ZORAM NI hman chhoh dan

 


Jacob Lalmuanpuia,
General Secretary


“ZORAM NI” hi kum 2008 March ni 5, atang khan hman tan a ni a, kumin hi kum 15 kan hmanna a lo ni ta der mai. ZORAM NI hman dan tur leh a tul ang apiang buaipui turin hun hmasa lamah khan Organising Committee din thin niin Zoram hmun hrang hrangah MZP Headquarters leh Sub-Headquarters, leh Branch-te bultumin Zoram Ni hi urhsun taka hman thin a ni a. He ni hi  hlawhtling takin Pathian leh mi thahnemngai ram leh hnam vei tak tak te zarah hman a lo ni tawh a, Zoram mipuite pawhin “ZORAM NI” hi kan hlut sawt hle a. Hun hmasa lama ZORAM NI kan hman dan tlangpui chu hetiang hi a ni:

1. ZORAM NI hmasa ber chu Ni 5 March 2008 khan Vanapa Hall-ah ropui takin hman a ni a. He hunah hian Mizoram a Bomb thlak a nih laia nunna thapa mipuite thlamuantu mi chhuanawm tak tak mi 12 te hnenah chawimawina hlan a ni a. Rev. Dr. Lalsawman Zoram Ni meichher a chhi a, Lehkhabu rotling leh bengvarthlak tak kum 1966-a Zoram beih anih hunlai tarlanna “Zawlkhawpui Senmei channi” Proffesor JV Hluna ziak chu Pi Lalliani P & Sons in a tlangzarh a ni.

Tin, kum 2008 hian Aizawl mai bakah Zoram hmun hrang hrangah MZP Headquarters leh Sub-Headquarters te bultumin Zoram Ni hi urhsun taka hman a ni a. Mizoram chhunga Central Sorkar Office hrang hrangah puan dum zar a ni bawk.

2. ZORAM NI vawi 2-na chu Ni 5 March 2009 khan I& PR Conference Hall-ah hman a ni a. He programme hi hun hnihah thenin hun khatna chu sunna leh thuchah sawina hun atan hman a ni a. hun hnihna ah Seminar neih a ni a, Mi pathum lehkha buatsaih “March ni 5 1966 chanchin, Bomb vanga tawrhna leh Kohhran” - Proff JV Hluna ziah te, “Bomb hmanga Zoram beih anih laia Zalenna sualtute dinhmun” - Pu R. Zamawia ziah te, leh “Aizawl bomb leh tunlai khawvel” - Pu Lalhruaitluanga Chawngte ziah te zirho a ni.

3. ZORAM NI vawi 3-na chu Ni 5 March 2010 khan hman a ni a. Hemi kum hian “India in Mizoram a Bomb lai” lemziak intihsiakna buatsaih a ni a. He intihsiakna hi Primary School, Middle School, High School leh Higher Secondary School huangah te then a ni. Kum 2021 ZORAM NI pual hian LPS Studio-ah Talk Show buatsaih a ni a, he hunah hian kum 1966 March ni 5-a thil thleng chanchin leh a nghawngte sawiho a ni.

4. ZORAM NI Vawi 4-na chu March ni 5, 2011 khan hman a ni a. He hunah hian Organising Committee rel angin ZORAM NI pualin ngawi renga kawngzawh huaihawt a ni a.Kum 2011 ZORAM NI pual hian Talk Show buatsaih a ni a. Hemi ni hian ZORAM NI hman anih theih nana bul tantute leh tha leh zung ngaihtuahna tam tak sengtu Proff JV Hluna chu chawimawina thuziak hlan a ni a.  Hemi ni pual hian Aizawl Art Gallery bultumin Vanapa Hall-ah ZORAM NI Painting Exhibition neih a ni a, Zoram ni beih anih laia kan tawrhna tilang thei lemziak ropui leh rilru khawih tak tak thahnem tak phochhuah a ni bawk.

5. ZORAM NI Vawi 5-na chu Ni 5 March 2012 khan Organising Committee thurel angin Zoram ni hman niin Aizawl khawpui chhungah kawng zawh huaihawt a ni a. Vanapa Hall kawtah intawh khawm buatsaih a ni a. ZORAM NI 2012 Pual hian Talk show huaihawt niin heng:-
#March ni 5 a Zoram ni hman hi a inhmeh chiahin kan hria em? Hun lokal turah hman zui zel tha kan ti em? Zoram Ni hman hi a tulin kan hria em?
# March ni 5, 1966 ah khan Mizoram hi Bomb a ni chiah em?
# March ni 5 hi Zoram mipui tan hriatreng tlak a ni em? Mizor hnam inlungrualna ni atan hman chi a ni em? tih te thupui hmangin sawihona hun hlawkthlak tak neih a ni. 

