HUN KHIRH LAIA RUAHMANNA SIAM DAN

— Rick Warren 

— Feb 09, 2022



"Mihring rilruin a kawng a ruahman a, A ke pen erawh chu LALPAN a hruai ṭhin." Thufingte 16:9 

Pathian chu i sawisel emaw pawi i tihna emaw i duhzawng avang emawin a che lo va. I rinna avangin a che zawk a ni. Matthaia 9:29 ah chuan, "In rin angin in chungah thleng rawh se," a ti a ni.

Nangma theihna hmanga tih i tum i theih lohah chuan rinna kawngah lemchang ang mai i ni a —Pathianah i innghah a ngai a ni.

Ruahmanna siam chu rinna thiltih hi a ni. Mi tam zawk chuan ruahmanna an siam ngam lo, rinna an tlachhama, hlawhchham an hlauh vang a ni.

Ruahmanna i siam chuan, hetiang hian i sawia, “Lalpa, i ṭanpuinain, huntiam chhung ngeia he hna hi thawhzawh ka inbeisei a ni.” Chu chu rinna puanchhuahna a ni a, rinnaa Pathian chawimawina a ni bawk.

Hun harsat lai hian ruahmanna siam harsa i ti a nih chuan, boruak a inthlak thut thut avang hian, thil pahnih tih theih i nei thung a ni.

Pakhatnaah chuan, thil thlen dan azirin ruahmanna i siam thei. Chumi awmzia chu, hun tawng a zir zelin ruahmanna hrang hrang i siam dawn tihna a ni. Entirnan, “Hei hi a thlen chuan hetiang hian ka ti ang. Kawng dangin en ila, chumi niah chuan chutianga a thlen chuan chuti chuan ka ti ang.”

Hun khirh laia hmalam hun atana hun tawng a zir zela ruahmanna siam hi Pathiana rinna i nghahna nen a inmil hle a ni. “Mihring rilruin a kawng a ruahman a, a ke pen erawh chu LALPAN a hruai ṭhin." (Thufingte 16:9).

Pahnihnaah chuan, thiltih ringawt ni lovin nungchang siam thei ruahmanna siam bawk ang che. Kawng dangin sawi ila, i tih chak aiin i nih tum lam hawiin ruahmanna siam ang che. Kum lo awm turah hian tunge nih i duh le? Engtia danglam bik nge i duh? Engtin nge Krista an zel i duh? I chaklohna chu engtia siamṭhat zel nge i duh?

He khawvel dinhmun chu eng ang pawh lo nise, danglamna thlen turin duhthlanna i siam thei renga, i duh ang tak ni thei turin hma i sawn zel thei a ni.

Hna thawh ṭan a hun ta! Engtia tih theih nge ni ang tih ngaihtuah ai chuan rinna bul ṭan a hun tawh a ni. Bible chuan, “Nimahsela, rinna lovin ama lawmzawng mi nih rual a ni lo” a ti. (Hebrai 11:6). Rinnaa ke i pen chuan, Pathianin i ruahmanna chu mal a sawm ang a, a hlawhtlinna turin a ṭanpui ang che a, Pathian chu chawimawiin a awm ang.

Ngaihtuah zui atan

Nungchang siamna lam hawi nge i nih chak lam hawia ruahmanna siam awl nia i hriat? Engvang nge?

Kum lo awm turah hian thlarau lama ṭhanlen i duh dan kawng khat han sawi teh? Vawiinah hian chu i ruahmanna chu puitlin turin eng rahbi nge i rah ang?

Tum bik neia ruahmanna i siamnaah engnge kalsan ngai nia i hriat?

*I nunah Krista chu ila sawm lo a nih chuan,* hetiang hian i ṭawngṭai thei ang: "Lalpa, ka mamawh che tih ka hrechhuak a, Pianthar ka duh a. I chungah ka sual a ni tih ka puang a, ka sualnate min ngaidam turin ka dil a che. Isu, ka Lal leh Chhandamtu ni turin ka nunah ka pawm ta che. Vawiinah hian, Ka nun zawng zawng hi ka hlan a che. I hnung zui ka duh a, ti tura min tih apiang ti turin ka inpeih e. I hmathlir, damchhan leh ka nuna thiltum te hmuh ka duh a ni. I angchhungah min pawm ve ang che. Isua hmingin ka dil a che. Amen."

*Krista chu i nunah i senglut tawh a nih chuan,* hetiang hian ṭawngṭai la, "Ka pa, nun hi rinna mita ka hmuh fiah theih nan min pui la. I hmathlir leh ka nuna i thiltum te ti turin ka inpeih e. Thil ropui tak tih ka tumnaah hian thil ropui tak ka beiseia ka ring che a ni. Ka nuna ruahmanna i neihah hian ka inpe a ni. Isua hmingin ka dil e. Amen."

Isua pawm tura i ṭawngṭai anih chuan, hetah hian email lo thawn la Rick@PastorRick.com. Isua nena zinkawng i zawhna turah hian thil ṭangkai tak tak a thlawna lo thawn che ka duh a ni.

[Lettu: Sangpuia]

Post a Comment

He post chungchanga i ngaihdan lo sawi ve rawh:

Previous Post Next Post