Ticker

10/recent/ticker-posts

Aizawl City College Joint Students' Union (ACCJSU) Meet nei; Higher & Technical education miniter in hmanpui

Aizawl | January 19, 2022: Vawiin khan Higher & Technical Education Minister Dr. R. Lalthangliana chu Aizawl City College Joint Students' Union (ACCJSU) Meet ah khuallian a ni a, he hun hi Cultural Centre cum Auditorium, Vaivakawn ah hman a ni.


Khuallian Dr. R. Lalthangliana chuan zirtirtu indaihloh chungchang ah post ruak tam tak karah teaching faculty pension an awm zel a. College hrang hrang Principal te nen pawn sawihona neih fo tawh a nih thu sawiin. Mizoram chuan kum kalta lamah RUSA hnuaiah college zirtirtu 70 chuang post a hnawh khat a, an hlawh tur hi Ministery of Human Resource Development, Govt of India atanga lo kal tur a ni a, an ni lam hian an tihtur an hlen theihnan kar kalta lamah DO letter thawn a nih thu a tarlangin hun reilo te chhungin chinfel a rin thu a sawi. RUSA hnuaiah hian India ram pum ah zirtirtu 300 an lak laiin Mizoram in 70 chuang kan chang hi a lawmawm takzet a, an ni hi awmlo se kal a buaithlak viau in a rinthu leh Covid avanga ram in harsatna sum leh pai dinhmunah a tawn a vangin a nghet(regular) a thawk tur lak mai chu hun a la duh hlek ang tiin a sawi a. Hetih mek lai hian zirlai te harsatna sawrkar chuan hriain pandemic ah zirtirtu mamawhna a nasa leh zual tih hriat a ni a, Casual Teacher 100 vel lak a nih thu a tarlang bawk a. Sawrkar kum tharah a kawng awm thei se tih chu kan duhthusam a ni, tiin a sawi.

Minister chuan Scholarship pekchhuah chungchangah sawrkar chuan a hun dik takah zirlaite scholarship pek a tum thu sawiin, zirlaite hamthatna leh hmasawnna tur atan MYC pawhin tan nasa takin ala a, heng bakah hian college zirlai naupang la graduate lo ten engtingemaw a competitive exam hrang hrang an beihna atana an lo inbuatsaih lawk theihna tur kawng pawh a remchang hmasa berah dap a ni ang, tiin a sawi. Dr. R. Lalthangliana chuan pandemic avangin college admission indaihlohna zirlai ten an neihloh man college seat accomodation pawh 30% in tih pun a ni a, hemi a hlawhtlin theihnana inhawng tak MZU Vice Chancellor leh College Principal te hnenah lawmthu a sawi bawk a ni. College infrastructure tih changtlun nana pawimawh em em hmun awl leh campus zau nei te ah Hostel sak belh a nih theihnan Union Ministry lam a biak tawh thu sawiin, an ni lam pawhin an lo dawngsawng tha hle tih a sawi a. Amaherawhchu Central sorkar pawh covid avangin a buai ve hle mai a, dawhthei taka kan lo awm a tul a ni tiin a sawi.

Minister chuan Vaccine lak kawngah mi tlem a zawng la duh lo, sakhuana avang leh harsatna thenkhat avanga la lo an la awm tih sawiin, tun dinhmunah mi nuai sawmpathum singriat chuangin vaccine an lak tawh thu a tarlang a. India ramah kum 18 chin chung lam first dose la ah ti tha pawl kan ni a, thla chanve vel chhungin kum 15-17 inkar vaccine first dose la mi 37360 an awm tawh a, kan target 57% chu kan hlen tawh a ni a ti a. Precaution dose (booster) pawh health care workers mi 3508 leh Front line workers mi 2650 vel hnenah pek a ni tawh a. Kum 60 chin chunglam, natna benvawn nei mi 1785 hnenah precaution dose hi pek a ni tawh bawk a ni a ti a. Vaccine pek hi veng hrang hrangah kalpui leh mek niin theihtawp chhuaha tran lo la, midangte kawhhmuh tu niturin college zirlaite chu a bik takin Minister hian a ngen a, India ramah a ti tha ber ni turin tan I la ho ang u tiin a sawm bawk a ni. Kum kal ta ah Mizoram a Covid positive hmuhchhuah zawng zawng atanga chhutin Aizawl District atangin 60% covid positive nei ang kan ni a. Krismas leh kum thar kan hman zawh hnu hian 29% velah tla thla in, thingtlang lamah a hluar ta zawk tlat mai hi fimkhur lehzual thingtlang lamah a ngai tak zet zet a, hemi atan hian mask hman that, midang hnaihloh a awm te a tangkai em em a ni tiin a sawi.

He hunah hian Pi T. Lalmuanpuii, Apex Bank Chairman chu khualzahawm niin, hlawhtlingna kawng zawh tur chuan thinlung tak tak a thiltih leh phurna neih a pawimawh zia a sawi a. Pawl hruaitu tan mahni intodelh phawt a pawimawhna sawiin hruaitu tha chuan member te mahni aiin a dah pawimawh hmasa tur a ni a ti.

He hun hi ACCJSU Finance Secretary Pu Johny Vanlalmuana'n a kaihruai a, Assistant General Secretary Pu Vanlalhruaia'n lawmthu sawiin he hun hi a khar a ni.
Post i hmuh dan

Post a Comment

0 Comments