Desy-i te kha !

Khawhai khua aṭangin Mizo Idol  Season -2, 2009-ah a rawn inlan a. Mi ṭan hlawh tak a ni. Top 3 inhlangkai zo lo vin, Idol zin kawng a zawh tawp a.


Khawhai aṭangin Pa Mawia, a ti mai a, chu chuan a rawn buaipui a. Khatla-ah Saizikpuii te nen inchhar chhoin, an intihsiak chhung zawng a ṭul ṭulah an buaipui tawp a.  Khatla khawtlangin a dinhmun te hrethiam-in  kawnah a thlalak te tar-in, bawm te an hunsak bawk a. Lawmawm a tih rualin, zahthlak a tih thu te min hrilh nghe nghe. 

Inelna a zawh hnuah, Khawhai lamah Zonet lam aiawhin Pu K.Rema, K.Mapuia leh Mapuia te 3-in (mi dang pawh an awm mai thei) an han thlah a, khawtlangin ropui takin an lo hmuak nghe nghe a ni.

Chumi hnuah Saiziki te inah khawsa zuiin unau-ah an invuan chho a. Vortex school/studio-ah te receptionist hna te a'n thawk ve lawp lawp a. A belh ber Saiziki a lo boral ve leh ta mai si, baihvai ang reng takin hun a hmang chho a. 

Nikum November thla tawp lam emaw ni khan, Tetea Hmar-in, civil hospital casualty-ah Desy-i a hmuh thu, a dinhmun a ṭhat loh thu te, ngaihvenzui a ngaih takzet thu te mi rawn hrilh a. Tihian, amah hnaihtute ho kan inau khawm a, kan inpun zau ta zel a ni hi! 

Vanneihna beiseiin, tlawm takin Aizawl a rawn lut a, tlawm  tak bawkin a ruang a chhuak ta a nih hi!  A pian, a seilennaah chuan, duhsak takin, thlan khur thuk takin an laihsak ang a, ropui takin, chhuang takin, Khawhai tihmingṭhatu tiin an vui ngei dawn tih ka hriatin ka lawmpui em em a ni.

A lei rohlu, a neih chhun a fapa, kum 4 mi chungah Khuanu'n zahngai mawlh teh se🙏🏻




Post a Comment

0 Comments