Human Resource Development Board Vice Chairman-in Thu leh hla intawhkhawm hunpui hawng

Aizawl | May 27, 2022: Vawiin ni 27 May, 2022 dar 10:00 khan Govt. Hrangbana College Conference Hall-ah Thu leh hla a intawhkhawmna hunpui (College level Poetry Festival) hawnna neih a ni a, Human Resource Development Board, Vice Chairman, Pu L. Thangmawia chuan khuallian niin he hun hi a hmanpui a, Govt. Hrangbana College, Literature Club  lehkhabu siam *'Zirlaite hril-hla (Anthology of Poetry)'* tih bu chu a tlangzarh bawk. 

He hunah hian Pu L. Thangmawia chuan thu sawiin "Mizo Language Development Board din a ni mek a, hei hi literature lam tui mi te tan chuan thil tangkai tak, kan Inpui tur a ni dawn a ni" a ti a. 

Pu Thangmawia chuan "Zofate inpumkhatna atan hian literature aia țangkai tur a awm bik chuanglo a ni" tiin "Mizo țawng hi min țhen darhtu nilo a zofate suihkhawmtu tur zawk atana kan țawng ințawm (common language) a kan pawm tlan a ngai a ni" tiin "Zofate țawng hrang hrang pawh ngaihpawimawh a țul hle bawk a ni" a ti.

"Tun kan hun hman mekah hian insawiselna leh a thim zawnga thil thlirna hian min chiah hneh hle niin alang a, hetih lai hian a eng zawng leh a infuih phur zawng leh a insiamțha zawnga thlirna kawng pawh literature lama tui mi ten kan hnam kal zel tur atana thil țangkai tak a nih avangin tan in lak ka ngen duh che u a ni. Kan ramah hian țhalai fel tak tak, zirlai taima tak tak, officer leh sawrkar hnathawk țha tak tak leh politician țha tak tak te tam tak an awm a ni. Chuvangin insawiselna lam leh infuih tawnna lam hi a inbuk tawka a kal hi thil țul tak a ni" a ti bawk.

He hun hi Pu Laltlanmawia, Asst. Prof., Govt. Hrangbana College in kaihruaiin, Lalruattluangi, Information Secretary, Govt. Hrangbana College, Literature Club in hunserh a hmang a. Pu Lalzarzova, Asst. Prof., MZU in lehkhabu thlir lawkna neiin, Pu Lalrochuanga Pachuau, Principal, Govt. Hrangbana College pawhin thu a sawi a. Ramnunsanga, Secretary, Govt. Hrangbana College, Literature Club in report pe in, Lallawmsanga, President, Govt. Hrangbana College, Literature Club in lawmthu sawiin hun a khar a ni.

Hawnna inkhawm bakah hian chawhnu lamah Tv Lalhruaitluanga Chawngte Resource person a hmangin thil an zir ho a, poetry chhiarna hun te an hmang bawk a ni.

- DIPR