• March 26-ah dilna hun tawp dawn!
Aizawl | March 22, 2022: Mizo Zirlai Pawl (MZP) General Headquarters chuan Mizo hnam tan Central leh All India service ah Mizo tam a pawimawh zia hriain Mizo zirlai pathum UPSC coaching sponsor tumin hma an la mek a. A vawrtawp a thleng chho dawn ta.
MZP UPSC Coaching-ah hian Vawiin thleng khan diltu mi 90 an chuang tawh a, nia thu dawn a ni!
MZP-in Mizo pathum zirna a puih turte hi India rama UPSC coaching atana zirna in ṭha lawr lak Vajiram & Ravi ah kal tir an ni dawn a. Hei ringawt pawh hi dil chur churna tham a ni.
'MZP UPSC Coaching' hi March 26 thleng dilna thehluh theih a ni a. Dilna hi google form hmangin dil tur a ni. Dilna hi EXPLOREMIZORAM.COM ah dah a ni.
April 2-ah screening test an nei ang a, April 8-ah interview kalpuiin, het thlan chhuah Mizo Zirlai vannei pathum te India rama UPSC coaching institute ṭha lawr lak Vajiram & Ravi ah kaltir an ni ang.
MZP hian heng thlanchhuahte zirna senso leh New Delhia an awm mante an tumsak vek dawn a, hei hi Mizo zirlaite tan chuan pheichham a ni ringawt a ni.
MZP in UPSC Coaching a sponsor tur chungchang hrechiang turin MZP Prsident Lalnunmawia Pautu Press statement hi i lo belchiang dawn nia.
No. E-93/MZP-GHQ/2021-2023/18 Dated, Aizawl, the 11st March, 2022
PRESS STATEMENT
1. MZP chu zirlai pawl a nih angin zirlaite chawikan hi a ngaihpawimawh ber pakhat a ni a. Mizo zirlaite tih hmasawnna leh chawikan hi a vei leh tum ber a ni. Mizoram hian All India Service leh Central Service a tling hi tun hnaiah a nei ta mang lova, All India Service-ah phei chuan kum 10 dawn Mizo thalai tling thar a awm tawh lo hial a ni. Mizo officer tam tak an retire mek zel a, chuvangin Mizo zirlaite nasa lehzuala tanlak a ngai a ni. Mizo zirlaite hnufualna leh tanlak a ngaih zia hi MZP chuan a vei em em a. Mizo zirlai All India Service leh Central Servicea kan tlin tlem chhan hrang hrang awmte zirchiangin a sutkian dan tur vawi tam a ngaihtuah tawh a ni
2. Mizo te Central Services leh All India Service-ah kan tlin theih nan MZP chuan awareness campaign te kalpuiin, sawrkarah rawtna hrang hrang a thlen tawh thin a. Heng kan hmalaknate hi tha viau mahse awmzia a nei mawh hle a, chuvangin MZP chuan hmalakna chi dang kalpui a rilruk ta a ni.
3. MZP chuan Mizo zirlai thluak tha leh theihna nei, tumna tak tak nei zawnchhuaha, India khawpui New Delhi a Coaching tha bera kal tir (sponsor) turin hma kan la mek a. Tunah hian Vajiram & Ravi Coaching Centre N. Delhi chuan MZP tan Seat 5 lai min reserve sak tawh a. Nimahsela, sum leh pai a hautak dawn avangin MZP chuan mi pathum sponsor turin hma kan la mek a ni.
4. MZP chuan mi inphalte thawhkhawm atanga, Mizo zirlai pathum kan sponsor turte hi an senso engkim kan tumsak dawn a. Kum hnih chhung kalpui tura ruahman phawt a ni ang.
5. Sponsor tur thlan kawngah hian, UPSC Exam kalphung zulzuiin Screening Test kalpui a ni dawn a. Personal Interview uluk taka neih hnuah a titha pathumte thlan an ni ang.
6. Screening Test-hi MPSC-in recruitment an kalpui ang thlap leh felfai thei ang bera kalpui tum a ni a. Technical thilah chuan MPSC-te thurawn lak a nih angin, an facility pawh hman min phalsak.
7. Hetiang lama tui Mizo zirlai tu pawh, Graduate tawhte tan dil theih a ni dawn a. Dilna hi Google Form hmanga kalpui tur a ni ang. Dilna link hi MZP website www.mzpmizoram.com leh Explore Mizoram website www.exploremizoram.com ah te dahchhuah a ni dawn a ni.
8. Dilna hi ni 26th March, 2022 thleng hawn a ni ang a, ni 2nd April, 2022 hian Screening test neih a ni ang. Personal Interview hi ni 8th April, 2022 hian nei tura ruahman a ni bawk.
9. He kan hmalakna kawnga min thlawpa, thurawn tha tak tak min petu zawng zawngte chungah lawmthu kan sawi a. A bik takin Coaching Center kan thlanna kawnga theihtawp min chhuahpuitu Pu Alexander V Chongthu Addl. R.C N.Delhi chungah lawmthu kan sawi a ni.
Issued by: Mizo Zirlai Pawl, General Headquarters
Post a Comment
He post chungchanga i ngaihdan lo sawi ve rawh: