RILRU THAWPIKNA ATA ENG NGE DAMNA?

 -  Rick Warren

-  4 January, 2022

“Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni?” Rom 8:32

Rilru thawkpikna ata damna i duh chuan, Pathian hnenah i mamawh dil rawh. 

I rilru thawpikna chhan lian tak chu manganna hi a ni. I manganna chhan chu i mamawh huna i thil mamawh takte nei la chuan tiin i ngaihtuah buai a ni. Mahse Pathian ai chuan mihring emaw thil dang emawin i mamawh phuhru turah i ngai ṭhin, chutiang avang chuan i rilru a hahin, i beidawng ang, a chhan chu he khawvela mi tumah hian i mamawh zawng zawng an phuhruksak thei dawn lo che a. Pathian chauhin a thei a ni.   

Mi ṭhenkhat chuan an hna chu himna emaw an ti a, an hna an han chan chiaha, thlamuanna an nei thei ta lo ṭhin a ni.

Ṭhenkhat ve thung chuan inneihna hi himna emaw an ti a. An kawppuite an thih emaw, inṭhennate emaw a lo awmin, “Tunge ka nih? Eng nge ka nihna?” tiin an inzawt ṭhin a ni. 

A nih loh vek pawhin i pawisa chu himna emaw i ti maithei e. Mahse pawisa hlohna kawng hrang hrang a awm ṭeuh a ni.

Ka hrilh duh che chu nangmah aṭanga lak bo theih eng thilah mah i rinna nghat suh. I hna, i hriselna, i hmingṭhatna, i kawppui leh thil dang tam tak i chan thei a ni. Mahse Krista nena in zawmna chu i hloh theih lo vang.

Chu thutiamah chuan i rinna i nghah chuan, Pathian chu i mamawh zawng zawng phuhru turin i ring thei ang.

Rom 8:32 ah chuan, “Ama Fapa ngei pawh zuah lova kan zaa aia petu chuan, thil zawng zawng pawh a thlawnin min pe tel lo vang em ni?” tih kan hmu.

Pathianin a hmangaih em che avanga Isua krawsa thi tura a lo kaltir a nih chuan, i mamawh dang zawng zawng pawh a ngaihtuah loh i ring em ni? Ni e! A ngaihtuah ngei ang.

Rilru thawkpikna i neih apiangin, chawl hlek la, heti hian sawi rawh, “Lalpa chu mi vengtu a ni a; ka tlachham lo vang.” Sam 23:1

Pathian chuan a pe dawn che a. A ngaihtuah dawn che a ni. Thawpikna tihzual ai chuan, i mamawh zawng zawng phuhruksak tur chein a lam hawi ang che.

Ngaihtuah zui atan

* I nuna mamawh i neih hian, a tlangpuiin eng nge i tih hmasak ber?

* Vawiina i nunah hian eng nge i mamawh le? I mamawh chu pe tur chein Pathian i ring a ni tih midangte hnenah engtin nge i lantir ang?

* Pathian Thua a thutiamte chu engtin nge i rin theih ang?

[Lettu: Sangpuia]