ENGVANGIN NGE PATHIAN HMATHLIR I MAMAWH

— Rick Warren 

— Feb 2, 2022

“Hmathlir awmlohnaah chuan, mipuite an tladah ṭhin.” Thufingte 29:18 (KJV)

Engtin nge Bible-in hmathlir neih chu i nunah a pawimawh a tih?

“Hmathlir awmlohnaah chuan, mipuite an tladah ṭhin.” Thufingte 29:18 (KJV)

I nuna Pathian hmathlir mumal tak i neih a ṭulna chhan kawng thum te chu.

Pathian hmathlir awmlohnaah, thu mum neih theih lohna a awm ṭhin. Jakoba 1:7-8 ah chuan, "Mi, rilru bulbal nei lo, a thil tih zawng zawng nghet lo mi chuan Lalpa hnenah engmah hmuh inring suh se.” (GW).

I hmalam hun atan Pathian hmathlir i neih loh chuan, i zuang lawrin i vak vel ang. Tum, awmchhan emaw awmzia engmah i nei lo vang. Nun chu i liamtir mai a nih chuan, i nung tak tak lo tihna a ni!

Hmathlir i neih loh chuan, i hun i paih a, remchanna i liamtir zel tihna a ni. I hun neih te chu i hmang ṭangkai lo va, i nun enkawltu ṭhalo takah i insiam tihna a ni. Engmah loin i tawp ṭhin a ni. Engmah lo va i then mai mai hian, hniam lam i pan zel tihna a ni.

Pathian hmathlir awmlohnaah chuan inṭhenna a awm ṭhin. I tana Pathian hmathlir i hriatthiam loh chuan, i thiltumah chuan midang ṭanpuina engtin nge i beisei theih ang? Dik tak chuan, hmathlir i neihloh avangin i kal zelna turah midang lakah i tlaktlum loh phah a ni.

I damchhan chu Pathian chauhin a hrilh thei che, a chhan chu mak tak leh a bik taka siam i nihna chu nungchhuak tura siam i nih avangin. Pathian hmathlir anga i awm chauhin Pathianin nun tam a pek che chu i nei thei ang. I kalna tur lam pawh i chian loh chuan, i ruala kal turin midang chu beisei suh.

Thufingte 28:2 chuan, “Ramin a bawhchhiat chuan puipate an inthlak zut thin, Mi thil ngaih dan thiam leh hriatna neitute avâng erawh chuan ram chuan a din rei phah ang.” Hmathlir neih chuan inṭhenna a ti tawp thei.

Hmathlir awm lohnaah chuan, tlukchhiatna awm ṭhin. Mi tam tak tan chuan nun hi laichinte nena inbeihna, sum leh paia tlakchhiatna, leh mimal nuna buaina a ni. Car i khalha a bumper ang mai a ni, kil tin aṭangin thil i sut theih ang a ni. I nunah Pathian hmathlir fel tak i neih loh chuan, loh theih lohin tawpna chu i sut a ngai ang.

Bible-in Pathian hmathlir zawm loh a pawizia min hrilh tawh a ni: “Rinna leh chhia leh tha hriatna thiang tak pawm tlatin; mi thenkhatten chung chu paih thlain rinna kawngah chuan lawng keh angin an keh chhe ta.” (1 Timothea 1:19).

Pathian hmathlir nei tur chuan ṭawngṭaina, ngaihtuahna fîm, leh Pathian âw hre tura beih zel a ngai. Chu chu chiang taka thil hmuh rahchhuah te, hlauhna mit aia rinna mita hmuh te a ni. I rinnain i chhia leh ṭha hriatna a kaihhruai chuan, damchhan neia hmalam pan zel dan turah i var kuar ang.

Ngaihtuah zui atan

* I nuna Pathian hmathlir chu engnge ni a i hriat?

* Tuna thil thleng mek chu hlauhna mit aia rinna mita i hmuh chuan, engnge thlak danglam ngai?

* 1 Timothy 1:19-ah rinna chuan chhia leh ṭha hriatna a kaihruai tur a ni a tih hi engnge awmzia?

I nunah Krista chu ila sawm lo a nih chuan, hetiang hian i ṭawngṭai thei ang: "Lalpa, ka mamawh che tih ka hrechhuak a, Pianthar ka duh a. I chungah ka sual a ni tih ka puang a, ka sualnate min ngaidam turin ka dil a che. Isu, ka Lal leh Chhandamtu ni turin ka nunah ka pawm ta che. Vawiinah hian, ka nun zawng zawng hi ka hlan a che. I hnung zui ka duh a, ti tura min tih apiang ti turin ka inpeih e. I hmathlir, damchhan leh ka nuna thiltum te hmuh ka duh a ni. I angchhungah min pawm ve ang che. Isua hmingin ka dil a che. Amen."

Krista chu i nunah i senglut tawh a nih chuan, hetiang hian ṭawngṭai la, "Ka pa, nun hi rinna mita ka hmuh fiah theih nan min pui la. I hmathlir leh ka nuna i thiltum te ti turin ka inpeih e. Thil ropui tak tih ka tumnaah hian thil ropui tak ka beiseia ka ring che a ni. Ka nuna ruahmanna i neihah hian ka inpe a ni. Isua hmingin ka dil e. Amen."

Isua pawm tura i ṭawngṭai a nih chuan, hetah hian email lo thawn la Rick@PastorRick.com. Isua nena zinkawng i zawhna turah hian thil ṭangkai tak tak a thlawna lo thawn che ka duh a ni.

[Lettu: Sangpuia]