Ticker

10/recent/ticker-posts

Lianchhiari lemziak intihsiak lawmman sem; Lemziak thiam K Lalramchhana lemziahin lawmman dawng



Aizawl | December 14, 2021: Vawiin khan Department of Information and Public Relations (DIPR) buatsaihin Lianchhiari Painting Competition lawmman semna DIPR Auditorium-ah neih a ni a. DIPR Director Pi Lallianpuii chuan lawmman dawngtu Pu K.Lalramchhana, Zuangtui hnenah cheng 50,000 leh thuziak (citation) a hlan.


Lianchhiari hi Mizo thawnthu ngaihnawm tak atang leh pi leh pute sulhnu heritage site kan neih zinga langsar Lianchhiari Lunglen Tlang avanga hriathlawh a ni a. Mizo thawnthu inhlan chhawn atanga a lan danin amah hi Mizoram khawchhak lama Dungtlang khaw lal fanu hmeltha hmingthang a ni a. Dungtlang khaw vanglai, Dungtlang sangthum khua (a thenin sangsarih ti an awm bawk a) an tih thina lal, Vanhnuaithanga fanu a ni.



DIPR hian building thar - Lianchhiari Run an sak mekah he painting hi an la lut dawn a. Mizo nula hmeltha leh hleitling, zaithiam leh hla phuahthiam Lianchhiari hming chawiin he building hi sak a ni a. Lianchhiari thlalak hlui emaw lemziak hlui emaw hmuh tur a awm loh avangin Mizo lemziak thiam rual te zingah intihsiakna buatsaihin artist ten an mitthla leh suangtuahna ram atanga Lianchhiari ni thei awma an ngaih an ziak a. Thlalak emaw, model emaw, mi tu te hmel mah entawn phal a ni lova, an ngaihtuahna atanga Lianchhiari ni thei awm ang ber nia an ngaih ziak tura tih an ni.

He intihsiakah hian a duh apiang tel theih niin Mizoram Arts Development Society (MADS) member 7 ten painting hi an thlehlut a. Uluk taka endik a nih hnuah Pu K.Lalramchhana lemziak hian lawmman a la a. Midang parukhnenah hian lawmman cheng 10,000 theuh pek an ni bawk.

Vawiin programme hi DIPR Jt.Director Pu C.Lalnunkima’n a kaihruai a. MADS President Pu Laltanpuia’n report a pe a ni.


- DIPR
Post i hmuh dan

Post a Comment

0 Comments