PATHIANIN BUL ṬAN ṬHA TURIN A BUATSAIH CHE

— Rick Warren 

— Feb 08, 2022

“Amahah chuan Pathian famkimna tinreng chu taksa neiin a awm reng si a. Amahah chuan in famkim ta bawk a; ani chu lalna leh thuneihna zawng zawng lu a ni." Kolossa 2:9-10.

Bul ṭan ṭha tura i inpeih a nih chuan, i inchhut chian deuh a ngai dawn a ni. Chumi awmzia chu i hnathawhna tura i thil neihte chu i chhut a ngai a. I mimal inchhutnaah chuan heng zawhna pathumte hi inzawt ang che.

I thil neih te engnge?

Eng bungrua te nge i neih, i zir thiamna leh i sum leh pai te pawh. Thlarau lama i thil neih Pathian fa i nih theihnghilh lo la. Kolossa 2:10 ah chuan, “Amahah chuan Pathian famkimna tinreng chu taksa neiin a awm reng si a. Amahah chuan in famkim ta bawk a; ani chu lalna leh thuneihna zawng zawng lu a ni."

Engnge i zir chhuah?

I thil zir chhuahte ngaihtuah la ziak chhuak lawk teh, nun awmzia, nangma mimal, chhungkua, Pathian emaw i ngaihtuah chhuah apiang ziak rawh. Galatia 3:4 ah chuan, "Thil chuti zozai chu sawtpui lovin in tuar em ni?" a ti a. Thil engemaw i zir chhuah chuan a lo thlawn lo tihna a ni.

Tawrhna i hmachhawn lai kha han ngaihtuah teh — a chhan chu Pathianin a lo thlawnin tawrhna a thlentir silo. Pawi tihna ai chuan i tawrhna aṭang chuan thil zir chhuak rawh. I thil zirte chu ziak la. Inchhir mai a tawk lo, i tihsual aṭang chuan inzir zawk ang che. Engnge a chhan? Thil thar hmuhchhuah reng rengte hi an hlawhchhamna aṭanga an hmuhchhuah a ni zel. Chumi aṭang chuan eng thil nge sawt lo chu i hrethiam thei ang.

Bible-in engnge min zirtir tih pawh i en thei ang. 2 Timothea 3:14-15 ah chuan, "Nimahsela, nang zawng, tu hnena zir nge i nih leh, Krista Isuaa rinna awm avang chuan chhandamna hmu khawpa tifing thei che Lehkha Thianghlimte chu i naupan tet ata hre tawh i ni tih hriain, i thil zir leh i thil hriat chianah te chuan awm reng rawh."

Bul ṭan ṭha leh turin tunge pui thei che?

Thufingte 15:22 ah chuan, “Remruat lawk lova thil tih a hlawhtling duh lo. Remhria an tam chuan a hlawhtling ṭhin."

Chaponain mi tam tak an tum ram a thlentir thei lo fo ṭhin. Mi thurawn lak ai chuan mahnia thil chinfel an tum ṭhin.

Bible chuan chapona chu tlukna a ni a ti. Pathianin mi tlawmte chu a khawngaih ṭhin a ti bawk. Engnge a chhan? Inngaitlawmte chu zirtir theih an ni. Thil thiam tawh anga i inngaih tlat chuan bul i ṭan thar thei lo vang. I arkhawthimdai avanga, ti phur tur che leh thudik tak hrilh tur che i mamawha, Pathianin a mite min tiam hriattir tur mi i mamawh bawk a ni.

Nangmah leh nangmah ngun taka i in enlet hnuah chuan Pathianin bul ṭan ṭha tura a buatsaih dan che i hmu thiam tawh ang.

Ngaihtuah zui atan

* Engvangin nge i hlawhtlinna aiin i hlawhchhamna aṭangin thil tam zawk i zirchhuah ṭhin?

* Thil zirtir theih niin i inhria em? Engvangin nge, engati nge?

* Thlarau lam thil i neih engte nge ? Engvanga i neih nge ni?

[Lettu: Sangpuia]