Tûmkâu Ni-a Sabengtung tlawm tak chu

- Remmuana Chawngthu

Marka 11:7-10  Tin, sabengtung no chu Isua hnenah an rawn kai a, a chungah chuan an puante an phah a; tichuan, a chungah a chuang ta a.
Tin, mi tam takin kalkawngah chuan an puan an phah a; mi dangin lova mi chhawl satin an phah bawk a.

Tin, a hma lama kalte leh a hnung lama rawn zuite chuan, "Hosanna! Lalpa hminga lo kal chu fakin awm rawh se, Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna!" tiin an au va.




Vawiin hi Mizo Kristian ten *"Tumkau Ni"* tia kan hriat, khawvela Kristian tam zawk ten *Palm sunday* an tih chu a ni.

Mizoramah hian rampum huapin, Kohhran lian pahnih Presbyterian leh BCM ten uar takin an hmang ṭhin a, kan unau UPC Kohhran te pawhin hmun engngemaw zatah an hmang ve bawk ṭhin a, Kohhran dangte hman dan erawh chu ka hre thui vak lo thung.

Lal Isua Jerusalem-a chawimawi-a a awm thu hi Bible-a Thuthlungthar lama Chanchin ṭha bu ziaktute hian an ziak vek a _(Matthaia 21:1-11, Marka 11:1-11, , Luka 19:28-44, leh Johana 12:12-19)._ Hmun hrang hrang leh ram hrang hrang ah kan hman dan a in ang vek lova, hmun tam zawk-ah tumkau hnahte la khawmin, hemi ni hriatreng nan hian Ringtuten kawngzawh leh Biak In lamahte hun kan hmang tlangpui thin a ni.

_Mizo Kristian history kan hriat theih chinah chuan (Ka hre sual deuh maithei a), Kum 1934 Tumkau Ni khan Zosap Missionary Pi Zaii chuan Mission Veng Kohhran Sande Sikul Primary Department naupangte huikhawmin, Sande Sikul banah tumkau vaia zai chungin an kohhran Sande Sikul Department dangte an tlawh kual thin a, Lal Isua chawimawina hla chi hrang hrangte sa rualin an hlim hle thin a ni. Hei hi a bul tanna leh hmasa ber a ni._

_Kum 1938 a lo herchhuah meuh chuan Zosap Missionary Pu Mena hovin Tumkau Ni, chawhma Sande Sikul banah Mission Veng Kohhran leh Kulikawn Kohhran Sande Sikul naupangte chuan tumkau kenga kawngzawhin an intawkkhawm ta thin a. Hetah hi chuan Pathian faka zai rual mai lovin Marka 11:9-10 hmangin an au rual ta a ni. An intawkkhawm chu an hlim thei hle a ni._

_Hun a lo kal zel a, Tumkau nia tumkau nen Lal Isua chawimawina kawng zawh chu Mizoram Presbyterian Kohhran hrang hrangte chuan kan Zosap Pi Zaii leh Pu Mena tihdan entawnin an lo ching chho ta a. Tunah tak phei chuan Presbyterian Kohhran chauh ni lovin Kohhran hrang hrangin Tumkau Ni-ah tumkau nen Lal Isua chawimawina kawng zawh kan lo nei ta a ni. Nimahsela, Tumkau Ni kawngzawh chawhma Sande Sikul bana neiha bul tan kha tunah chuan zingkarah neih thin a ni ta daih a. Hetia zingkara kawng zawh sawn hun hi hriat mai a ni lo thung a ni._

Hemi ni hi Lal Isuan Jerusalema ropui taka Lal anga a luh ni hriatrengna leh chumi lantirna a ni ber awm e. Juda-ho ngaihdan chuan tumkau hnah hian hlawhtlinna leh hnehna entir a ni. Lal Isua an chawimawi tum pawh hian tum hnah sawi lan a ni a, chumi in a entir chu: Juda-ho hian an mahni awpbettu Rom sawrkar lak atanga zalenna an duh a, chu anmahni awpbettu lak atanga hruai chhuak thei tur an beisei leh inghahna ber chu Messia a ni a. Chumi beiseina avang chuan Lal Isua hian hnehna rawn pein, awpbettu lak ata hruai chhuak ngei se ti a beiseina neiin tumkau nen an chawimawi niin chhuitu thenkhat chuan an sawi thung.

*Sabengtung chunga chuan hian hnehna leh inngaihtlawmna entir a ni.*

Ka han sawi duh tak bera chu, hemi ṭuma Isuan chuanna atana sabengtung a hmang hi a ni.

Sabengtung hi hmanlai hunah chuan ran â leh mâwl tak nia hriat a ni a; ran vulhtu tam tak pawhin mihringte thuam phur mai mai atana an hman, ran azawnga ran tlâwm tak hmuha an hmuh a ni ber.

*Mahse,*
He ran tlâwm tak chungah hian Khawvel chhandamtu ropui, zawlnei ten khawvel tlan tura a lo kal tur thu an puan lawka ngei kha; Ni, alpha leh omega ngei khan chuanna atan a hmang tlat a ni.

Amah lo hmuaktu leh lo chawimawitu ten a lo kalna turah chhâwlte, an puan neih ṭha ber berte an lo phah a, nasa takin an lo lâwm a ni. "He rân tlâwm tak mai rah atan hian engvanga thil ṭha tak tak kawng laia lo phah nge an nih?", E le! A chungah khawvel tlantu ropui, tlawmna nun neia keini min chhandamtu a chuang miau a ni.

Ran zawng zawnga tlâwm ber chunga inngaihtlawmna tawp nei lova min tlantu Lal Isua a chuang hi thil inhmeh tak a va ni em!

He ni a lo thlen hian tumkau nena kawng zawh chunga âu vak zingah i tel ve em?

*Hei hi i hria ang u.*
Tlawmna nun nei hlek lovin he hun duhawm hi uar takin kan lo hmang ve ngawt ang tih a va hlauhawm em!

Sakawr chapo tak emaw, sihal luhlul tak chungah emaw chuang lova sabengtung tlawm tak ber kher chunga Lal Isua a chuang hi ngun leh zualin i ngaihtuah fo ang u.

Chapona thinlung tlang sang tak rawt hniam chuang si lo a, he hun hi mahni phur phura kan lo hmang ve ringawt a nih chuan a fuh lo ang.

Midangte beng hniam zawng emaw, thuhnuai leh chhuk-en ngar ngar chingte tan leh khawvel thila hausate tlawn huam huam a, rethei zawkte phet tlu a, hmuhsit ching khawpa mi chapote tan chuan, a lang a mawi vel mai mai a uar taka he ni lo hman ve chiam chiam hi thil inrem lo tak a ni em tih chhut chian a ṭha hle mai.

A tawp berah chuan, eng anga mi hnuaihnung leh bakberh pawh lo ni ila, Lal Isua hi kan chunga kan chuantir tlat zel hi kan ropui vena tur a lo ni. Kan chunga chuang tur leh kan thinlunga chêng tlat tura keimahni-a hmun kan pek zel theih chuan "Misualte ṭhian" nih pawk zak lo, kan Lal Isua zarah phu loh malsawmna kan chang zel dawn a lo ni.

Lalpan malsawm che u rawh se. Amen.

Post a Comment

He post chungchanga i ngaihdan lo sawi ve rawh:

Previous Post Next Post