Chief Electoral Officer Hovin Lungleiah SVEEP Bike Rally

Aizawl 6th November 2021: Election Commission of India Flagship Program pawimawh tak ‘Systematic Voters’ Education and Electoral Participation (SVEEP)’ hnuaiah vawiin khan Lungleiah Bike Rally buatsaih a ni.




Bike Rally ah hian Royal Knights Bullet Club Lunglei member-te telin Mizoram Chief Electoral Officer (CEO) Pu  P. Jawahar, IAS chuan Lunglei DC office tualzawlah a vailiam. Pu  P. Jawahar chuan democracy hrisel tak kan neih theihnan khua leh tui vote nei thei chin te chu electoral roll a kan inziahluh veka, a hun a thlena vote kan thlak theuh a pawimawh a ni tiin kum tling thar te leh roll a hming la chuanglo te SSR 2022-a inziaklut ngei turin a ngenin a sawm a ni.


Vawiin program-ah hian Lunglei District Election Officer & DC Pu Kulothungan A, Jt CEO Pu David Liansanglura Pachuau, Election Officer Pi C. Lalduhzuali te leh election kaihhnawih official-te an tel bawk a ni.

Rally hi Kawmzawl, Pukpui thleng neih niin electoral roll-a inziahluh pawimawhna leh  inziahluh dan te au rinna hmangin Lunglei khawpui dungah campaign neih a ni.


Special Summary Revision of Electoral Rolls, 2022 chu November thla atangin neih tan niin India khua leh tui dik tak, January ni 1, 2022-a kum 18 tling chin te tan November ni 1 atanga ni 30 chhung hian Electoral Roll ah a inziahluh theih a ni.  Hemi hun chhung hian siamthat ngai siam that dilna hun hawn a ni bawk. Registration/Dilna hi mahni BLO te kaltlangin emaw Voter Helpline App hmangin a tih theih a ni.

Systematic Voters Education and Electoral Participation (SVEEP) hi mi puitling vote nei thei chin India khua leh tui dik tak ten vote neih hlutna an hriat thar lehzualna tur leh vote thlak pawimawhna leh vote thlak ngei tura dan in min phut thu te inzirtirna a ni. Lunglei District SVEEP hmalakna hnuaiah hian awareness campaign hrang hrang  - video clip, rally, students awareness, social media campaign te buatsaih mek zel a ni. 

Post a Comment

0 Comments