6. ZORAM NI vawi 6-na Ni 5 March 2013 khan hman a ni a. Organising committee hranpa siam lo in hman a ni a. Symposium neih a ni a. he hunah hian ZORAM NI leh Mizo Nationalism chungchang Pu VL Krosshnehzova hetih hunlaia MZP Adviser kaihhruaina in sawihona neih a ni.

7. ZORAM NI Vawi 7-na Ni 5 March 2014 pawh MZP Bultumin I&PR Auditorium ah hman a ni a, Proff JV Hluna leh Pu Lalhruaitluanga Chawngte Adviser Paper buatsaih zirhona neih a ni.

8. ZORAM NI Vawi 8-na Ni 5 March 2015 I & PR Auditorium ah hman s ni a. Thupui atan “Ram leh hnam hmasawnna kawnga mipui leh thalaite mawhphurhna” tih thlan a ni a. Pu K. Sapdanga, Editor Vanglai leh Dr Samuel Vanlalthanga, Asst. Prof Govt Aizawl West College te Paper buatsaih zirho a ni.

9. ZORAM NI Vawi 9-na pawh 5 March 2016 khan hman niin hemi pual hian Aizawlah kawngzawh niin Millenium Center atanga Vanapa Hall thleng kawng zawh a ni.

10. ZORAM NI Vawi 10-na Ni 4 March 2017 khan hman a ni a. Ni 5 March hi  Pathianni anih avangin March ni 4-ah hman a ni a. kum 2017 ZORAM NI thupuiah “Mizo Nationalism leh Zofate inpumkhatna” tih a ni a. Pu VL Kross hnehzova chuan thupui sawina hun hmangin Thupui sawihona hun neih chhunzawm a ni.

11. ZORAM NI vawi 11-na chu Ni 5 March 2018 khan MZP Bultumin hman a ni a. He hunah hian Pu Lalthlamuana Ralte ziah “March ni 5, 1966 chanchin tih leh Pu Lalhruaitluanga Chawngte in “Aizawl Bomb leh tunlai Zoram Khawvel” tih a ziahte zir ho a ni. 2018 ZORAM NI pual hian College Zirlaite tan “Rambuai leh Mizoram” thupui hmangin thu inziahsiak buatsaih a ni. 

12. ZORAM NI vawi 12-na chu Ni 5 March 2019 khan Dawrpui Multipurpose Hall-ah hman a ni a. Pu Lalchamliana Home Minister chu kuallian niin Pu Lalnuntawma Fanai, Adviser in thupui sawina hun a hmang a ni.

13. ZORAM NI vawi 13-na Ni March 5,2020 khan Chanmari YMA Hall-ah hman a ni a. ZORAM NI pual hian ‘’March Ni 5,Zoram Ni India sorkarin Mizote Bomb hmanga beih vanga Mizote tawrhna leh ram leh hnam hmangaihna chungchang’’ tih thupui hmanga poetry in phuah siak buatsaih a ni. H. Lalduhzuala Hmar, P&E Veng, Serchhip Pakhatna, Matluanga, Saron Veng, Aizawl, Pahnihn Lalhmachhuana, Dawr Veng, Bilkhawthlir Pathumna a ni.

14. ZORAM NI vawi 14-na chu March ni 5, 2021 khan Ignite Studio Khatla ah urhsun takin hman a ni a. He hunah hian Pu L. Ramdinliana Renthlei, MZP General Headquarters Adviser chu Resource person niin Zoram Ni chungchang Paper Present-in hun a hmang bawk.

15. ZORAM NI vawi-15-na pawh March ni 5, 2022 hian hman leh ngei nise tiin MZP General Hqrs Extended OB Meeting chuan a rel a. Buaipui ngai hrang hrangte buaipui anih hnu leh sawm turte sawma programme duan anih hnuin zanin hun hi kan thleng ta a.

ZORAM NI Hman chungchangah hian MZP in a ngaih pawimawh ber chu kan tawrhna hian ram leh hnam hmangaihna rilru thar min put tirin Zofate thinlungah zalenna leh Remna leh Muanna hluatzia a tharin min hriat chhuah tir fo rawh se tih hi MIZO ZIRLAI Pawl (MZP) duh dan a ni.

Post a Comment

0 Comments