Aizawl-ah India Republic Day 2022 ropui takin lawm

Aizawl, the 26th January 2022: India ram Danpui hman tanna ni, Republic Day chu India ram hmundang te rualin Mizoram hmun hrang hrangah te CoVID-19 Hrileng karah Sawrkarin Inkaihhruaina a siam te tha taka zawmin lawm a ni a. Mizoram chhunga 72nd Republic Day lawman programme lian ber chu tukin zing dar 8 khan Sipai Lammualah neih a ni. He hunah hian Governor Hari Babu Kambhampati chuan India Hnam Puanzar pawtparhin Parade contingent ruat bik ten Hnam Puanzar zahna chibai an buk chu a chhanglet a. Hemi hnu hian Republic Day puala thuchah a sawi chhunzawm nghal a ni.

Republic Day vawi 73-na puala thuchah sawitu Governor Hari Babu Kambhampati chuan Zoram mipuite duhsakna chibai a buk hmasa a. Covid-19 hrileng karah pawh India ram chuan hmalam pan zelin nasa takin kawng tinrengah hma a sawn a ni a ti.

Tlawmngai pawl hrang hrang, Kohhran mite, mipuite leh Frontline Workers ten tha taka Sorkar hmalakna an thlawp tlat avangin Mizoramah Hrileng kan tawrh nep phah a, a lawmawm takzet a ni a ti a. Hridanna pawh tha taka kalpui a nih chungchangah tangkai takin Media hman a ni a ti a. Heng kan tanrualnate avang hian Hripui leng avanga nunna chan awm tlemna ber state kan ni thei a, kan hlawhtling thawkhat hle a ni a ti.

Republic Day Vawi 73-na puala thuchah sawi chhunzawm nghalin Hrileng karah Mizoramin nasa takin a sawn tih a a sawi a. Sawrkar hmalakna leh hlawhtlinna tam tak zinga a thenkhatte a hnuaia Link a tarlan ang hian Governor Hari Babu Kambhampati chuan a tarlang a ni.

Republic Day Vawi 73-na puala Hon’ble Governor Hari Babu Kambhampati thusawi

https://www.exploremizoram.com/2022/01/republic-day-2022-governor-thusawi.html

Sawrkar hmalakna leh hlawhtlinna te a sawi hnu hian Governor Hari Babu Kambhampati chuan kan ram Danpui in a dah pawimawh em em – mitin dikna hum him sak , zalenna vawn him sak, dan hmaa intluktlanna leh inunauna a awm zel theih nan theih tawp chhuah chu kan zavaia mawh a ni tih hre thar leh turin min chah a ni. Hrileng karah pawh hmasawnna kawng kan zawh zel a tul thu sawiin nasa zawk hlawhtlinna thawk chhuak tura tan la chhunzawm zel turin min sawm a. Covid -19 hrileng a la tawp loh avangin sawrkarin mipui himna tura ruahmanna a siam apiang te chu khua leh tui tha taka kan zawm a pawimawh tih a sawi a. A thusawi tihtawp nan Tlawmngai pawl hrang hrang, Kohhran mite, mipuite leh Frontline Worker te thlawpnaah sawrkar hotulu a nihna ang lawmthu a sawinawn leh a; sawrkar tha taka thlawp chhunzawm turin a sawm nghal bawk a ni.

Vawiin Republic Day vawi 73-na lawman hunah hian lawman sem a ni lo a. Amaherawhchu, he hunah hian Literatute & Education huanga a hna thawh that avanga President of India hnen atanga Padma Shri dawng turin Pu V.L Nghaka chu thlan a ni tih puan a ni a. Police leh Excise hnathawk thazual te zinga lawman dawng tur hming pawh lamchhuah a ni a. Hemi te hian hun remchangah President’s Police Medal for Distinguished Service, Police Medal for meritorious service, Governor’s Gold leh Silver Medal te an la dawng dawn a ni.

1. President’s Police Medal for Distinguished Service dawng turin Pu LALRINTHANGA RALTE, DSP, CID(Special Branch thlan a ni a.

2. Police Medal for meritorious service dawng turin PU HL THANGZUALA, PRINCIPAL, PTS, THENZAWL, PU LALRAMMAWIA , INSPECTOR (Armed Branch), 3RD BN. MAP, PU R VANLALRUATA, SI (OPR), OFFICER IN CHARGE POLICE RADIO STATION, MAMIT leh Pu DILIP KUMAR BISWAS , ASI(General Duty) , Frontier Headquarters Mizoram, BSF te thlan an ni bawk a ni.

3. Governor’s Gold Medal (Police): C/270 P.C. Lalrinsanga, Aizawl DEF, C/199 Lalhriatpuia, Aizawl DEF 4. Governor’s Silver Medal (Police): Inspr. (AB) F. Tlanghmingthanga, 1st IR Bn, Hav Rohlupuia, 2nd Bn, MAP, C/16320 Lalringzuala Fanai, 3rd Bn MAP, C/30 PC Siamkima, Aizawl DEF, C/16350 R.Lalrochhara, PTS Thenzawl

5. Governor’s Gold Medal (END) : SI C.Lalbiaktluanga, Anti-Narcotic Squad, Comm of Excise & Narcotics 6. Governor’s Silver Medal (END) : SI R.Lalrinsanga, Anti-Narcotic Squad, Comm of Excise & Narcotics, C/316 P.C. Laldingngheta, Anti-Narcotic Squad, Comm of Excise & Narcotics.

Vawiin Republic Day Vawi-73-na lawman hunah hian Parade contingent 6 chiah an tel a. He hunah hian 2nd Bn Assam Rifles, 38th Bn BSF, 3rd Battalion MAP, 5th IR Battalion, Mizoram Home Guards leh 1st Battalion MAP Brass Band ten guard of honour an pe a ni. Parade Commander C.S.Lalrinzuala, Asst Commandant, 5 IR Bn leh Second Commander C. Lalmalsawma, Dy.SP (SDPO, Aizawl North) ten Sipai lam contingent te hi an ho a ni.

- DIPR