Mizo Mipate an Tlahniam Kan Ti E Law?

- K Remruatfela

Tunlai hian Mipate hian Hmeichhia kan tluk tawh lo, Competitive exam leh Sawrkar hna lâkna reng rengah Hmeichhia hian Mipa an khum zak zak tawh a, Mipate tan kan lak a tul takzet tawh ti-a thahnemgaihna awrawl hriattur a awm ta fo mai a. Ngaihtuah chiang mang lova han chhiar liam puat phei hi chuan Mipate hi kan lo hniam tak tak viau emaw intihte hi a awl rum rum mai.

Chutihlai erawh chuan, kil hrang hrang atanga thlira ngunthluk taka han ngaihtuah hian heng Sawrkar hna, Competitive exam hi Mipa leh Hmeichhiate khaikhinna tura criteria rintlak a ni reng em tih ngaihtuah ngun ngai tak a ni. Mizoram hi State pachhia leh hnufual a la nih vang nge a chhunga chêng mipuite hian State dang ai hian Sawrkar hna hi kan la dahsang hle ni hian a hriat a. Chhungkuaa Sawrkar hnathawk pakhat tal an awm loh chuan kan thla a muang zan lo chu a ni ber e. Amaherawhchu, khawvel ram changkang zawkte kan thlir chuan ‘mi vengva’ leh ‘kei ka ni’  inti chinte hi chuan Sawrkar hna hi a secondary ah an dah deuh vek hlawm zawk a. Sawrkar hnuaia hnathawk nih ai chuan mahni ke-a dina, mahni puala firm neih a, Corporate World-a inhnimphum hi an tum hram hram zawk thin.

Khawvel ram dang daihte chu a zau lutuk kan ti a ni pawhin kan Zoram chhung pawh hi han thlir ila, mahni hnaa hlawhtling, Sawrkar rinchhan lova Private-a mi dingchhuakte hi Hmeichhia ni lovin, Mipa an la ni zawk deuh zel a. Technical leh Professinal Line – Advocate,  Doctor, Engineer etc-a lar leh hlawhtlingte hi han en ila Hmeichhia ni lovin Mipa an la ni deuh zel zawk chu a nih hi! He khawvel ‘Survival of the fittest’ hmuna damkhawchhuaka, lei rem rap ve phak ni tur chuan rilru ti paukhauha, kan suala,  kan beih ve tak tak hi a ngai a. Chutianga Sawrkar rinchhan lova mahni ke-a dinga, penchhuak tak tak tur chuan zep rual lovin Hmeichhe âwmnêm zâwkte ai chuan Mipa phanchang zâwkte hi chu kan lo hriam deuh nge nge thin a ni. Chumi a nih vang chuan, Mipate hian kan tlâkhniam leh thatchhiat vang lam ai mahin he khawvela dingchhuaka, pa chan chang tak tak tur zawkin Competitive Exam lam leh Sawrkar hna lam hi Hmeichhiate angin kan bawh ve huam lo a, hetih vang zawk a lo ni tih hi mi tam tak hian kan hmuh hmaih fo thin!

Kan mi thiam zawkten an sawi fo thin angin State rethei leh hnufual apiangah Central leh State Service an tam a, State changkang leh thangduang apiangah Industrialist an tam thung! Mizoram han thlir leh ila, engvangin nge Aizawl khawpuimite aiin Thingtlang atanga State Service inziaktling kan tam zawk fo takna chhan kan tih chuan eng dang vang ni lovin Khawpui thalai vengva chin tak takte hi chuan Sawrkar hna aia mahni kea din an âwn  zâwk vang a ni châwk. Tihtakemah chuan, khawpui thalai mi vengva chin, naupan lai atanga Zirna tha ber bera zirte hian tum tak tak se la chuan thingtlang thalaite hi an tluk loh fo hi a rinawm lem lo! Tun kan dinhunah chuan a nawlpui hi chuan Sawrkar hnaah hian kan la innghat thup ni hian a hriat a. Post Modern khawvela tawngkam tlanglawn – Stock Exchange, Foreign Direct Investment, SEBI/FEMA, Sensex, MNC, TNC, Law of Securities & Financial Market, Japanese Candle Stick etc tih ang zawng zawngte hi kan Zoram khawvelah chuan a la mikhual hle a. Kan Common language a nih ve hunah meuh chuan he kan Zoram pawh hian Globalization khawvelah hian hma kan lo sawn ve ta viau a nih hi kan ti thei ang.

A tawp nana ka sawi duh chu Mizo Mipate hi kan rin ang em em hi chuan kan la tlahniam lova, kan la tlachhe lova, Sawrkar rinchhan lova, mahni ke-a dinga, nakina kan nula ten rual an la awh lutuk loh nana Private ngeia Zoram economy siam thatu nih kan tum vang zawkin Sawrkar hna hi kan melh hman lo mai zawk a ni tih hi in hriat atan ka rawn puangchhuak duh a. Lo zam reng reng lo turin ka chah duh bawk che u a ni. Mizo tlangval kan kal zel dawn! 👍