KA LEHKHABU NGAINAT PANGA (5)

- K. Remruatfela

Mizo lehkhabu bik ka chhiar tawh atanga vawiin thlenga ka thinlunga thu la sawi, ka nun pum nghawng leh sawi danglam dáwrhtu langsar zual pangate:



*1. "Harsatna Engtia Hmachhawn tur Nge?"*
*_by Lalfakzuala, IAS Rtd._*

_(He lehkhabu atang hian ringtu ten harsatna kan hmachhawn dan tur nasa takin ka hriat thar phah a. Kan chungah harsatna leh vanduaina te lo thleng thin mah se, he lehkhabu avang hian Pathian chatuan remruat ka man fiah thiam phah thin a ni. Vawiin thleng hian ka sermon-na kawngah pawh min la pui nasa hle.)_

*2. Fundamentalism v/s Liberalism*
*_by Upa Dr. PC Biaksiama_*

_(Kohhran thurin humhimna chungchanga Revd Chuauthuama nen an inchaltuahna thu a lâwrkhâwm a ni a. He lehkhabu-a an inchaltauhna tawngkam bungrua atang hian Pathian thu mai ni lo, secular kaihhnawih thilah pawh chîk taka thil zirbing pawimawh zia nasa takin ka zir thar phah a. Vawiin thlenga literary criticism min ngaihhlut tirtu a ni.)_

3. *Thalaite Hmasâwnna atan Career*
*_by R.L. Rinawma, IRS Rtd._*

_(He lehkhabu ka chhiar vang liau liaua law career hi zawh chho ka ni a. Mi chanhai leh rahbeha awmte tana an dikna chanvo hailangtu ni thei tura kawng min sialsaktu a nih avangin he lehkhabu hi ka dam chhûngin ka theihngilh ngai tawh lo ang.)_

4. *Ka Kal Zel Dâwn*
_*by Revd Chuauthuama*_

_(Thil nihna dik tak hmufiah thiam pha chiah lo ten Pathian thil mak tih a sawi nêp an tih vanga a Nilai thupui bu an hâlsak hnua, zâm chhe mai lova inringtâwk taka a tanna a rawn sawhnghehna lehkhabu hian nasa takin huaisenna min pe a. Dodalna leh beihna kârah pawh thil dik lo do va, thudik kal tlangpui ngam zel thei turin nasa takin chakna min pe thar bawk a ni.)_

5. *Mizo Union Kha*
_*by K.L. Chhuanvawra*_

_(Ka pa lehkhabu ziah ni mah se, he ka pa lehkhabu hi lehkhabu puitling ka chhiar chhuah hmasak berte zinga mi, vawiin thlenga Mizo political history min tui chhoh tir tu leh ram leh hnam hmangaih a tul zia ka thinlunga tuh nghettu a nih avangin ka tan chuan a hlu tak zet a ni.)_

Post a Comment

0 Comments