Parliament-ah K Vena'n hmarchhaka Hindi zirtirtu mamawhna sawichhuak

Aizawl, 4th February, 2022: Parliament Budget Session neih mekah vawiin khan Mizoram Rajya Sabha M.P Pu K.Vanlalvena chuan Zero Hour ah hmarchhak biala Hindi zirtirtu mamawhna leh an dinhmun siam țhat sak a pawimawh thu a sawi chhuak a.

Pu Vena chuan Mizoramah Hindi zirtirtu High school ah 384 leh Middle school ah 724 awm sa te bakah Samagra Shiksha scheme hnuaiah Hindi zirtirtu 855 lai lak a ni tih a sawi a. Hei hian sawrkar school leh Govt-aided school te mamawh chu a phuhruk theih rualin hmarchhak bial pum huapin zirna bul țhut tak tak, Primary school level te chu tun thlengin Hindi zirtirtu pek an la ni lo tih a sawi a.

Central sawrkar Samagra Siksha scheme hnuaia sum hmanna tur țhenkhat, zirtirtute leh educator te hlawh atana sum sen tur chu kum tin tih tlem tial tial turin ruahman thar siam a ni a. Hei hi state sorkar tan phurrit belh chhahna a nih avangin state tenau zawk, hmarchhak bial state te ang tan chuan he scheme component tinah central sorkar leh state sorkar sum intum sem tur chu a pangngai anga 90:10 a la kalpui chhunzawm tura siam țhat ni se a ti a. Chumi rual chuan Samagra Siksha hnuaia Hindi zirtirtu lak te chu state sorkar hnuaia zirtirtu dangte lak dan nen rualkhai taka kalpui ni se, tiin Pu Vena chuan hei hi zirna quality țha neih nan thil pawimawh a ni, a ti a. Samagra Sikhsha hnuaia zirtirtuten hlawh țha zawk an neih theih nan sum tam zawk ruahman ni se tiin Session ah hian a sawi a ni.

Pu Vena chuan hmarchhak bial naupangte tan Hindi thiam chu hnam inpumkhatna atana thil pawimawh tak a nih thu pawh sawiin hmarchhak bial naupangte chu a tlangpuiin Mongolian thlah, nu leh pa te atanga Hindi țawng hmang lo an ni a. State danga Hindi țawng hmang te angin an nu leh pate hnen atangin Hindi zirna tur an nei ve lo va. Hmarchhak bial tan Hindi zirtirtu dah chu Army battalion dah aiin a pawimawh zawk a ni, a ti a. School hrang hrangah Hindi zirtirtute chu muster roll a chhawr deuh vek an nih avangin zirtirtu dangte nen an dinhmun a inthlau a. Hei hian Hindi ngaih pawimawh lohna a hring thei dawn a ni, a ti a. Hmarchhak biala cheng te leh India ram hmun danga chengte inkarah inremna leh inpumkhatna țha zawk a awm theih nan hmarchhak biala Hindi zirtirtu mamawhna chu Central sawrkarin ngaih pawimawh a, Hindi zirtirtute dinhmun pawh siam țhat sak turin a duh thu vawiin Parliament session ah hian a sawi a ni.

- DIPR