MISSIONARY TE PAWH AN HUR VE THO!

- Zawmsanga Sailo
     
Rawngbawlna a zawnga rawngbawlna zahawm leh hlu ber mai. Pasaltha dinhmun tak tak atang lo chuan tih mai mai chi pawh a ngaih loh, leiah leh vanah pawh mi thianghlim ni tura kan ngaih, Pathian tan chuan engkim huam tura kan dah, kan ngaihhlut leh zahruk em em missionary-te ngei pawh hi hurna sualah hian an lo la hur ve  fo mai a lo ni.
     He thu ka ziah lai ngei pawh hian ka ngaihhlut leh ka zah em avangin ka tim deuh uaih uaih a, zahna chibai buk mawlh mawlh chungin chu mi huanga sualna lo inphumru thin chu ten em em chung siin ka han ziak lo thei si lova, a hrehawm ka ti hle a ni. Mi thianghlim buzawla hurna chi lo tla ve thin hi Setana a lawm dawn em mai a, chuvang chuan thup loh hi tha a hriatna ka nei ve tlat a nih chu.
    Roman catholic lam rawngbawlnaah hian mi thianghlim ni tura serhhran chi hrang hrang an awm thin a. Chung chu zah pawh an zahawm em em thin a ni. Mahse,  heng serhhran rawngbawltute hi hur sualna lakah an mualpho ve fo mai. Hmeichhia, naupang khawihchhiat an nih thute chuan kohhran a barakhaih ve chawk a, thu hriat hrehawm tak a ni thin. Chu chuan Pathian mite a tina vawng vawng thin a ni.
     Chutiangin kohhran hrang hrang hnuaia missionary-te pawh hi he hur sualna avang hian kan mualpho chawk  a. Missionary rawn rai ta hlauh mai te, sawn rawn thlak ta tlat mai te, nula lo fawrpui ve ta mai te, uirena suala lo tlu ve ta mai te hi a lo awm ve theih em em mai a nih chu. Hetiang a thlen hi chuan anmahni ngei pawh an khawngaih thlak a, kohhran pawh kan na ngawih ngawih thin. Sual hian thlen phak loh a neih loh zia a ti chiang hle thin a ni.
     He ti zawng hian thlir ta ila, Pathian kohna hriatna tak nei mang si lova eizawn duhna avanga missionary-te pawh hi a awm ve nual theih tawh mai thei. Tunlai hunah eizawnna a vang tawh a, tisa zawna tling tak, thlarau lam zawna tling si lote hi kan in missionary tir fur ve thei tlat tawh bawk a ni. Hetiangte hi a nih phei chuan missionary huang pawh hi  a tawpru hle thei dawn tlat. A enliam mai mai chi loh tulh tulh mai thei a ni.
    Missionary hur sualna laka mi tenawm tak hi ka tawng tawh a. Pathian tihna reng reng a nei lo. Pathian aiin a eizawnna humhim a ngai pawimawh zawk daih. A thiltih chu mi pangngai mai mai pawhin kan tih duh mang loh tur khawpa mawi lo a ni. Dan hmanga rorelsak a ngai a, lei danah a tling lova, van court-ah a tlin loh leh zel phei chuan a va pawi dawn em. En ang ngawt hi kan lo ni lo thei hle mai.
     Mihringte hi dinhmun a zirte hian kan inen loh theih loh chin a awm a, missionary-te pawh zah takin kan en mai a, kan chik kilhkelh ngai lo a ni. In tha en lutuk te, ngaih tihthat lutuk te, inbeisei san lutukna te hian sual tana chetna remchang a siam thei em em a, kan chan loh khana sual tana kawnghawn sak hi a awm ve thei hle a ni. Chuvangin, missionary pawh nise, ngaihtha en a in en ngawt lohte pawh hi kan tan tlanna tha zawk tur a nih hmel hle a ni.
    Miin an tihawm tak thiltihsual an neih chuan kan sawi duh hle a. Mi fel, mi thain an tihawma kan ngaih loh tak an tih a, an mualpho chuan kan ngawihpui leh thei hlawm em em si. Tute emaw tan mualphona chu an phu ve renga kan ngaih theih mai lai hian, tute emaw tan chuan tihpalh, pawi ti a kan inthuam mawi zui hi awm thei tak a ni. Kohhran huam chhunga mi tha thilsualtite tih mualpho loha awm fo hian sual vulh lenna tha tak a siam thei ngawt ang.
     Misssionary ka sawichhia a ni lo. Hna thianghlim, hna zahawm, rawngbawlna chungnunga kan ngaih mek laiah hian sual inphumru a awm tlat chuan Setana a lawm dawn em mai a,  chu Setana lawmna kawng biru chu hailana a awm hi thil pawimawh lutuk a ni. Missionary ka sawichhe lova, thenkhat thiltih tha lo ka sawi mai a ni. Chu thiltih tha lo leh tenawm tak sawi chu Pathian lawm zawng tak ni turah ka ngai hmiah.

Post a Comment

0 Comments