Ticker

10/recent/ticker-posts

‘THLARAU THIANGHLIM’ LEH A MIZIA

- K Remruatfela

Thlarau Thianghlim awmzia leh a hnathawh hrim hrim hi khawvel pum huap ang pawha Theologian tha tak ten an ziah leh leh an sawi ka lo chhiarin ka lo ngaithla ve fo tawh thin a. Amaherawhchu, tun tumah erawh chuan chung kan mithiam ten an lehkhabua an chhuah atanga ka hriat ni lo, Pathian Thlarau Thianghlimin keimaha min hriattir dan ang apiang ka rawn puangchhuak zawk dawn a ni.


Kohhran hoten kan zavaia kan hriat theuh angin ‘Thlarau Thianghlim’ kan tih hi Pathiana minung pathum (Trinity) kan tih zinga pakhat a ni a. Hmuh theih leh a taka khawih theih ni si lo; amaherawhchu ringtute chunga nunga inpuang thin a ni. Kristian chauh ni lo, sakhaw dang betute pawh hian an rimawi thuam famkim te nena an rik bung bung tawh hi chuan taksa chetna kan tih ang hi chu an dawng ve fo thin a. Amaherawhchu, anni chan leh keini ringtute chan erawh ngaihfin chi a ni lovang.  A mizia leh a hnathawh hi khawvel thiamna (Science & Philosophy) te anga sawifiah fak theih a ni lova. Mitin hnenah keimahnia kan rilru no na (emotion) mil zelin leh kan rilru thlek dan hawizawng mil zelin thawh dan hrang hrangin hna a thawk thin a ni. Taksa bung khatah peng hrang hrang a awm thin ang hian. Chuvangin, mitinin mi thlarau chan theuhte kan inzahsak a, tipung zel thei tura kan inzahtawn thiam sak a pawimawh khawp mai.

Thlarau Thianghlimin a tum ber chu ringtute Pathian Kohhran tana mi nghet leh rinawma siam a ni a. Chung Kohhran mite tinghet a, tichak tur chuan mitinin kan rilrem zawng – hlimna leh phurna hmangin hna a thawk thin a ni. Kan ramah pawh harhna nasa takin a lo thleng tawh thin a. Engvangin nge chuti chung si-a Zofate kan rilru putzia hi a bawlhhlawhin a chhiat em em kan tih chuan ‘Thlarau Thianghlim’ hnathawh ti puitling tura kan taimak tawk loh thin vang leh a hmanrua – ‘Hlim’ leh ‘Phur’ harhna ringawta kan duhtawk thin vang hi a ni a, a pawi em em a ni. ‘Thlarau Thianghlim’ chuan ‘simna’ a keng tel tlat a. Tunhma kan lo nun dan sual zawng zawngte sim a, Thlarau thar dana nung a, rawngbawla Pathian Kohrana tana thih thlenga mi rinawm leh mi nghet ni thei tura a mite chunga thawh dan chi hrang hrang hmanga leih buak hi a thu chah laimu ber a ni a, a thil tum pawimawh ber pawh a ni.

‘Thlarau Thianghlim’ pawl tharna chang tu tak takte chuan ‘siamthara’ an awm miau tawh avangin sualin an nunah thu a sawi thei tawh lova, sualna chi hrang hrang heng – itsikna, duhamna, hleprukna, dawtsawi chinna, mipat hmeichhiatna, ruihhlo hman khawlohna leh zuk leh hmuam thil te lakah inthiarfihlim hmak duhna an nei thin a. Chanchin Tha bu-a Lal Isuan nun dan tha min zirtirna thu te kha an ngai pawimawh em em thin a, a taka zawm a, nunpui tlat pawh an tum thin. Mitinin Thlarau Thianghlim hnathawh hi kan hrethiam lo thin a, hengte hi kan mihring thiamna leh finna hmanga teh a, chhut chhuah kan tum thin vang a ni duh châwk!

A tir lama kan sawi tawh ang khan ‘Thlarau Thianghlim’ hnathawhin a tum ber chu ringtute thih thlenga Kohhran tana mi nghet leh mi rinawm ni tura  chher chhuah a ni a. Kohhran a hlim lai emaw a ro lai ber emaw pawha Kohhran tana rinawm tlat a, khawvel sualna chi tinrengin a lo nuai chang pawha, sualna zawng zawngte nena inmihran hlak a, martyr a tul pawha martyr ngam tur khawpa Pathian Kohhran tana mi nghet ni tura a beram hote chherchhuah hi a thu laimu ber chu a ni. Kohhran lu ber chu Isua Krista a nih angin Thlarau Thianghlim leh Kohhran hi thil inzawm vek a ni a. Chu Kohhrana mi nghet leh rinawm tawh sa te chu Kohhrana Thlarau Thianghlim zara harha a lo thleng a nih pawhin chu a hmanrua chuan a nuaiin a khawih danglam ve chiam kher lo pawh a ni maithei; amaherawhchu, chumi avang chuan Thlarau Thianghlimin a kalsan ni lovin, a hnathawhin a tum ber - ‘Nghehna’ leh ‘Rinawmna’ te sawizawi kher ngai lova an hlenchhuah tawh vang zawk a nih chângte hi tam tak a awm thin a. Hei hi Harhna changtu Kohhran mipuite hian kan hriatthiam a ngai em em a ni. 

Kan ramina a taka kan hmelhriat thin pawi em em chu, hetia Kohhrana harhna a lo thlen hian taksa chetna emaw phur harhna emaw nei ve lem lo, Kohhran Upa/Pastor te emaw leh Krista Kohhrana tana mi nghet tawh sa te hmuh khawro an ni fo thin hi a ni a. Chu chuan Kohhran khamkhawp lohna leh pawlchhuahna a thlen fo thin a, ‘Thlarau Thianghlim leh a mizia’ kan hriatfuh tawh loh thin vang a ni a, a pawi em em a ni.  Anni hniakhnung kan zui ve theih nan Thlarau Thianghlimin kan rilru no na lai ber kaltlangin, anni anga Kohhran tana mi nghet leh rinawm, khawvel sualnain a chimbuai phak tawh loh ni thei turin hna a lo thawk thin a ni a.  Chumi  a nih vang chuan ‘Thlarau Thianghlim’ hi kan tih lungngaih mai lova, a thuchah laimu ber hian Kohhran ho hnena a taka thu a sawi ngei theih nan Lalpa'n kan za atan mal min sawm sak theuh rawh se. AMEN.
Post i hmuh dan

Post a Comment

0 Comments