Zofate Haw Runpui Hnam Inkhawmpui Thianghlim a Ṭiak ta!

Aizawl | December 19, 2021: Zofate Haw Runpui Hnam Inkhawmpui Thianghlim chu December 16-18, 2021 chhung khan Zofate Pathian Biakinpui hmun Kanan Veng Thenzawl ah neih niin tluang taka zawhfel a ni ta!

Inkhawmpui khuallian chu THLARAU THIANGHLIM a ni. Inkhawmpui thupui " I thovang u khai I din thar teh tak ang u" tih chu Upa Zairemmawia Chhanchhuak leh Rev. Dr. Zaichhawna Hlawndo ten an sawi.

December 16 zanah Hnam Palai Lawm Inkhawm hman a ni a. Mizoram District hrang hrang leh Mizoram pawn atangin Hnam Palai 300 velin he hun hi an hmang. Hnam aiawh khual zahawm Lai, Mara, Hmar, Lusei, Gangte, Guite, Kuki, Zomi (Paite), Chawngthu, Vaiphei, Mivam leh Ralte te pawh an tel. MZP ten hnam lam thiam takin an entir. Mizoram chhung leh pawn atangin Zofa zaithiam lar tak takten Pathian fak hla hmangin zaiin an awi.  Zorimawi ten mipui zai hneh leh nung takin an kaihruai a,  Pawl leh Hnam aiawh palaiten thu an sawi. Inkhawmpui ah hian Thlarau Thianghlim hnathawh nasa takin a thleng a, Upa Zairemmawia Chhanchhuak pawhin thu sawi hleithei lovin tapin hun a hmang. 

December 17 chawhma lamah Hnam Pual Inkhawm neih a ni a. Mizo Student Union Kulva Cultural Club ten Chheihlam in thiam takin an lam. Hnam aiawh ten thu an sawi karah zaithiam ten nung leh thiam takin zaiin an awi a. Bialtu MLA Pu Lalduhoma Chhakchhuak pawhin thu a sawi. Myanmar (Burma) lam atangin Zofate Inpumkhatna lama Minister tura thlan tlin MP Lalrinmuani pawhin thu a sawi. Zoram Thar Zofate Lairelna hruaitu Rev. Dr. Zaichhawna Hlawndo in "Lung Thuthlung" tih thu hmangin Pathian thuchah a sawi. Thlarau Thianghlimin inkhawmpui hmangtute a pawl nasa hle tih thu kan dawng. 

Chawhnu lamah Zofate hnam lungphun Hawn hun hman a ni a. Lungphun hawnnaah chi peng aiawhten lung an hawn pahin thu ti hian an chham -  “Kei______hian, Vawiin 17/12/2021 hian he_____ lunga chi hming in ziak zawng zawng hi thlahtu bul thuhmun  Zofate vek kan ni a, tuma then darh theih tawh loh turin Pathian tan ram leh hnamah  kan  insuihkhawm tawh dawn a ni tih  puangin ka hawng e” tiin.

 

Hnam Peng lung Hawn rual hian Inpumkhatna Jubilee Dar vawi sarih vuak zel a ni. 

Rev Dr Zaichhawna Hlawndo chuan Lungphun thuchah sawiin Zofate hi kum 3000 dawn kan nihna pawh hrelovin kan bo a. A hun takah Mesia Isua Krista chuan kan nihna dik tak min rawn hriattir ta a. Lalpan puang tura min tih angin Zofate hi tu dang ni lovin  Israel hnam bo- Zosefa fate Zofate kan lo ni tih a puang a  Zosefa thlah kal zel Ephraim leh Manessia Thlahte Kan nih dan lung ziak Thlahtu bul chhuina lung ziak a hawng nghal bawk. 

Ni 17 zanah inpumkhatna inkhawm neih a ni a. Hetah hian Vaiphei Hills ṭhalaite leh MZP Cultural Club te an lam bawk.

December 18 ah Zofate Pathian Biakinpui Lungphum hun hman a ni a. Khawvel a Biakin Lian ber tur - Zofa Kristian zawng zawng te ta tur leh inhmantawm tur chu a sakna tur hmun Zofate Pathian Biakinpui hmun, Thenzawl Phaipui Kanan Vengah Rev. Dr. Zaichhawna Hlawndo chuan a phum. He Biakinpui awmdan tur leh sak dan tur Pathian hnen atanga a dawn dan te pawh a sawi. He Biakinpui hian kawngkhar 12 leh pindan 12 a nei dawn a. Chung pindan 12  te chu Thuthlung Hlui hlui leh Thuthlung Thar pindan bakah Tawngtaina pindan te a ni ang. He Biakinpui hi khawvel hnamtinte hnena Pathian Lal Ram Chanchintha hrilna hmunpui (Global Mission Centre) tur a ni ang a ti. Biakinpui hi HNAM HNATLANG hmangin Zofa zawng zawng ten lungrualin kan sa dawn a ni a ti bawk.