NULA NARAN

- Ruata Royte

Assam lam nen hetiang taka boruak sosang kan hneih hma fe atang tawh khan Assam khawpui lian leh laili Guwahati ah khuan Mizo zirlai, ‘nula naran’ pakhat a awm a. Mizoram House ah khuan I chuangkai thin a nih chuan amah hrelo mah la amah erawh I hmu tawh ngei ang.

Mizoram atangin damlo inentir tur chin hrelo leh tawng thiamlo a liam thla engemawzat an awm thin a. Tlawmngaih chhuahin a hna tul te thulhin a hmalam hun thapin phai khaw lumah hnamdang karah chuan damlo mangang tak tak te chu a theih ang angin a lo pui mai thin.

‘I chhungte em ni?’ ti a an zawh chuan ‘Ni love, zirlai ka nia, pui an ngai a ka pui a nih hi’ a ti mai thin. Chu nula naran chu Guwahati khawpui lian a damdawi-in hrang hrang a thawk te chuan vawi duai lo an hmuh takah chuan a inpekna chu an namnul thei lova. Midang tan chutiang taka inpe Mizo ‘nula naran’ avang chuan Mizo damlo te chu duhsak takah an nei a. Mizo damlo te chuan en hmasak leh a man tlawm a enkawl an hlawh fo thin.

A chanchin te chu chanchinbu ah te tial bei buai ni lovin parthi te awrhtir hlawh lo mah se thih leh dam inkar a leng mi tamtak te thinlung ah chuan reh tawh ngailo tura ziak a ni a. An thinlung hmun thuk berah chuan dawhsan dawhin parthi an awrhtir ngei ang.

Hetiang ‘nula naran’ ang hi hmun hrang hrang ah Mizo nula leh tlangval chhuanawm tak tak, zirna avang leh eizawnna avang a awm, hnamdang karah kan hmel timawitu tamtak an awm a. Anni hi Vairengte thlang lam thleng a kan ram sat zau a, kan hnam puanzar zartu pawimawh tak an ni a, Chanchintha dak pu darhtu ropui tak an ni bawk.

Post a Comment

0 Comments