NU HMANGAIHNA

(International Women's Day)

📒Remmuana Chawngthu🖊️

''Ka nu tel lo chuan Vanram pawh hi nuam ka ti lovang.''_

- Sadhu Sundar Singh.

Pathian rawngbawltu ropui tak hian Vanram chu a nu nen lo chuan nuam a tih a rin loh thu a sawi a, Vanram thlakhlelhna leh a nu a hmangaihna hi  a thinlungah chuan a intluktlang reng a ni tiin a teh thei tlat. A nu hmangaihna ropuizia a puang chhuak chiang hle mai.

_''Ka bat zawng zawng hi tlak dawn ila, ka nu laka ka bat hi ka tlak huphurh ber''_

- Abraham Lincoln.

America President zinga ropui ber hian a nu laka a bat a tlak huphurh ber, a chhan nia lang chu nu hmangaihna sanzia, rilzia, thukzia hi khawvel sum pai nena teh zawh rual a ni tlat lo, rulh zawh theih a ni lo tih a hriat vang a ni ber e.

_''Pathian vahbosan mah ila, ka nu tawngtaina ka hre reng''_ -Kaphleia.

Zofate zinga hla phuahtu hmasa hian,nu hmangaihna a puang chhuak chiang hle. Kan taksa leh thlarau nun thlenga min siamtu Pathian meuh pawh vah bosan hnua, nu te tawngtaina tal hre reng tlattu chuan reilo teah a vah bosan hnu Pathian chu a pan leh ngei ang.

_''Nu tel lohna khawvel chu thlaler ram ro, tui awm lohna ang a ni''_ -Napolean Bonaparte.

French Emperor ropui, a vanglai chuan, _''A ke vawikhat perin Europe khawmual a nghawr nghing thei''_ tih khawpa mi ropui hian, nute pawimawhzia a theihnghilh bik lo. Khawvela a ropuina zual nasat poh leh a nu ropuizia a hrechiang tawlh tawlh mai a ni.

_''Chun hmangaihna a ril, a sei, tawp ni awm lo._

_Nundik lamtluang chhui rawh mi lo ti...''_ Lalsangzuali Sailo.

Thingsai khaw daia a nu thlan a hmuh chuan Pi Zualbawihi hian a nu hmangaihna ril leh seizia a hre chhuak thar a, a nu thlarau chuan thu-ro tha tak ala hrilh ni-ah a ngai tlat. Nu hmangaihna chuan teh phak rual loh thil hlu a lo keng a lo ni...

Ni, Nu hmangaihna ropuizia sawi tak tak dawn ila. He thi thei lei (tongue) hian a puang seng lo hial ta ve ang. Rulh zawh sen loh a tam leh nasa a ni tlat a, hriatfiah sen loha ril a ni..

A dera social mediaa nute hmangaihna thu tilang chiam chiam a, a tak rama mahni nute tibuai leh fo ṭhin nun hi kalsan a hun ta mang e..