Pang ṭawnga lehkha 'Pangkhua thiam' tlangzarh; ADC te an ṭhan len vena tur state in a phal lo vek hi a dik lo - C Ngunlianchunga

• ADC te an ṭhan len vena tur state in a phal lo vek hi a dik lo!

• State hian hnam hnuaihnung zawkte leh ADC ṭhanlenna tur hi phal se, kan ram leh hnam a ṭhang zawk ang

• Hnam tlem zawk leh hnuaihnung zawkte hmasawn vena tur duh lova rap bet tlat hi chu (Mizoram sawrkar hian) ram pa nih dan an thiam lo niin ka hria

- C Ngunlianchunga, MLA Lawngtlai West

Aizawl | December 17, 2021: Pang ṭawnga lehkhabu Centenary C Lalzahawma ziah 'Pangkhua Thiam' chu vawiin chawhm dar 11 khan Lawngtlai West Bialtu MLA C Ngunlianchunga'n a tlangzarh.

Tlangzarh inkhawm C Vanlalnghaka'n kaihruaiin, Rev R Ramthianghlima'n hunserh a hmang a, K Lalremkima'n lehkhabu a thlirlawk.

Khuallian C Ngunlianchunga chuan, "Vawiina Pang ṭawnga  lehkhabu tlangzarh theia kan awm hi a lawmin a ropui a, Pang hnam tan ni chhinchhiah tlak a ni," a ti a. "Pang ṭawngin lehkhabu buatsaih theia Centenary C Lalzahawma thawhrimna hi a chhuanawmin a fakawm a. Pang hnam kal zel tur atan vawiina lehkhabu tlangzarh hi a pawimawh hle a ni," a ti.

C Ngunlianchunga chuan, "Mahni hnam zia rang zahpui an awm ṭhin; chutiang chu mi  vanduai ber an ni!" a ti a, "Mahni ram leh hnam leh kan ziarang humhalh turin theihtawp i chhuah ṭheuh ang u." tiin,  "Kan hnam a par vulna tur hian mawhphurhna kan nei." a ti bawk.

MLA C Ngunlianchunga chuan, Autonomous District Council te'n India Constitution sixth schedule siamṭhat tura an ngenna, Mizoram sawrkarin comment a lo pek turah state sawrkar chuan pakhat mah pawm lova, state sawrkarin, 'a theih loh,' a ti vek a, ADC te an ṭhan len vena tur state in a phal lo vek hi a dik lo," a ti a.

State hian hnam hnuaihnung zawkte leh ADC ṭhanlenna tur hi phal se, kan ram leh hnam a ṭhang zawk ang, a ti.

Hnam tlem zawk leh hnuaihnung zawkte hmasawn vena tur duh lova rap bet tlat hi chu (Mizoram sawrkar hian) ram pa nih dan an thiam lo niin ka hria, a ti bawk.

Lehkhabu  tlangzarh inkhawmah hian MZP general headquarters general secretary Jacob Lalmuanpuia pawhin thu a sawi.

Centenary C Lalzahawma lehkhbu tlangzarh tak 'Pangkhua Thiam' hi Pang ṭawnga thawnthu leh thuziak hrang hrang dahna niin, Pi Lalrinpuii'n a chhuah a ni a, phek 230 a chhah niin, cheng 250 a lei theih a ni.