KA LAWM E! | Beidawnna hmun atanga beiseina min siamsaktute in ni. Ka tan in va hlu em! - Rinpuia

"Zalenna boruak ka hip leh theihna chhan lian tak in ni a, ka tan in hlu mang e!"
(Mizo rawlthar tennis star bumna avanga kum 4 chuanga lungin tang, Lalrinpuia lawmthu sawina kan dah e. - Editor)

Vanduaina ka tawh avanga Mumbai Taloja Jail-a ka tân chungchangah leh Pathian leh min duhsaktu leh lainattu, khawngaihtute zara dam taka kum 4 leh thla thum hnua thiam changa jail atanga ka chhuah leh thuah hian lawmthu sawina tur hi ka ngah hle a. Ka sawi seng lo tak meuh zawk a ni.


1. Harsatna ka tawh tirh atanga jail atanga ka chhuah leh thlenga min thlahthlam lotu, jail chhung hmun hrehawm berah pawh min awmpuia, ka rilru hrehawm ber lai pawha min thlamuana chakna leh beiseina min petu PATHIAN chungah ka va lawm em! Amah chu ka innghahna leh ka rinchhan ber a ni si a.
2. Jail ka tân tirh atanga min buaipuitu zawng zawngte hi sawi dawn ila hunin min daih dawn si lo, an hming hmerhin sawichhuak vek dawn ila ka ziak sêng lo. Min khawngaihtu leh min lainattu zawng zawngte kha tute nge in nih ka hre seng lo, kei tehlul chunga in thatna avang khan Pathianin malsawmna in vur lêt theuh che u rawh se.
3. Mumbai Mizote chungah thinlung takin lawmthu ka sawi a, jail-a min rawn tlawhtute, ka khawhar leh hrehawm hlaua min thlamuantu zawng zawngte kha ka chakna in ni a. Beidawnna hmun atanga beiseina min siamsaktute in ni. Ka tan in va hlu em!
4. Mizoram Table Tennis Association chunga ka lawmna hi ka sawi seng lo. A tir atanga jail atanga ka chhuah leh theihna kawngah hian a kila lung pawimawh ber an ni a. Ka chung an thiltih zawng zawng hi ka damchhunga ka hriatreng tawh tur leh ka lâwmna ni reng tur a ni. An chungah ka lâwm takzet.
5. Kei tehlul, Mizo tlangval pakhat ve mai kha Mizoram pumpui huapin min lainat a, min khawngaih a, jail atanga ka chhuah theih nan kei tehlul hmingin tanpuina pâwl *Rinpuia Puitu Group* tihte hial siam a ni kha a mak ka ti a. Ka beisei phâk piah lam, mumangah pawh ka mang phak loh thil a ni. Kha tanpuina kaltlanga ka chhuah theihna tura thawhlawm thawhtute zawng zawng kha a mal malin vân Pathianin in thiltha tih kha rûl lêt theuh che u rawh se.
6. Jail ka tân chhûng zawnga ka tâna bâng lova tawngtai thinte kha ka chakna leh beiseina hnâr in ni. Ka tân in va hlu em! In tawngtaina kha a thlawn lova Pathianin a hun takah chhângin min lachhuak ta. Zalenna boruak ka hip leh theihna chhan lian tak in ni a, ka tan in hlu mang e!



7. Jail ka chhuah ni atanga min buaipuitu zawng zawng te, ka pianna Mizoram leilung ka rah nia Lengpui Airport-a MTTA huaihawta ropui taka min lo hmuak te kha ka phu loh chawimawina a ni a. Khami nia min lo dawngsawngtu zawng zawng te chungah khan thinlung takin lawmthu ka sawi takmeuh meuh a ni.
8. Kutruakin jail atangin ka chhuak tih hriaa min lainata tanpuina pawisa fai leh bungrua hmanga min vûrtu zawng zawngte kha kei chuan engti kawng mahin ka rûl let zo tawh lovang che u. Mahse, ka chunga in thiltih avang khan Pathianin a vân malsawmna in rûl lêt theuh che u rawh se tih hi ka tawngtaina a ni.
9. Miten ka chanchin an hriat theihna tura media kaltlanga min puanzar sak a, chanchinbu leh TV kaltlanga min thehdarh saktu zawng zawng chungah ka lâwm takzet zet a ni.
10. Ka chunga in thatna zawng zawng hian hma lam pan turin chakna min pe sela, thochhuak leh tura min puitu tangkai an ni ngei ang tih ka beisei.

A hminga Table Tennis-a Mizoram leh India ram aiawha theihtawp ka lo chhuah vena te avanga in mi duhsakna leh lainatna, min chawimawina leh min khawngaihna hi ka damchhunga ka hla mawi ber a ni reng tawh ang. Lawmthu hi sawi kim thiam a har a, phelh deuh pheng phunga ka lawmthu sawinaah hian sawi hmaih leh sawi kim loh ka lo nei palh a nih pawhin, "A....a lâwm em a ni" tia min lo ngaihdam thiam turin ka ngen a che u.

Mizo mipui zawng zawng chungah ka lawm e.

In khawngaihna dawngtu

Post a Comment

0 Comments