Bangladesh leh Mizoram Commerce minister hovin integrated check post dinna hmun tur en

Aizawl | April 23, 2022:.Nimin tlaia Mizoram lo thleng Pu Tipu Munshi, Hon’ble Minister, Ministry of Commerce, Bangladesh chuan vawiin khan Lunglei District lo thlengin Bangladesh ram nena kan insumdawn tawnna atana Integrated Check Post (ICP) dinna tur hmun, Kawrpuichhuah, Tlabung a tlawh.

Pu Tipu Munshi hi Commerce and Industries (C&I) changtu Minister Dr R. Lalthangliana, C&I Commissioner Pi Esther Lal Ruatkimi, Mr. Md. Abdus Samad Al Azad, Joint Secretary (FTA-1) Ministry of Commerce, Bangladesh, Dr. AKM Atiqul Haque, Minister (Commercial), Joint Secretary, Bangladesh High Commission, New Delhi ten rawn tawiawmin Lunglei DC Pu Kulothungan A, Lunglei SP Pu Rex Zarzoliana Vanchhawng leh District official dangte, Lunglei MJA, Chhimbial Chhantu, party hruaitute leh Tlabung mipuiten anlo dawngsawng a ni.

Integrated Check Post dinna hmun tur Kawrpuichhuah Tlabunga inkhawm tawi neihah Bangladesh Commerce Minister Pu Tipu Munshi chuan thu sawiin Mizoram nena insumdawn tawnna tih hlawhtlin chu Bangladesh sawrkarin a ngai pawimawh takzet a ni tiin "ICP Kawrpuichhuah leh Silsuri, Tuipuibari, Nunsuri leh Marpara-a Border Haat te an nih tur anga tih puitlina kalpui an nih theihnan Bangladesh sawrkarin kan tih ve tur te rang thei ang bera umzui kan tum a ni" a ti a. Ramri intawm kan nih angin inhriatthiam tawnna boruak tha hnuaia hmalak tlan zel a tul a ni tiin insumdawn tawnna kalpui chuan inlaichinna tha zawk a thlen ngei pawh a rin thu a sawi a. Mizoram tharchhuah balhla, hmarcha leh Mizorama tam em em lung (boulder) te Bangladesh chuan a mamawh in a lei duh reng a ni tiin amah leh a thawhpuite tha taka anlo dawnsawn avangin Mizoram sawrkar leh mipuite chungah lawmthu a sawi a. Mizoram border tour hlawhtling tak a neih chungchang pawh Bangladesh Prime Minister Sheikh Hasina hnenah report thuai a tum thu mipui kalkhawmte a hrilh a ni.  

Commerce and Industries Minister Dr R. Lalthangliana pawhin thu sawiin kan ram economy than len zelna turin ram dang nena insumdawn tawnna tih hmasawn a pawimawh takzet a ni tiin hemi kawnga kan hmasawnna turin Bangladesh leh Myanmar ram te nena ramri kan neihna hmunah te border trade ti hlawhtling turin theihtawp kan chhuah zel dawn a ni, a ti a. Border trade ti hlawhtling tura hmalakna kal zelah Bangladesh ram Commerce Minister Pu Tipu Munshi ngeiin Mizorama border hmun pawimawhte a rawn enfiah thei chu hmasawnna ropui tak a ni tiin ICP leh Silsuri, Tuipuibari, Nunsuri leh Marpara-a Border Haat te chu a nihna ang tur takin kan chhawr tangkai theih thuai a beisei awm a ni, a ti a. Myanmar lam ramri depa border trade pawh Myanmar ram boruak a zia awm chhoh veleh ngawrh taka kalpui tum anih thu leh tun dinhmunah Zokhawthar ah cheng nuai 1500 man hu project kalpui anih thu a sawi. Border trade ti hlawhtling turin ramri hrula cheng mipuite an pawimawh takzet a ni tiin he hmalakna hi mipuiten ngai pawimawh tur leh sawrkar tawiawm turin a sawm a ni.

December 2020 khan Sawrkar Laipui Ministry of Home Affairs hnuaia Land Ports Authority of India (LPAI) Director (Project) Col Raman Kumar Sharma te nen Dr R Lalthangliana hovin ICP Kawrpuichhuah awmna hmun tur hi inspection neih ho a ni a. Nikum March 2021 khan C&I Minister Dr R. Lalthangliana hi border trade chungchang bawhzuiin Bangladesh ah lo zin tawhin Commerce Minister Pu Tipu Munshi leh Bangladesh sawrkar hotu pawimawhte nen meeting pawimawh te anlo nei tawh a ni.  

ICP Kawrpuichhuah dinna tur hian kum 2005 khan M/s Rites Ltd. (Government of India Enterprise) ten Home Ministry hnenah an survey report thehlutin he ICP dinna tur hian ram 224.99 bigha a zau acquire a ni a. India leh Bangaldesh inkalpawhna ti awlsam tur hian Kawrpui lui (Theka) ah RCC Double Lane Bridge 660 metres a thui siam tum a ni bawk a. He RCC Bridge siamna tur hian Mizoram PWD chuan Sawrkar Laipui Ministry of External Affairs ah Rs. 230.01 crores hu DPR chu January 17, 2020 khan anlo thehlut tawh a ni. He RCC Double Lane Bridge hmang hian awlsam zawkin Indo-Bangladesh insumdawn tawnna kalpui theih a ni dawn a, sawrkar laipuiah bawhzui mek a ni. Tlabung leh Kawrpuichhuah inkar kawng 18km chu double lane black topping siam zawh ani tawh bawk a ni.

Bangladesh nena insumdawn tawn nana thil pawimawh zinga pakhat Trade Facilitation Centre chu Tlabung ah sak zawh tawh a ni a, hemi sakna atan hian Mizoram sawrkar ngenna angin Critical Infrastructure Balance (CIB) scheme hnuai atangin cheng nuai 118 chu sawrkar laipui Ministry of Commerce & Industry atanga hmuh a ni a. Tunah hian he building a taka hman theihna tur hian Mizoram sawrkarin hma la in cheng nuai 10 hmangin a chhunga hmanrua tur te lei khawm a thuam that ani tawh bawk. 

ICP Kawrpuichhuah hi a puitlin hunah chuan Bangladesh ram nena insumdawn tawnna hmun pawimawh a ni chho dawn a,mumal taka bungrua thawnchhuah leh lakluh (Export & Import) chhinchhiah a ni dawn a, chutih rual chuan ram dang atanga Dan lo anga mihring lut turte pawh uluk takin ICP ah hian endik a ni dawn a ni. He ICP puitlinna tura pawimawh tak Lunglei leh Tlabung inkar ah kawngpui (Double Lane) 100kms chu survey zawh tawh niin hna bultan tawh a ni a; kawngpui tha takin Tlabung hi a pawh dawn a ni.