ZIAKTU ROPUI L. KEIVOM A AWM TA LO

(15 July, 1939 - 28 November, 2021)

*A chanchin tawi*

Pu. L. Kelvom hi unau 13 (Mipa 7 & hmelchhia 6) zinga naupang ber niin July 15, 1939 khan Pherzawl, Manipur-ah a piang a. A nu’n a pai lai atangin a pa chu khum betin a damlo a, a pian atanga rei lo teah a thihsan ta a. A pa chuan, “Hei kei lah kal mai tur ka ni tawh a. Lalpa’n thlamuan zel che u rawh se, kan fapa hi a hmingah Lalthlamuong ni rawh se,” a ti a (Mizo tawng

chuan ‘Lalthlamuana’ tihna a ni). 

KEIVOM hi chu an hnam hming a ni a. Tun hma chuan Khawzawl, Mizoram piah, Ngaihzawl chhak tlangah khian Hmar hnam zingah Lungtau ho an awm thin a. Anni ho hian Fal (Vawmtlak)-ah Sakei dum (Black panther) an awh avangin kham khua a awm zawng kha “KEIVOM HO” an ti thin a, chuta tang chuan KEIVOM hnam hming

hi a rawn piang ta a ni.

Pu L. Kelvom hi High School thleng Pherzawl, Manipur-ah a zir a, D.M. College, Imphalah I.A. 1st Div.-ah a pass a. B.A (English Hon’s) a zo. Gauhati University hnuaiah M.A (History) 1966 khan a zo a. Kum 1966-67 khan Sialmat Christian College-ah Lecturer ni chungin All India Service ni tura competitive exam-ah tlingin, kum 1967-1970 khan Indian Customs and Central Excise Service a zawm a, service reng chunga bei chhunzawmin kum 1970 khan Indian Foreign Service (IFS)-ah a tling. IFS a tlin tum hian an batch-ah European History-ah mark a hmu sang ber. IFS a nih chhung hian hmun hrang hrangah post a ni. Kenya (Africa), Jeddah (Saudi Arabia),

Willington (New Zealand), Rangoon (Burma), Milan (ltaly), Male (Maldives)-ah te hian 1st Secretary, High Commissioner, Minister Charge-De-Affairs, Consul General tein a awm tawh a, kum 2020 khan penson-in Delhi-ah ama inah a khawsa ta a ni.

*Thu leh Hla lam*

Pu L. Keivom hi thu leh hla lama tuimi niin kum l3 mi a nih laiin Pherzawl Youngster Athletic Union hla tur a phuahsak a. A High School kal lai pawhin a thianten Love letter ziahsak turin an ruai thin. Hmar tawngin Hla a sawm tel a phuah bakah Article a za tel a ziak. Tin, lekhabu pawh eng emaw zat ziakin a publish bawk. Mizo tawnga a lekhabu chhuah Zoram Khawvel-1 to 8, Bawktlang Thawnthu, Thuthlung Ram, Pherzawl Titi te a ziak a, Zoram Khawvel-1 phei chu Mizo Acadamy of Letters-in Book of the year-ah a thlang.

Hmar hla tam tak English-in a leh bakah Robindranath Tagore-a ziah ‘Gitanjali’ kha Hmar tawnga letin ‘Inhlanna hla’ title peiin mawi takin a let.

Pu Keivom thil tih ropui deuh pakhat chu Bible pum pui Hmar tawnga letin Genesis atangin Thupuan thleng type writer-in amah ngeiin a chhu vek a ni. Bible buatsaih leh chhutah hian tumah pur lovin a penson chhuahpui pawisa a hmang a. Sam leh Solomoma Hlate/Hlathlankhawmte phei

chu poetical word bakah rhyme dik tak vekin a dah. Bible pum pui Hmar tawnga a lehlin bakah Hmar tawnga a lehkhabu chhuah tawhte chu:

1. Hmar Hlasuina (phek 388)

2. Thu le Hla Inlet (phek 377)

3. Ka tukvera inthawk (phek 310)

4. Zangkhawbungbu (phek 310)

5. Nun ram (phek 143)

6. L. Keivom thukhawchang (phek 199)

7. Biethu (phek 392)

Pu L. Keivom danglamna chu - Officer lian ni mah se, tu pawh hian thian kawm hian an kawm thei vek. Mi taima tak a ni a, a hriatna te pawh a zau. Thil mak deuh pakhat chu - Mizoram atangin study leave-in Pu Zosiama Pachuau leh mi eng emaw zat kha B.Ed. an training tum, an subject kha harsa an tih deuh vangin College leh University-a a subject pawh ni lo kha note tha deuhin a siamsak hlawm a ni.

Pu L. Keivom nupui Pi Dari kha Registered Nurse a ni a, December 11, 2020 khan chatuan ram a lo pansan tawh a.An fate:

1. Margaret Lalthangmawii:

Ani hi London-ah Fashion Designer niin dawr changkang tak a nei a. British Prime Minister nupui thlengin a Customer an ni. A pasal European nen

London-ah an inbengbel.

2. Helen Singpui:

Newzeland-a an awm lai khan a ram mi pasalah a nei a, Willington-ah an

awm. Politics-ah lutin Willinglon khawpui (Aizawl Municipal Corporation) kan tih angah hian Deputy Mayor a ni ve tawh. A fate zingah an rama Sipai Officer pawh an awm.

3. David Lalhmingsang: 

Hon’ Captain Rev. Lalzirlien Biate fanu nen inneiin Indonesia-ah an

awm.

4. James Lalropui:

A fapa naupang ber James Lalropui hi International Photo Journalist niin

a nupui (American) nen New York-ah an khawsa.

*A hun hnuhnung*

Ni 25 June, 2021-a a zing tho chu chau leh ngai awh loa a inhriat avangin thisen test a rawt a. An han kal chuan a chauh viau avangin emergency-in damdawi in lamah an kal a. Doctor-in an han en chuan Low-Haemoglobin (HB)/Anaemia (Thisen nei tam tawk lo) leh Pneumonia natna an hmu chhuak a, thisen an pe nghal a. Nasa zawka investigation an han tih chuan a rilpui, a thin, a chuap leh a pumpui-ah Cancer lo awmin stage 4 lai a lo ni tawh a, damdawi inah leh ama inah theihtawpa enkawl zui a nih hnuin a natna chu zual zelin ni 28.11.2021, zing lam dar 5:46-ah chatuan ram min lo pansan ta a ni. A fate ram pawn lama awmte nghah an ngaih avangin ni 30.11.2021 (Thawhlehni) hian vui tum a ni.

MC Lalrinthanga

 Khatla South, Aizawl