Lawngtlaiah COVID-19 vaccination mop up kalpui dan tur sawi ho

Aizawl | November 8, 2021: Vawiin khan Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah district administration, health department official, block development officer leh medical officer te nen Lawngtlai District chhunga COVID-19 hri danna (vaccine) la pek lohna khua leh pek hmaihte hrut nawn tura vaccination mop up kalpui dan tur sawi ho a ni.


Bawrhsap Dr Andrew H. Vanlaldika chuan COVID-19 hri danna pek chu sawrkarin a ngaih pawimawh ber pakhat a nih thu sawiin, thawktute chu tan la sauh sauh turin a chah a. Fur leh inkal pawhna leh chhan hrang hrang avangin harsatna awm mah se, a theih dan dana hri danna pek chu kalpui turin mop up plan chu duan a nih thu a sawi.

District Immunisation Officer Dr S. Thaizi chuan COVID-19 hri danna (1st dose & 2nd dose) pe tura mop up plan an siam a sawi fiah a. District chhunga vaccine la thei chin zawng zawngin kim taka an lak theih nana mop up kalpui chhunga thil tul hrang hrangte sawi ho a ni bawk.

Lawngtlai District chhunga khaw 198 zingah fur laia tlawh pawh a harsat vang leh vaccination site siam a rem loh avanga la kal lohna khaw 41 a awm a. Tun tum mop up-ah chuan he'ng la kal lohna khua zawng zawng bakah, vaccine la la kim lo khua zawng zawng pawh hrut vek turin ruahmanna siam a ni a. Team hrang hrang insiamin, naktuk, November ni 9 atang khian khaw tinah kal chilhin vaccine pek runpui hi kalpui tura ruahman a ni a. Hemi rual hian malaria mass screening pawh kalpui nghal tum a ni.

January ni 19, 2021 atanga November ni 5, 2021 thlengin Lawngtlai District-ah COVID-19 vaccine 1st dose la tawh mi 55,021 an awm a, an zinga mi 26,773 te'n 2nd dose la tawhin, 2nd dose lak hmabak hi mi 28,248 an la awm a. Lawngtlai District target atanga kum 18 chung lam, vaccine la thei chin mi 82,359-ah vaccine lak hmabak mi 27,338 an la awm a, vaccine la tawh hi za zelah mi 66.81 ang a ni.

- DIPR


EXPLORE MIZORAM
email: admin@exploremizoram.com

Post a Comment

0 Comments