May 6 zan aṭangin Zothan Autoworks Pro Volleyball League 2022 ṭan dawn

• Zothan Autoworks Pro Volleyball League inkhel hmasa berah championship hnuhnung ber final-a insu Chhinga Veng Spikers leh Durtlang North an intawng dawn.




Aizawl | April 28, 2022: Nilaini khan Hawla Indoor Stadium Coference Room, Republic Vengthlangah Mizoram Volleyball Association (MVA) President Er H Lalzirliana, MLA chuan handbook leh fixture a tlangzarh a, Covid-19 leng vanga kum hnih ṭhulh zawn a nih hnua Pro Volleyball khelh a ni leh tur chu thil lawmawm a ni, a ti.

May 6, zirtawpni zanah R Dengthuama Indoor Stadium, Mualpuiah Pro Volleyball vawi ngana ṭan a ni dawn a, dar 8 aṭangin Chhinga Veng leh Durtlang North an inkhel ang.

2019 final-ah champion thei tura ngaih an nih hnuah Durtlang North-in harsatna an tawk a, 25-23, 18-25, 22-25, 31-29, 15-13-in Spikers an chak a, a vawi khat nan an champion. Kum thum chhunga Pro Volleyball inkhel awm leh hmasa berah Durtlang North-in an tlawmna chhang let nghal an tum dawn a ni.

May 7, inrinni zanah vawi khat aia tam champion thei awm chhun Hunthar leh Tuichangral an inkhel dawn a, May 9, thawhtanni zanah team panga an inlan kim ang a, TNT-in champion lai Chhinga Veng an hmachhawn ang.

May 10, thawhlehniah hmeichhe league ṭan a ni dawn a, team tel pali inlan kim nghal vekin 2019 champion Durtlang leh Kananin tlai dar 3 atangin an khel dawn a, zan dar 8-ah Bungkawn leh Bethlehem Vengthlang an inkhel ve leh ang.

Kum thum kal ta khan final-ah rin hlawh ni chungin a tawpah Bungkawn an tlawm a, 22-25, 25-20, 27-25, 22-25, 15-12-in Durtlang an chak a ni.

MVA President Pu Zira chuan, kum nga chhungin Mizoram volleyball-in India aiawh thei player neih ngei a la tum fan a, Pro Volleyball-in a hlawhtlin theihna kawng a hawn ngei a beisei.

"Covid-19 leng vangin hun khirh takin MVA a tlakbuak a, kan tum ang a hlawhtling mai thei rih lo. Mahse, tun hnai maiah hlawhtling takin Hnahthialah Inter District Volleyball Championship buatsaih a ni a, tunah Mizorama inelna sang ber khelh a ni leh dawn a, hma kan la chhunzawm zel dawn a ni," a ti.

R Dengthuama Indoor Stadium-ah vek khelh a ni dawn a, May 27-ah final tur niin inkhel vawi 20 (mipa ṭum 13 leh hmeichhia vawi sarih) a awm dawn a, LPS Vision-in live telecast-in a pe chhuak vek dawn a ni.
------
ZOTHAN AUTOWORKS PRO VOLLEYBALL LEAGUE 2022
May 6-27, 2022, R Dengthuama Indoor Stadium

MIPA (team 5)
Chhinga Veng Spikers (2019 champion, champion lai)
Durtlang North (2019 pahnihna)
Hunthar (2017 leh 2018 champion)
Tuichangral (2019 semifinal lut)
Thutak Nunpuitu Team (2016 pahnihna)

* 2016-ah Pro Volleyball League tan a ni a, kum li a zawna neih a nih hnuah Covid-19 leng vangin kum hnih thulh zawn a ni. Tun tumah hian champion hmasa ber Anastasia Electric Veng an tel dawn lo a ni.

HMEICHHIA (team 4)
Durtlang (2019 champion, champion lai)
Bungkawn (2019 pahnihna)
Bethlehem Vengthlang
Kanan

* Pro Volleyball League-ah hmeichhe inelna vawi hnih buatsaih a ni tawh a, 2017 khan Power Department Sporting Club-in final-ah Electric Veng hnehin champion hmasa ber an ni. 2019 final-ah Durtlangin league-a chak vek leh rin hlawh Bungkawn an hneh.


- THANG KHUMA T-a




FIXTURE

LEAGUE :
May 06, zirtawpni -
8pm : Chhinga Veng Spikers v Durtlang North (mipa)

May 07, inrinni -
8pm : Hunthar v Tuichangral (mipa)

May 09, thawhtanni - 8m : Chhinga Veng Spikers v TNT (mipa)

May 10, thawhlehni -
3pm : Durtlang v Kanan (hmeichhia)
8pm : Bungkawn v Bethlehem Vengthlang (hmeichhia)

May 11, nilaini - 
8pm : Durtlang North v Hunthar (mipa)

May 12, ningani - 
8pm : Tuichangral v TNT (mipa)

May 13, zirtawpni - 
3pm : Kanan v Bethlehem Vengthlang (hmeichhia)
8pm : Durtlang v Bungkawn (hmeichhia)

May 16, thawhtanni - 
8pm : Chhinga Veng Spikers v Hunthar (mipa)

May 17, thawhlehni - 
8pm : Durtlang North v Tuichangral (mipa)

May 18, nilaini - 
8pm : Kanan v Bungkawn (hmeichhia)

May 19, ningani - 
8pm : Hunthar v TNT (mipa)

May 20, zirtawpni - 
8pm : Chhinga Veng Spikers v Tuichangral (mipa)

May 21, inrinni - 
8pm : Durtlang North v TNT (mipa)

May 23, thawhtanni - 
8pm : Bethlehem Vengthlang v Durtlang (hmeichhia)

SEMIFINAL - MIPA :
May 24, thawhlehni - 
8pm : League 1st Position v League 4th Position 

May 25, nilaini - 
8pm : League 2nd Position v League 3rd Position

FINAL - HMEICHHIA :
May 26, ningani - 8pm : 
League 1st Position v League 2nd Position

FINAL - MIPA :
May 27, zirtawpni - 8pm :
League 1st/4th postion v League 2nd/3rd Position

Post a Comment

0 Comments