Mizoram Police din cham vawi 50na lawm

Aizawl | January 21, 2022: Mizoram Police din champha vawi 50-na (50th Anniversary/Golden Jubilee) lawmna chu January 21, 2022 (Zirtawpni) chhun dar 12:00 p.m. hian Vanapa Hall, Aizawlah neih a ni.

He hun hi Pu Zoramthanga, Chief Minister zahawm tak leh Pu Lalchamliana, Home Minister zahawm tak ten khuallian leh khualzahawm niin an telpui. Vanapa Hall-a lawmna inkhawmah hian Pu John Neihlaia, IPS, IGP(Hqrs) Chairman niin, Khuallian leh Khual Zahawmin thu an sawi bakah Pu Lalbiakthanga Khiangte, IPS, DIG(NR)-in lawmthu sawina hun a hmang bawk.

Vanapa Hall programme zawhah hian Police Headquarters (PHQ), Khatla-ah he ni hriatrengna Golden Jubilee Lungphun chu khuallian Pu Zoramthanga, Chief Minister chuan a hawng.

January 21, 1972-ah Assam Sorkar hnuaia Mizo District chu Union Territory-ah hlankai a ni a. Tichuan Mizo District-a Assam Police awm mekte chu Mizoram Police-a leh (convert) an ni nghal a. Mizoram UT sawrkar thara IGP hmasa ber Pu I.J Verma, IPS chuan January 21, 1972 ah IGP Office a luah tan a, hemi ni hi Official-a Mizoram Police Raising Day atana pawm a ni zui ta a, January 21, 2022 hi Mizoram Police din champha (Raising Day) vawi 50-na chiah a ni.

February 20, 1987-ah Mizoram State thar lo piangin, Mizoram Police pawh State Police Force puitling ni turin zawi zawia thuam that a lo ni chho ta a ni. He kum 50 chhung hian Mizoram Police mi leh sa eng emaw zat chuan hna thawh that avangin Medal leh Award hrang hrang lo dawng ve tawhin, infiamna discipline hrang hrangah te lawmman ropui tak tak National leh International level thlengin an lo la tawh thin bawk a ni. Chutih lai erawh chuan Mizoram Police mi leh sa 56 lai, hna (duty/service) an hlen chhuahna kawnga nunna hlantu, ram leh hnam tana ‘Martar’ an awm tawh bawk a ni.

Tun dinhmunah hian Mizoram Police hnuaiah District Executive Force - 11, Police Sub-Division - 18, Police Station - 38, Special Police Station - 3 (Cyber Crime, Special Narcotic, All Women PS), Police Outpost - 16, Armed Battalion - 3, India Reserve Battalion - 5, Battalion Border Outpost (BOP) - 23, Police Training School – 1 leh Police Unit pawimawh dang -5 (MPRO, Security, Traffic, CID Crime leh Special Branch) te a awm mek a ni.