Ticker

10/recent/ticker-posts

Burma raltlante chhinchhiah leh identity card pekchhuah hna zawh thuai tum

Aizawl | April 24, 2022: Mizorama Myanmar mi raltlan awm mekte chhinchhiah leh identity card pekchhuah hna chu zawh thuai tum a ni.


Task Group on Myanmar Refugees chu an chairman Home department Additional Secretary hovin Zirtawpni khan an ţhukhawm a. Hetah hian Myanmar raltlante chhinchhiah leh identity card pekchhuah hna chu a hma thei ang bera zawhfel ni se an ti a. Tunhnaia ruahsur leh thlipuiin a tihchhiat raltlante awmna relief camp chungchangte sawiin an mamawh zualpui pek dan turte an sawi a. Thli-in relief camp a tihchhiat hi Lawngtlai district-ah 5 leh Lunglei district-ah 1 a awm tih report an dawng a ni. Raltlante ţanpuina pek dan turte an ngaihtuah bawk. Raltlante chhinchhiah leh identity card pekchhuah hna hi February thla a zawh tum a nih laiin relief camp a hri leng a hluar avangte-in a hun hi pawhsei a ni.
 Thu dawn danin Mizoramah hian raltlan 30,000 chuang an awm mek a, an zingah hian kum 2020 Myanmar inthlanpui a thlan tlin MP leh state a dan siampawl a thlan tlin 30 bawr vel an tel ve. Official-te sawi dan chuan relief camp a awm khawmte chhinchhiah hna hi chu a harsa vak lova, mahse, chhungkhat laina leh ţhiante belte, mi in luaha khawsate chhui zui a harsa deuhva. Chubakah an lo luh hnu a haw chho lehte an awm bawk avangin raltlan awmzat pawh hi a danglam reng a ni, an ti.
 Tun hnai khan Chin National Army (CNA) leh mipui ţangrual sipai pawl hrang hrang, Chin state leh Kalaymyo a awm mekte chuan thuchah inţawm siamin raltlante lo huma an lo enkawl danah Mizoram mipui, sorkar, kohhran leh pawl hrang hrangte chungah lawmthu an sawi a. Hetihlai kara raltlan anga awm a ruihhlo tawlhruk chingte chu an chhinchhiah a, an umzui dawn thu an puang a. Raltlante pawh an awmna khua ţheuhva khawtlang tana mi ţangkai ni turin an chah a ni.

- AIR Aizawl
Post i hmuh dan

Post a Comment

0 Comments