thawhpui an tum loh thu an tarlang.




Congress Party chuan, "Congress Party chu MDC 4 chauh nei kan nih avangin Mara mipuiten opposition a thu rih turin min duhah kan ngai a, mipui tam zawk duhthlanna hi a zahawm kan ti a ni." tiin an tarlang bawk.


*MADC-A SORKAR SIAM CHUNGCHANG*

Mara Autonomous District Council inthlan neih zawh takah sorkarna siam tura MDC 13 neih a ngaih laiin majority nei thei kan awm lo a,  BJP-in seat 12, MNF-in seat 9 leh INC-in seat 4 kan la a ni. Hetianga sorkarna siam thei kan awm tak loh avang hian BJP leh MNF Party chuan sorkarna siampuiah Congress Party min sawm ve ve a.  Amaherawhchu, Congress Party thuneitu sang, Political Affairs Committee-in ngun taka a ngaihtuah hnuah eng Party mah thawhpui loh nise a ti ta a ni.

Congress Party leh BJP-te hi India rama political party lian ber leh inep na ber pahnih, policy pawh inang lo kan ni a. BJP chu sakhaw tih bik nei a nih laiin Congress Party chu sakhaw tih bik nei lo, sakhaw tin leh hnam tin lenna a ni. Chuvangin, BJP nena sorkarna siam dun hrim hrim hi thil tih chiah kan ngai lo. Tin, MNF nen MDC 13 chiah chiah neia sorkarna siam theih niin lang mah se, Autonomous District Council-ah  hian thlan tlin uirete hremna dan, Anti-Defection Law a awm ve loh avangin awlsam taka pheh thluk theih reng a ni dawn a. Congress Party hian thuneihna chan ngawr ngawr hi a tum a ni lo a, sorkar tha siam hi kan tum ber a ni. Sorkar tha lo leh nghet lo tak siam ai chuan opposition a awm rih hi a tha zawkah kan ngai a ni.

BJP leh MNF Party-te hi Central lamah BJP kaihhruai NDA leh NEDA hnuaia thawk ho sa, sam inphiar zawm sa reng an ni a, chuvangin, MADC-ah pawh hian awlsam takin an thawk ho mai turah kan ngai a, an tan thawhdun theih lohna tur a awm kan hre lo. MADC-ah hian sorkar nghet tak leh sorkar tha tak ding se tih hi kan duh takzet a, chutih rualin, Congress Party chu MDC 4 chauh nei kan nih avangin Mara mipuiten opposition a thu rih turin min duhah kan ngai a, mipui tam zawk duhthlanna hi a zahawm kan ti a ni.

Congress MDC 4 – Pu H. Malvyna, Pu H. Hrangchuanga, Pu TA James Riatha leh Pu ST. Vanmalsawmliana te hi kan chhuang takzet a, Congress Party thuneitu sangte thutlukna zahthiam taka, retheih pawh huama a tha zawk beiseia an inhlanna hi a ropui kan ti. Duh duh a namthluk theih leh kawih her theih sorkar siam duh lo a, anmahni mimal hamthatna tur thlemna nasa tak tlansana Mara ram tana an inhlanna hi Autonomous District Council inthlanah chuan thil entawn tlak leh chhinchhiah tlak berte zinga mi a ni. Chuvangin, Congress Party leh Congress MDC 4-te inhlanna hi Mara ram mipuite leh Mizoram mipuiten an hriatthiam kan beisei takzet a ni.


Issued By – Mizoram Pradesh Congress Committee
14th May, 2022  1 : 00 PM @ Aizawl Press Club

https://www.facebook.com/108500111075991/posts/460264835899515/
Post i hmuh dan

Post a Comment

0 Comments