Ticker

10/recent/ticker-posts

KA PA LEH C.VANSANGA ZAI

(Ka pa thihcham kum hnihna pualin)_

*📒Remmuana Chawngthu🖊️*

Hun leh nite a ral zel a, nunhlui a liam a, ka pa min liamsanna pawh a la rei lo viau emaw tih laiin, kum hnihna a lo tling ta der mai. *2019 Republic day (26 January) zana kan in chhunga thil lo thleng te chu nimin maia thil thleng ang maiin a la fiah a, rilru-ah thil tam tak a lo thar leh a ni.*




 Mahse, Pathian khawngaihna avang chauhin hun nuam leh duhawm hmu theiin, tun thlengin hlim takin kan awm a, a va lawmawm em!

Tunlaia zaithiam leh hlaphuahthiam lo chhuak, mi duhawm zet mai - K.Hminga hla pakhat ka hre chhuak uar uar a, hei hi-
_"Hringnun damchhung rei lote hi,_
_Anchhe dawng awma mawi reng hian,_
_A suntu pawh sunin an awm a,_
_A vuitu pawh min vui liam ang."_
[He lunglen ruam thim ata hi.]

A ni tak asin, ka pa sûntu leh vui liamtu mi engengmaw zat chu hun rei lote chhungin sûn leh vui liam an ni ve zel a, he chhiatna dik tak hi kan intawn chhawk a nih ber hi maw!.

Hla lam han sawi takah chuan, ka pa kha ama tawkah zai peih ve deuh a ni roh a. *Ukulele (Ṭingṭang te chi) a tuk chawp a. Zanriah ei kham hlimah, bang thlang lam ṭhutphah, tukverh bulah ṭhuin a zai ṭhin a,* aw thâm chhelh chhawlh hian, tlin leh tlin loin, an tlangval laia an zaithiam ngainat leh ngaihhlut em em mai - *C.VANSANGA* hla sak ṭhin-ho kha a sa ve nasa ṭhin a.

Thla a lo eng a, dâk deuh er chungin,
_"Zankhua lo tlai leh ta maw,_
_Chhawrthla a lo eng, kei ka tan lawmna,_
_Engdang, tudang ngai lo te'n,_
_Kai rel ta'nge di runah.."_ a ti ve vawng mai zel mai.

Thla a eng zual zel a, ti-hian a han chhunzawm zui leh a,
_"Zantiang chhawrthlapui eng ruai leh,_
_Chung siar hmingthangte lawmin,_
_Kan awi za e, lungduh lenrual kimin..._

_.....A mawi ngei e,_
_Chhawrthla eng leh siar khi.."_  A lêng ve viau a ni ang e.

_"Lunglen tizualtu, aw zan lalnu,_
_Kian zai rel mai loin, la cham rih la,_
_Ka lenrual lungduhten, lo thlir ve se.."_ a han ti tawh phei hi chuan, a zai tlaivar thei mai ang tih a awl khawp mai.

Vanglai hun liam tawh a ngai ve ngei a ni tih hriat takin,
_"Awm khawhar changin ka hawi vel a,_
_Kan hlimlaini ka ngai ṭhin thinlaiah._
_Min hnemtu nang lo chu an awm lo.."_(Chhawr loh thlapui) a han ti zui lehnghal zawm zat a, chumi chhunzawm chuan,
_"Lenlaini chen a, hlimtea len ve hi,_
_Ka nuam e, nangnen; mahse, a rem si lo"_ a han ti zui leh a.

_"I chun leh zua te lo hrangin,_
_I vul lai thliah chak hle mahse,_
_Vawng zel ila, kan tiam thu di"_ a han tih vawng vawng hnu-a _"Tuar thiam a har ka suihlunglen, hmangaih par lawm a rei lo em!"_ a han tih leh phei chuan, a tlangval hun pawhsei sak hial mai hi ka lo châk ṭhin alawm le.

Ka pa kha ṭhian kawm nuam ti zet mai a ni a, inleng pawh a hip hneh hle, amah erawh hi chu midang inah a leng tam vak lo thung a, ama tawkah ṭhian ṭha ngainat a tina thei hle a, he hla a lo sa uar ve pawh kha a awm a nia aw, 
_"Lawm lai kha, lenlaini zawng,_
_Hlimlainite kan va ngai dawn em!.._
_...Aw, khawnge lenrual hlui zawngte kha,_
_Suihlung ruala leng lungduh zawngte.."_ (Kan va ngai dawn em!).

A hun awl hnawh khah nan, silai nen a ram vak ve ṭhin a, amah leh a ramvahpuite zarah ramsa chi hrang hrang kan ei ve nual hman a, hetianga silai kenga ramhnuaia hun hmang fo a nih avang hian a ni ang, he hla pawh hi a sak ve fo ni;
_"A saw raltiang lentu zobawm saw,_
_Chhingmit titlaitu, tuk loh ram chhah kar saw,_
_Mi ngeng pasalṭha lung tilengtu,_
_Buannel ram dai lungdumtu..."_ He hla hi pawl sarih kan nih laiin Mizo subject-ah kan zir ṭhin a, kei ngei pawh hian mawi/nalh ka ti hle a ni.

Ekhai! Sawi dawn chuan sawi thui a ngai dawn riau mai, ka duhtawk dawn teh ang: Heng C.Vansanga hla sak ṭhenkhat - _"A dam ve mahna", "Kumtluangin", "An vul chiai e", "Lamtluang a sei", "Aw, nangnen", "Di enchim loh", "Lunglen hi"_ te pawh hi sawi thui fe tur a la awm.

Zan a meng rei hlei thei ṭhin lo va, dar 9 a pelh thui deuh tawh hi chuan, a zai tui viau lai pawhin, a sira bangah a ukulele a tung a, mutna khum lam a pan vat zel ṭhin. Kei ve thung hian zai lam hi ka chikat chiang em em mai si a.

Engpawh nise, thawnthu ngaihnawm leh ngaihawm min chhawp chhuahsak zel avangin ka pa chungah ka lawm thar leh a ni.
Post i hmuh dan

Post a Comment

0 Comments