Aizawl | Feb 28, 2022: A rawngbawlna inpekna thuk tak avanga Mizo Mother Teressa ti a hriat hlawh, Major Lalthlamuani autobiography "Lalpa min hruaina lamtluang" tih lehkhabu chu nimin Pathianni chawhnu dar 2:00 khan khuhhawnna leh thlirzauna neih a ni. He hun hi Tv. V. Lalnunthara V. Thanga chuan a kaihruai a; Major JC Ngurthanzauva Commanding Officer chuan hunserh hmangin Pu Laltlanmawia, Hrangbana College-a Assistant Professor chuan lehkhabu thlirzauna a nei a. Pu Robert VL Thlamuana Corps Treasurer chuan lehkhabu khuhhawnna a nei.
He lehkhabu khuhhawn tak hi phek 60 a chhah niin; a ziaktu hian a rawngbawlna tawnhriat hrang hrang te tarlangin, hun harsa leh khirh tak a hmachhawn atanga Pathian tanpuina ropui tak lo thleng thin te tarlanin a awm a. Chumi piah lamah a nuna thil thleng chanchin ngaihnawm leh hlimawm lam te tarlan a ni bawk.
Major Lalthlamuani hi The Salvation Army hnuaiah Officer niin kum 40 dawn a service a. Guwahati slum area ah hian mi rethei hnena chaw sem a bultanin; non formal school te din lehin, mi rethei veng a naupang thahnem tak lehkha ziak leh chhiar a thiam tir a, hemi bakah hian adult education programme kalpuiin mi rethei venga nutling te hnenah ziak leh chhiar a thiam tir bawk a ni. Slum area ah hian Assam sorkara a ngen angin tuichhunchhuah a hmalakna in a siam tir bawk a, khatih laia bialtu Minister in rawn hawngin; mi rethei venga sorkar hmasawnna thlenna hmasa ber leh helai hmuna Minister ko kal thei hmasa a ni. Guwahati a, kum 18 chuang a service chhung hian hna a thawh that em avangin Mizo Mother Teressa tiin an koh phah hial a ni. Tunhnaia Mizo nu chhuanawm mi 17 te chawimawina Heritage leh Generation Alpha in an buatsaihah khan chawimawina dawng zingah a tel nghe nghe a ni.
Major Lalthlamuani hi Ni 15, March ah hian a rawngbawlna atangin a retire tawh ang.
Post a Comment
He post chungchanga i ngaihdan lo sawi ve rawh: