Ticker

10/recent/ticker-posts

Winter Festival 2021 denchhenin Heritage Walk buatsaih

Aizawl | December 29, 2021: Vawiin khan Tourism Department chuan Winter Festival 2021 denchhenin Heritage Walk an buatsaih a. Tourism Minister Pu Robert Romawia Royte chuan Ngaizela K. Lalnghakliana Filling Station atanga vailiamin Lungleng Lal In thleng, 18.2kms kein mi 217 an kal a ni.




Pu Robert Romawia Royte chuan Heritage Walk hi zing dar 7:05 ah a vei liam a, Pu. V Lalengmawia, Director, Tourism chuan walk tan hma hian a tel zawng zawngte hnenah a kalphung leh inkaihhruaina sawifiahna hun a hmang a. Khuallian Pu Robert Romawia Royte chuan a vawikhat na atana Tourism Department in Heritage Walk a buatsaih chu lawmawm a tih thu sawiin kum tina neih thin a nih tur thu a puang nghal a ni.



He hunah hian participants mi 340 zet an in ziaklut a, a taka tel thei chu an vaiin mi 217 an ni. Heritage Walk mipa category a pakhatna chu Lalmuansanga, Ramhlun South niin darkar 1 leh minute 18 ah a thleng a, pahnihna hi Zonunzira, South Lungpher niin darkar 1 leh minute 19 ah a thleng a, pathumna hi P.C Remruatdika, Lunglei Ramthar niin darkar 1 leh minute 28 ah a thleng ve thung a ni. Mipa category ah hian lawmman 1-na cheng 20000, pahnihna cheng 15000 leh pathumna cheng 10000 a ni a. Consolation prize mi 10 tan siam a ni bawk.

Hmeichhe category-ah pakhatna chu Lalengzauvi , Lungleng I niin darkar 2 leh minute 10 ah a thleng a, pahnihna hi Elizabeth Lalmuansangi, Ramthar veng niin darkar 2 leh minute 14 ah a thleng a. Pathumna hi Malsawmzuali, Hlimen niin darkar 2 leh minute 15 ah a thleng a ni. Hmeichhiaa pakhatna hian sum fai cheng 10000, pahnihnain cheng 7000 leh pathumnain cheng 5000 an dawng a. Consolation prize mi 10 hnenah hlan an ni bawk.

Lawmman semna hun hi Lungleng Lal In kawtah Tourism Director kaihhruaiin hman a ni a. He hunah hian VCP Lungleng bakah , Lungleng Lal Pu Khamliana Sailo tupa Pu S Lianlula leh Mizoram State Sports Council Secretary ten thu an sawi a. Pu T.C Pachhunga, Vice Chairman, Tourism Development Board leh Tourism Secretary Pi K. Lalrinzuali hoin lawmman semna hun leh Heritage Walk kharna programme hi neih a ni.


Tourism Department chuan Ministry of Tourism a?anga kum tin kut huaihawtna tur sum a hmuh thin hmangin Winter Festival a huaihawt thin a. Kumin 2021-ah pawh hrileng karah he hun hi hman niin, Cake baking competition te, christmas wreath making competition leh a dang te buatsaih a lo ni tawh a. Winter Festival 2021 kal zelah, vawiin 29.12.2021 hian 'Heritage Walk' K Lalnghakliana Filling Station, Ngaizel, Kulikawn atanga Lungleng Lal In thleng ke a kal an huaihawt a ni.




- DIPR
Post i hmuh dan

Post a Comment

0 Comments