Ticker

10/recent/ticker-posts

PHU LOH CHANVO

- Zawmsanga Sailo
     Ph. 9366282861

     Pathian lam atang chuan mak tak leh ropui taka siam kan ni a. Min siamtu in min siam dan te, min siamtu in ni tura min ruahman dan zawng zawngte hi kan hrephak lo em em.  Mak tak leh ropui taka min siam rual hian mihring lam kawngah erawh chuan chhe tak leh tlawm tak leh nep taka siam ni awm tak tak hi kan katnuk lawi si. Hriatthiam hi a van har thin tak em. 

      Mihring zawnah chuan nu leh pa atangin chhuan tur reng reng ka nei lova. Kei lah khawvel thila hmasawnna leh changkanna lam kawngah chuan ka hlawhchham fai vek a ni ber mai a. Chhuan tur leh beisei tur hi ka nei lo tak zet. Mihring lamah chuan hmuhsit awm mai ka ni a, engmah hi ka ti mi lova, ka zeihawi lova, tluanna reng reng pawh ka nei hek lo. Belhfak tur mihring ka nei lova, tu zar mah zo tura thlamuanna tur ka nei lo bawk.

     Chutiang ka ni chung si a, vawiin thlenga mualpho lo leh tlachham lova ka la awm tlat mai te hi a mak a. Mite hmuhsit leh endawng ka la ni lote hi ka tan chuan chhuichhuah zawh loh thil mak a ni. Kan chhungkua kan hrisel em em a, hrisel lohna avanga sum tam tak tak sen ngai ve lova min enkawlna zawng zawngte hi Pathian mak tak hnathawh a ni tih ka hriat hian ka lawm em em thin a ni.

     Khawvela mihring tam ber hi chuan rim taka an thawh chhuah rah thiamna ropui tak te, rawngbawltu ropui tak nihna te, hausakna te, ropuina leh sanna te an nei a. An theihna tih tur leh thawhrimna tih tur an nei thin a ni. Chutianga hlawhtling te chu kan faka, ropui kan tiin kan chawimawi hial thin. Kei erawh chuan khawvela thil engmah hi chemkalna ka nei ve lo, ka chemkal lohna vek an ni zawk. Thawhrim avanga hlawhtlinpui tur leh mithiam nihpui tur ka nei ve hauh lo a ni. Chu ti khawp chuan khawvela lo piang ve si hian khawvelah hian ka bangbo a ni. Mahse, ka hriat loh lamah erawh min hruaitu leh enkawltu danglam tak ka nei lawi si.

     Pathian mak leh danglam tak avang chuan khawvel mite ngaiha engmah lo hi tangkai ve na chen neiin buatsaih ka ni ta zela, Pathian finna te, theihna te, thiamna te leh hriatna te chu khawvela chhuan tur reng reng nei lo leh tlawm taka awm a, hrehawm ngawih ngawiha hun tam tak ka lo hmanna chuan min hmuhfiahtir a, ka beidawnna leh tahna mittui tam takte chuan  amaha thil awmte chu rawn sawrchhuakin, "Mi au la ka chhang ang che, thil inthup i hriat ngai lohte chu ka hriattir ang che" tih ang mai hian Pathian  avanga ka neih thurukte chu haichhuahin a lo awm ve ta zel a nih hi.

       Tunah hian khawvelin a tihdam theih loh nasat em em, khawvel tihdamna beiseia an beidawn tam em emna rilru lam natna (mental illness) kan tih mai thin, kei erawh chuan 'thinlung thunun thiam lohna leh Setana sualna tangkawp salbeh natna' ka tih ve maiah hian tihdamna kawngah hlawhtlinna nei sang ka in ti em em a. Pathian thahnemngaihna zawng tak a lo ni bawk nen, heng enkawlnaah hian a zar chu mak takin ka zo thin a ni. An dam mai zel tlat nia!!

     Hei mai hi a la ni lo ang. Hun hnuhnungah hian thil rapthlak leh hunkhirh takte a lo thlen tam tual tual dawn avangin, khawvel hi a ralmuang lovin a thlaphan thlak tual tual dawn a, beidawnna te, hlauhna te, zamna te leh rinhlelhnate in mi tam tak an la talbuai dawn a ni. Thlamuan theitu an la zawng ruai ruai dawn. Chu mi hun atan chuan thlamuantu leh tidamtu ni turin khawvel hmaah hian Pathian thiltihtheihna a thuamin ka la thu dawn niin ka hria a. Chutah chuan Pathian mamawh tak taktuten khawvel huapin min la rawn pan khawm hi ka ring ve tlat. Mak tak leh ropui taka min siamtu hian chu mi atan chuan min hman a la tum ang tih ka hreru deuh riau a ni. Chutih hunah chuan a va mak leh zual dawn em!! Pathian avanga nuna, awm ve mai hian a duhnaah min hmang ve mai thin chu a ni e. 

    Khawvel tan hian min la tihlu tual tual dawn a. A chhan chu hun hnuhnungah hian hlauva awm te, mangang leh beidawngten he a thu min kawltir hi an thlamuanna leh damna ber tur a ni dawn tlat. Tun hun ralmuan laia ngainep leh hmusittute ngei pawh hian chawlhna tuihna an hmuhna tur a la ni dawn. Kohhrana intheisem rawngbawlna nung si lote chu kalsanin a awm anga, nuna Krista hmangtute chauh tundin leh hmanin an awm tawh dawn a ni. Chu hun chu reiloteah hian lo thleng mai thei a ni tawh. Amen.
Post i hmuh dan

Post a Comment

0 Comments